Mwakuri ma Tamneim ni Kabane
Ngkana ti reirei inanon te Botoniango n iwawaki 2015, bon te tai ae tabu ni beku ibukin te Uea. Bon ara kantaninga bwa n te ririki aei ti na reiakinna ngaira n tatabemanira nako te kabaeaki ae korakora riki n te kawai are e a tia n anga te Tia Kamaiu—ma nanora, ara kantaninga, ara iango, ao korakorara ni kabane. Ti na kanga ni karaoa anne? Aikai tabeua iango.
Te moan, ti beku ma nanora ni kabane. Ti ata aei bwa e nanonaki n ae am beku ibukin te Atua e riai ni kaungaki man am tangira Ibukina ao Natina. “Ara tangira ibukin te Uea e na tautaekana te bwai ae ti tangiria ibukin ara tangira, kainnanoan ara tai, te bwai ae ti karaoia, ao karinanin ara mwakuri aika kakawaki.”1 Ko kaota am tangira nakon te Uea ngkana ko kawakin Ana tua (taraa D&C 42:29). Ko beku inanon mweengam ao ni kakorakora am utu. Ko kakaraoa nakoam ao ko nakoia naake a kainnanoa raoraonakiia. Ko karekei araia kain am utu ake ko na uoti nakon te tembora.
Te kauoua, ti beku ma marurungira ni kabane. E kainnanoaki te mwakuri n rabwata ao te mwakuri korakora. Te mwakuri ni mitinare e kainnanoa te marurung ao te mwakuri ni ua te toki. Ko na beku ma nanom ni kabane ngkana ko karaoi kainnanoia tabeman, “n aron ae kamwarakeaia aika a baki, kakunnikaiakiia aika akea karabaia, kawaraia aoraki ao ni buokakiia ni kainnanoia, n tamnei ao n rabwata” (Motiaea 4:26).
Imwiina, ti beku ma ara iango ni kabane. E riai am iango n akea barekana ao n itiaki, ao ni boboto iroun te Tia Kamaiu. Ko a tia ni berita bwa ko na Ururingnga n tainako. Ko ukoukora ana kairi te Tamnei ae Raoiroi rinanon te kamatebwai ni booki aika tabu ao te tataro. Ngkana ko kabotaua am iango, am taeka, am mwakuri ma ana iango te Atua, ko na kinai kainnanoia tabeman ao n tau ao n tauraoi ni karaoa te mwakuri.
Kabaneana, ti beku ibukin te Atua ma korakorara ni kabane. Teuana te kawai ni karekea te korakora bon kamwakuran te onimaki n Ana Mwakuri ni Kamaiu te Tia Kamaiu. Ko rairananom ao ni katabuko rinanon te ongotaeka n Ana tua. Ko namakina mwakan te Tia Kamaiu ae konabwai ao n tei ibukin kakai ngkana ko beku ni korakoran te Uea (taraa Aramwa 26:12).
Ngkana ko beku ibukin te Atua ma tamneim ni kabane, E berita bwa ko na kaitiakaki man te bure ao n tauraoi n tei I matana ao ni karekea Mimitongina ae akea tokina.