Ti Taekina Taekan Kristo
Te Aoa n Taratara ma Ngaia
Te tia koro karaki e maeka i Ica, Peru.
N te bong teuana I katauraoi bwa Nna anga au taetae n te bootaki n toa. I kamatebwaia te rongorongo “Ana Mwakuri ni Kamaiu Iesu Kristo” iroun Unimwaane Jeffrey R. Holland man te Kooram n Abotoro n te Tengaun ma Uoman ni Maati 2008 Riaona. Inanon ana rongorongo, Unimwaane Holland e kairekerekea te mi are e miia Unimwaane Orson F. Whitney (1855–1931) are e noora iai te Tia Kamaiu inanon te onaroka are i Ketetemane. Unimwaane Whitney e kabwarabwara te maraki ao te korakai are e nooria are e uotia te Tia Kamaiu. Imwiina e koreia:
“N te tai aei E teiraki ao e nakonako nakon te tabo are [te] a katorobubua iai Abotoro—bwaka ni matu! E ioia teutana, kautiia, ao n te bwana ae marara, n aki kaota taraakin te un ke te takutaku, ni butiia ngkana a kona n taratara ma Ngaia teuana te aoa. …
“Okina nakon Ana tabo, E manga tataro riki ao imwiina e manga oki ao e manga nooria naba ni matu. E manga kautiia naba, kauringiia, ao n oki rikaaki man tataro n aron are mai imwaina. Teniua te tai ae e riki iai aei.”1
Ngke I wareka aio, tamnein te kaotioti e rin n au iango. N te tai anne, I ataia bwa te aro are I kona iai ni “kamarurungingkami ma Ngaia teuana te aua” bon te aro ae I kaitara ma ngaia n te bootaki n toa ni katoa Tabati. Mai imwiina anne, I reiakinna bwa aio te teuana n aoa are ti kona iai n tataro nakon Tamara are i Karawa n te aro ae nano. Te tataro bon aana n tainako, ma te Tamnei are e roko n te aua anne n te toa bon te tai are e karietataira iai ni kaniira nakon Tamara are i Karawa ao ara Tia Kamaiu, Iesu Kristo. Ngkana ti kabanei ara iango iaon te Uea, bon te aro, are ti raonna iai n te tai n rawawata are E teimatoa iai ngke e katoka Iaona ara bure. Bon te tai n ata te maraki are E karawawataki iai ibukira.
Bootakin te toa e rangi n nano irou. Irou bon te aua ni kamaiu ae akea tokina. E a tia n riki bwa te tai ae tabu are I uring ao ni kabaeaki inanon te tataro ao inanon te tamnei ni karinea au berita ae tabu ao n iriira ana banna ni katoto au Tia Kamaiu. I ataia bwa e maiu ao e tangirai. I ataia bwa bon tii rinanon Ana angakarea ao raraana ae tabu are e kawawaeaki bwa ti na bane ni kamaiuaki. I ataia bwa aio e koaua ibukina bwa ngkai I mwakuri ao “n taratara ma Ngaia,” ootau e a tia ni karakaaki riki, maiu e a tia ni kakabwaiaaki, ao au taratara n te maiu ae akea tokina ma Ngaia e a nano riki.