Digitaki na Tikina e Vinaka Cake

E dua na sigatabu a vakurabuitaki nona dauniveivakatavulici o Zoltán Szücs mai Szeged, Hungary, ena nona kaya vua ni sa na sega tiko ni gole ki Jamani me laki qito kina.

“Oya sara ga na siga meu na papitaiso kina, au sa mai kaya sega,” a kaya o Zoltán

Sa yabaki 17 o koya, ka sa rawata o Zoltán e vuqa na veisisivi ni voce bavelo. Oqo e dua na qito taleitaki mai Hungary, ka kenadau sara o Zoltán—ka na rawa sara ni yaco me dua na kena veta e cake duadua. Ni sa lomana me calata e dua walega na veisisivi vakaoqo, sa na rawa me biuta vakadua o Zoltán na voce bavelo. E tiko e dua na ka e vinaka cake me cakava o koya.

A taleitaki sara vei Zoltán na voce bavelo . Ena veiyabaki ni nona cakacaka vata tiko kei nona dauniveivakatavulici, sa vulica kina o koya me qarauni koya, talairawarawa, ka cakacaka vakaukauwa. Sa vulica talega o Zoltán me drotani mai na waigaga kei na itovo ena rawa ni vakacacana na nona veisisivi. E sega ni bula rawarawa; e bula galili, ni yaco me kenadau ena taura e levu na gauna. O ira na kenadau era dauvakatovotovo me 12 na auwa ena dua na siga ka ra na dauveisisivi ena Sigatabu.

‘E tarura sara ga e levu na noqu gauna na voce bavelo,” e kaya o Zoltán. “E veivakaosoosotaki. Ena vuku ni ka oqo, au sa biuta kina e vuqa na ka mai na noqu bula.”

Oqori na vuna sa nanuma kina o Zoltán ni sa sega ni rawa vua me dinata ruarua tiko na kosipeli kei na voce bavelo. Ena 2004 a kaya vei nona dauniveivakatavulici ni sa biuta vakadua na voce bavelo.

Ena itekivu ni yabaki o ya rau sa tekivu vakavulici tinai Zoltán kina na daukaulotu. E sega ni tiko o koya ena tauri lesoni o ya. A ciqoma voraki na veisureti nei tinana ki na nona papitaiso. Ia a tarai na yalona ena dua na ka a vakila o koya ni sa butuka yani na loma ni valenilotu. A vakadonuya sara o Zoltán me veivosaki kei rau na daukaulotu, ena vuku talega ni na rawa ni veimaliwai vata kei rau.

“Era tamata taleitaki vei au o ira na daukaulotu baleta ni ra rawarawa tu ga ia era bula voli ena dua na ivakatagedegede e cecere cake,” a kaya o koya.

Ena vuku ga ni ivakatagedegede cecere sa bulataka rawa tiko o Zoltán ni dau voce bavelo, e totolo sara na nona ciqoma na ivakavuvuli ni kosipeli ni sa ka yaga. A papitaiso o koya ni oti e rua na vula.

Taumada a nanuma o koya ni ra rawa ni se voce bavelo tikoga ia me kua ni veisisivi ena Sigatabu. Ena vuku ga ni o koya e dua, e dau yalodina ki na dua na itaviqaravi se cakacaka, ka gadreva me kenadau sara kina, sa lewa kina me sa na biuta vakadua na voce bavelo.

Ni oti na nona papitaiso a laki voce bavelo tale me qito tu ga kina. Ni cakava oqo, a kerei koya o nona dauniveivakatavulici me vukei ira eso ka tuvanaka na ilakolako eso me vaka ni sa sega ni rawa vua me veisisivi. Ia a sega ni vinakata me vakatabakiduataki koya ki na voce bavelo—se dua tale na itaviqaravi—ena rawa me vakataotaka na nona bula vakatisaipeli.

Sa mani qai biuta vakadua o Zoltán na voce bavelo ka solibula ki na qaravi ni Lotu ena dua na vakatulewa e tautauvata kei na kena a vakayacora o Peresitedi Howard W. Hunter (1907–95) ena gauna a vakamau kina. E dua toka na kena dau ena ivakatagi o Peresitedi Hunter ni rawa me vakatagitaka e vica vata na iyaya ni ivakatagi. Ena veiyakavi a dau laki vakatagi tiko o koya ena dua na mataivakatagi, ia e veisaqasaqa kei na ivakatagedegede ni kosipeli na nodra ivakarau na nona ilawalawa. Sa qai mani biuta laivi o Peresitedi Hunter na nona iyaya ni vakatagi ka dau vakayagataka ga ena gauna ni lagasere vakamatavuvale.¹

E daudiva lesu o Zoltán na voce bavelo, ia sa kila vinaka tu o koya ni nona taleitaka na voce bavelo, ena rawa me veisaqasaqa, ka rawa sara ga ni uabaleta, na nona lomana na Turaga ke na tiko volekata tiko na qito oqo.

Ena rawa ni vakayagataki na ivakavuvuli vata oqo ki na dua ga na itaviqaravi sa rawa ka dau kauti keda tani mai vua na tamata e gadreva na Kalou meda na vakataka. Ena vinaka cake kivei keda yadudua meda bula curuma na bula ka sega vei keda na veika eso—ke ra ka vinaka mada ga—ka kakua ga ni mai vakaleqai na noda bula tawamudu ke ra tiko na veika o ya.

“Sa yaco na Lotu me sa noqu bula,” e kaya o Zoltán. “Niu sa kila tu niu sega ni rawa-iyau mai na voce bavelo kevaka au gadreva meu bulataka ka na rawa ga me noqu qito, sa rawarawa sara meu sa biuta vakadua. Sa yaco ga, noqu sa gadreva meu vakatabakiduataki au vua na Tamada Vakalomalagi.”

Sa tekivu me vulica o Zoltán na kosipeli ena kaukauwa vata ga e dau sasagataka kina e dua na ka. Sa lavaka kina o koya me sa na kaulotu. E gadreva me tiko ga ena nona vanua me vakavulici ira na tamata.

A mani kaulotu e Hungary ka sa cakacaka tiko vaka-qasenivuli ni vosa Vakavalagi. E tomana tiko ga na nona vakaliuca tiko na kosipeli. “Era tiko na veika eso meda na biuta vakadua baleta ni ra dau vakataotaka na sala vua na Kalou,” e kaya o koya. “E rawarawa sara meda biuta laivi na ka ca ni da sa kila ni sa gadrevi meda cakava. E vakavuqa na noda sega tu ni kila na gauna meda na biuta kina na veika eso e vinaka me isosomi ni veika e vinaka cake. Eda nanuma o ya baleta ni sega ni ca, ia sa rawa meda taura tikoga ka se muria tikoga na ituvatuva ni Kalou.” Ia e kila tu o Zoltán ni dodonu meda biuta laivi na veika vinaka kevaka e vakataotaka tiko na noda rawa ni muria na ituvatuva ni Kalou baleti keda.