Noqu Veisureti ki na Veivakabulai

iVakatakilakila

Droini mai vei Roger Motzkus

Niu a se tamata gone, au a sikova e vuqa na veimatalotu kau a lomaleqa baleta ni duidui na nodra vakavuvulitaka na ivakadewa ni ivolanikalou. Au a sega ni lomavinaka me baleta eso na ka tawaveidokai au a raica vei so vei ira, kau sa mani soro ena qarai ni dua na lotu meu curuma.

Ni oti e vica na yabaki, a papitaiso ki na Lotu i Jisu Karisito ni Yalododonu Edaidai o Cleiton Lima, e dua na noqu itokani. A sega taumada ni vakaraitaka vei au dina ga ni keirau veitokani voleka, ia e muri, au sa tekivu raica na veisau vua. Au dau lako wasoma ki nona vale ena veimataka ni Sigatabu me keirau qito soka, ia au sa sega ni raici koya rawa kina. Oqo a yaco veitaravi me rauta ni rua se tolu na Sigatabu. A qai tukuna vei au o Cleiton me kena itinitini ni sa na sega ni rawa ni qito soka ena Sigatabu baleta ni sa rokova tiko na siga ni Turaga. Au a tukuna vua, “Na lotu oqo e sa vakalialiai iko tiko.”

A mani qai sureti au o Cleiton meu tiko ena lotu. Au a vakaulubale vua baleta niu a se sega ni matau ena lotu. A dau kauti ira mai na daukaulotu o Cleiton mera vakavulici au ena loma ni 10 na vula, ia au dau vakaulubaletaki au se tukuna vei ira niu osooso saraga. Ia e sega ni datuvu okoya.

Dua na siga ena June, a sureti au okoya meu tiko ena dua na danisi ni Lotu. Au vakatanini koya, “Ena tiko beka na kakana sega ni saumi ka na levu tale ga na yalewa?” A tukuna dredredre mai, io!

Au na kaya vakaidina niu a sinai saraga ena kena iyacoyaco. Au a sikova na lotu kau taleitaka saraga. Au a kidavaki mai vei ira vakayadua, au kana vakalevu saraga, ka yaco meu taleitaka na tiko ena dua na soqoni. Niu yaco yani ki lotu ena Sigatabu, au sotava e levu na tamata ka rogoca na nodra ivakadinadina. Au a se sega ni kila vinaka na iVola i Momani, ia au a vakila na Yalotabu ni Turaga ni ra vakadinadinataka eso na lewe ni Lotu, “Au kila ni dina na iVola i Momani, ka ni oqo na Lotu i Jisu Karisito, kei Josefa Simici e dua na parofita a kacivi mai vua na Kalou.” Au se sega mada ni a se bau vakalomavinakataki. Au se sega tikoga ni vinakata meu sotavi ira na daukaulotu, ia e tarai au saraga na soqoni ni ivakadinadina oya.

A sureti au tale o Cleiton meu lako ki lotu ena macawa ka tarava. A sega ni rawa vei au baleta ni tiko eso na ka meu qarava. Au a raica na luluvu ni matana niu a tukuna vua na noqu sega ni rawa ni na lako.

Ia, au a yadra cecekala ena mataka ni Sigatabu ka gadreva meu lako ki lotu. Au a duricake ena 6:50, ka dau dredre vei au, ka vakavakarau ena noqu waraki Cleiton me lako mai. A kurabui o koya ni raica niu sa vakaisulu ka veiwaraki tu yani. A vakavulica o bisopi na veika me baleta na matabete ena Sigatabu oya. Au a vakila vakaukauwa na Yalotabu ka vakavureya meu sa na tauri lesoni mai vei ira na daukaulotu. Ni mai cava na soqoni ni Cauravou, au a vakila niu sa na vakarau papitaiso.

Ni cava na lotu, au a tukuna vei Cleiton, “Au sa via papitaiso!”

E a nanuma deu veiwali tiko. Ia e qai kaya mai, “Keu kacivi ira na italatala qase, e rawa beka ni o sota vata kei ira?”Au sauma ena io.

Au a vakavulici mai vei ira na italatala qase lelevu oqo. Niu rogoca na itukutuku ni Veivakalesuimai, a tuburi au e dua na veivakadeitaki kaukauwa cake ni sa dodonu meu na papitaiso. Ia au a vinakata meu kila vakataki au na dina taucoko ni iVola i Momani. Era makataka na italatala qase na Moronai 10:3–5 ena noqu iVola i Momani ka sureti au meu masulaka ka kerea vua na Kalou kevaka e dina.

Au qai nanuma niu a se bera ni wilika na iVola i Momani ena bogi ka tarava. Niu sa tekivu meu wilika, au a vakila e dua na yalo qaqa. Au masu, ia ni bera niu tinia, au a vakadeitaka ni iVola i Momani e dina. Au vakavinavinakata na Kalou ni rogoca na noqu masu. Au a papitaiso ena Julai 2006.

Au a veiqaravi vakadaukaulotu ena Brazil Cuiabá Mission, kei na noqu itokani o Cleiton e a veiqaravi ena Brazil Santa Maria Mission. Keimami sa cakava tiko na ka a cakava o Cleiton vei au: sureti ira na tamata mera lako mai vei Karisito ka vukei ira mera ciqoma na kosipeli vakalesui mai ena nodra vaqaqacotaka na nodra vakabauti Jisu Karisito, veivutuni, qai papitaiso, ka ciqoma na isolisoli ni Yalo Tabu. Oqo dina na sala ki na veivakabulai.

Meda dau sureti ira tikoga na noda itokani kei ira eda veimaliwai vata mera vulica na kosipeli oqo, ni a sureti ira vakayadua na Turaga ena Nona kaya, “Dou lako mai vei au” (Maciu 11:28). Au kila ni oqo na Lotu i Jisu Karisito ka sa kena gauna oqo meda sureti ira kece kina na tamata mera lako ki Vua.