Nodra Gole ki Esia na iLiuliu Raraba ni Goneyalewa kei na Mataisoqosoqo ni Veivukei

E ciwa na siga na nodrau soli ivakasala ka veivakauqeti tiko vei ira na goneyalewa kei na marama e na iWasewase o Esia ena Noveba ni 2012 o Mary N. Cook, imatai ni daunivakasala ena mataveiliutaki raraba ni Goneyalewa, vata kei Linda S. Reeves, ikarua ni daunivakasala ena mataveiliutaki raraba ni iSoqosoqo ni Veivukei.

Na ilakolako oqo a salavata ki na kena vakaraitaki raraba na lewenivuli vou ni itabagone, Ia Mo Lako Mai, Mo Muri Au, ka ra na tekivu vakayagataka tiko na Cauravou, Goneyalewa, kei na itabagone ena Matawilivola ni Sigatabu ena nodra kalasi ena Janueri 2013. E tuvanaki na lewenivuli vou oqo me vukei ira na qasenivuli mera veivakavulici vakalevu cake me vakataka na iVakabula ka vaqaqacotaki na nodra veimaliwai kei ira na lewe ni kalasi.

Ni oti na nodrau siko vanua o Sisita Cook kei Sisita Reeves ki na Wasewase o Esia, e vuqa na itabagone kei Esia kei ira na nodra itubutubu era nanuma ni ra sa vakauqeti vakalevu cake mera vakasavasavataka ka dikevalesu na nodra bula ka yaco mera ivakaraitaki vinaka ki na nodra itikotiko raraba.

A yalataka o Sisita Reeves, vei ira na itabagone mai Hong Kong, “Kevaka mo na bula savasava tiko, sa rawa mo tucake ena yalodei e matadra na tamata kecega!”

Ena nona vakauqeti ena vosa oqori, a kaya kina ni oti na soqoni o Tang Kak Kei yabaki 12, “Au kila ni sa gadrevi meu wilika ena veisiga na iVola i Momani. Sa vakavulica vei au na Me iSakisaki ni iTabagone meu veivutuni ka bula dodonu tiko ka ni gauna au vakayacora kina sa na rawa ki na Rarama i Karisito kei na marau dina me cila basikati au.”

Mai Idia, a soqoni vata o Sisita Cook kei ira na lewenilotu ena valenilotu vou mai na Tikina o Chennai India vata kei ira na lewenilotu ni iTeki Vou o Hyderabad India ka vakasalataki ira na itabagone qase cake mera vakavakarau ki na veisiga ni mataka. “Mo rawata vakavinaka na nomu vuli,” a veivakamasuti, “na kila-ka ena vukei iko mo tara cake na matanitu. Mo raica matua tiko na nomu matavuvale kei na cava mo cakava me ratou kalougata kina na lewe ni nomu matavuvale, vakakina na nomu vakavakarau vakayalo mo kilikili kaya ena veivakauqeti vakayalo ka mo na kila na vanua mo lako kina kei na cava mo cakava.”

Mai Indonesia, a vakaitavi o Sisita Reeves ena isevu ni koniferedi ni iteki ni iTeki Vou o Surakarta Indonesia. “Keimami a vakila na nodrau vinaka kei na yalo loloma. Era sa qai lewenilotu yalodina sara!” a kaya o koya.

Ni oti a siko vanua yani ki Malaysia o Sisita Reeves, ka laki veivosakitaka kina kei ira na ilawalawa marama eso ni iSoqosoqo ni Veivukei na ulutaga bibi baleta na iSoqosoqo ni Veivukei ni sa dua tiko na isoqosoqo e Malaysia kei na sala mena veidusimaki ka veivakauqeti kina na Lotu.

Mai Taiwan, a vakavinavinakataka kina o Sisita Reeves na nodra qaqaco ka yalodina tiko na lewenilotu e kea. “Keitou marautaka na neitou kila ni ra sa yalodina tiko ka ra sa gole tiko vakawasoma ki valetabu. … Era sa ivakaraitaki vinaka ni loloma na lewenilotu kivei ira na nodra itokani kei na nodra neiba,” a kaya o koya.