Me iSakisaki ni iTabagone
Na Cava Mada na iTokani Dina?
Na ivakatakilakila ni dua na itokani e sa veisau ena vuravura ni tekinoloji veisemati edaidai. Eda na rairai nanuma ni levu na noda “itokani” edaidai. E dina sara: eda dau marautaka na noda rawa ni bulagoci ka kila na veika e yaco tiko ena nodra bula na noda veikilai ka vakakina na itokani makawa kei ira ena gauna oqo kei ira talega na tamata eda se bera ni sotava ka da vakatoka me noda itokani.
Ena vakasama ni vakauitukutuku raraba, na vosa “itokani” e dau vakayagataki vakavuqa me vakamacalataka na veitaratara ka sega ni veimaliwai. Ko rawa ni na vakauta e dua na itukutuku vei ira na nomu “itokani”, ia oqo e sega ni tautauvata me vaka na kena yaco e dua na veimaliwai e matanavotu vata kei na dua tale na tamata vakaikemudrau.
Ena so na gauna eda dau veinanuyaka me na tiko eso na noda itokani. De dua beka sa dodonu meda sasagataka meda dua na itokani.
E levu tu na ivakamacala ni kena ibalebale meda dua na itokani. Au na sega ni guilecava na rogoci Elder Robert D. Hales ena Kuoramu ni iApositolo Le Tinikarua ni vosa vakaibalebaletaka na vakaitokani kei na veivakayarayarataki kaukauwa ni itokani ena noda bula. Na nona ivakamacala e sa dau veivakadeitaki voli ena noqu bula. “Na itokani sai ira era dau vakarawarawataka na kena bulataki na kosipeli i Jisu Karisito.”1 Ena vakasama oqo, na kena raici cake na vinaka ni dua tale na tamata e sa ivakatakilakila ni itokani dina. Oya na nona vakaliuci e duatani tale. Oya na noda vakabibitaka meda yalodina, dau doka, ka bula savasava ena veika eda vakaitavi kina. De dua na vosa na yalayala ena tadolava na ibalebale dina ni veitokani.
Ni yabaki 15 na luvequ yalewa o Emi, a vatavatairalagotaka okoya na mataqali itokani vakacava me na vakasaqara. Ena dua na mataka au a raica na nona iVola i Momani ni cegai tu na Alama 48. E a makataka tu okoya na tikina ka vakamacalataki Kavetani Moronai: “Sa tamata kaukauwa sara ka tamata qaqa ko Moronai; io sa tamata yalomatua sara talega. … Io, sa dei sara na nona vakabauti Karisito” (tikina e 11, 13). A vola okoya ena dua na iyatu, “Au via veigadivi ka vakawatitaka e dua na turaga vakataki Moronai.” Ena noqu vakaraici Emi voli kei na mataqali cauravou e veilasamaki vata ka mani veigadivi kaya ni sa yabaki 16, au rawa ni raica ni sa vakatauvatana okoya vakataki koya na isausau oya ka vukei ira talega eso mera bulataka na kedra ivakatakilakila na luve ni Kalou tagane, taura tu na matabete, ka na tama ka iliuliu mai muri.
Na itokani dina ena vakayarayarataki ira era veimaliwai vata mera “toso cake vakalailai [ka] mera vinaka cake vakalailai.”2 Sa rawa ni o vukea eso tale, vakabibi na cauravou, mera vakarautaka ka qarava e dua na kaulotu e dokai. Sa rawa ni o vukea tale eso mera bula savasava tikoga. Na nomu veivakayarayarataki kei na veitokani yalododonu ena rawa ni veivakadeitaki vakayalo sega walega ena nodra bula o ira o veimaliwai vata ia me baleta na kawa talega ka na muri mai.
A kacivi ira na Nona tisaipeli na Turaga me Nona itokani. E kaya o Koya:
“Sa noqu vunau oqo, Mo dou veilomani, me vaka kau sa lomani kemudou.
“Sa sega na nona loloma e dua na tamata me uasivi cake ena ka oqo, me solia na nona bula ena vukudra na wekana.
“Dou sa wekaqu kevaka dou sa kitaka na ka kecega au sa vakarota vei kemudou.
“Au sa sega ni vakatokai kemudou tale me noqu tamata; ni sa sega ni kila na tamata na ka sa kitaka na nona turaga: ia ka’u sa vakatokai kemudou me wekaqu; ni’u sa vakatakila vei kemudou na ka kecega ka’u a rogoca mai vei Tamaqu” (Joni 15:12–15; me vakaikuritaki).
Ni ko bula ka wasea na kosipeli i Jisu Karisito, o na uqeta mai na tamata kivei iko ka ra na vinakata mera nomu itokani—sega walega ena veitaratara ka kune ena vakauitukutuku raraba ia na mataqali itokani e a vakaraitaka na Turaga mai na Nona vosa kei na Nona ivakaraitaki. Ena nomu sasagataka mo itokani vei ira tale eso ka vakacaudreva na nomu rarama, ena vakalougatataka na bula ni lewe levu ko veimaliwai vata kaya na nomu veivakayarayarataki. Au kila mai na nomu saga mo itokani vei ira tale eso, me vaka era dusimaka na parofita kei na ivakaraitaki ena ivolanikalou, ko na marau ka yaco mo na dua na veivakayarayarataki vinaka ena vuravura ka dua na siga o na ciqoma na yalayala lagilagi ka tukuni ena ivolanikalou me baleta na veitokani dina: “Raica ena laki dei tale tu ga mai kea na ivakarau ni noda veimaliwai tu eke, ia sa na uasivi ka lagilagi sara mai kea” (V&V 130:2).
Droini ni Taba © iStockphoto.com/Fonikum and mai vei Les Nilsson