Kune Reki ena Bula Oqo

Ena dua na gauna au a wilika tiko kina e dua na vosa ni koniferedi raraba nei Elder Richard G. Scott ena Kuoramu ni iApositolo Le Tinikarua. E dina ga niu sa rogoca ka wilika oti na vosa oqo, e vakauqeti au e dua na malanivosa ka sa mai balolo tu ni noqu vakanananu.

E oti toka e vica na auwa, a sikovi au mai o luvequ tagane, ka vakaitikotiko ena dua na vale redetaki vata kei ira na nona ilawalawa. Sa kaulotu oti o koya ka sa cakava tiko e vica na nona vuli ena koliji. E sega sara ni matata vua na isausau ni vuli cava me taura kei na cakacaka mena sasaga yani kina. Ena vuku ga ni nona sa mai veilecayaki ka nanuma ni vuli, ena gauna oqo, e vakaoti gauna kei na ilavo, sa mai biuta tu mada na vuli ka tekivu cakacaka tudei.

A kaya vei au ni dua vei ira na nona itokani sa nanuma tiko me rau gole ki na dua na yanuyanu mai na Bahamas se na Carribean, laki cakacaka e kea, ka marautaka mada me vica na vula. Sa marau vakalevu tiko o luvequ ena vuku ni lalawa oqo. Au raica na kena rawa ni veisiwati na bula rawarawa vakaoqo vua e dua na cauravou.

E vakasauri ga, na noqu vakasamataka sara na itukutuku talei nei Elder Scott. Au taura sara na Ensign ka wilika na ka oqo vei noqu cauravou: “O tiko ena vuravura oqo ena inaki vakalou. E sega ni gadrevi me bulataki tawamudu tiko se me vakayacori tikoga vagumatua na mamarau. O tiko eke mo na vakatovolei, mo vakadinadinataka ni sa rawa mo ciqoma na ikuri ni veivakalougatataki sa solia vei iko na Kalou. Sa gadrevi kina me qaqaco vinaka na vosota” (“Finding Joy in Life,” Ensign, May 1996, 25).

A sega tale ni vosa o luvequ, taura na mekasini, ka gole yani, ka wilika taucoko na vosa o ya. Na ka ga sa qai mai kaya e muri o ya ni sa na sega ni lako ki na yanuyanu o ya.

A yaco na gauna me sa laki vuli ovisa sara, na ilakolako ka muataki koya yani me rau sota kei koya me laki watina. Rau a qai vakamau ena Valetabu e Mesa Arizona ka rau sa qarava tiko nikua e tolu na luvedrau totoka. Ena 2010 a vakacavara o luvequ tagane na nona diqiri ni bejila ka sa yaco dina me “kune reki ena bula oqo.”

Ena rairai me a dua beka na gauna talei na ilakolako vakatura mai o luvequ; ia ena yasana tale ka dua, ena rairai ka rerevaki toka vakayalo. Ena veigauna niu vakasamataka lesu na ka oqo, e dau tara na yaloqu na Yalotabu.

Au sa vakavinavinaka ki na domodra na parofita kau a vakauqeti vakayalo meu taleva tale e dua na vosa ka a vukea meu veidusimaki kina. Au sa vakavinavinaka talega ni a vakarorogo o luvequ tagane ki vua e dua na italai ni Turaga ka vakatara na Yalotabu me vakauqeti koya. Au kila ni dau yaco mai e vuqa na veivakalougatataki kei na loloma vakalou vinaka ena gauna eda vakarorogo ka vakamuria kina na ivakavuvuli ni iVakabula kei ira na Nona italai.