Ti Ira te Kawai

Tamnei

illustration for lds voices

N au kabanea n tabo n au mition, ti mwakuri ngai ma toau inanon uoua kaawa aika a mena inanon kawan São Paulo, Brazil. Imarenan kaawa aika uoua aikai iai te kawai ae uarereke rinanon te buakonikai ae ti tuai man totoua bukina bwa ti taku bwa e kakamaku ao n taraa n ae a na bon akea te aomata ae ti na kona ni kaitibo ma ngaia ikekei.

N te tawanou teuana ngke ti a kaan roko n te kawai ae uarereke, e kauringai te Tamnei ae Raoiroi, n tuangai bwa ti riai n rin inanon te buakonikai. I taraa Unimwaane Andrade ao n tuangnga ibukin te namakin ae I a tibwa tia ni karekea. E tuangai e namakina naba te aeka n namakin anne.

E aki maan imwiin are ti a tia n toua te kawai ae tiaki tataneiai mangaia, ti noora te aine n nakonako nakoira. E irariki te kawai, ao ngke ti a rirarikina, ti kunea bwa e tang.

Ngke e tararake, e kaoira bwa ti na iria nakon ana auti, ike ti kaitibo iai ma kainabana. N te tai ae waekoa ti moanna n reireiniia taanga aika tauraoi ni kan ongora te euangkerio. Imwiin tabeua te wiiki ti kaoia bwa ana bwabetitoaki. Ti rangin ni mimi ngke a bon tauraoi naba ngkekei ni kariaia ibukina bwa e a tia ni koro teuana te ririki ma imwiin ana kabanea ni bwabetito te uoote. Ti kakaitau bwa ti a tia ni karaoa nanon te wirikiriki bwa ti na rin n te kawai n te bong arei.

Te tai ae uarereke imwain aia bwabetito, ao, te buaine e tangiria n taetae nakoira. E taekinna bwa inanon ririki aika mwaiti e a tia ni karekea te mi anne n te tai ae maan. Ni miina ao e kunea bwa e tataninga i nukan São Paulo. Te mwaane ae a kara riki nakoina e kawaria ao e taekinna bwa uoman ataeinimwaane a na roko ni bita maiuna. E na noria ngkanne uoman ataeinimwaane aika a nakoina, ma e toki n tainako miina ikanne.

Te bong teuana tabeua te wiiki imwaina, e taea aon te timanti inanon ana auti ngke e tuangaki n te bwanaa bwa a roko ataeinimwaane aika uoman ao e kainnanoaki n te tai naba anne bwa e na nakon te kawai ae uarereke, ike ti moan n noria iai. N aki ataia bwa tera te wirikiriki anne ma e tangiria n ata te kaeka nakon miina, e katuka ana buruum ao e nakonako nakon te kawai.

Inanon kawaina, e roko tamnein miina n ana iango ae kanga ti tebo ma e mataku n te tamnei are n tokina e noori ubuia ataeinimwaane ake uoman. E noria naba bwa a bane ni bwain taeki aika roro ma araia iaoia. Tabeua te tai imwiina, e taku, Unimwaane Andrade ao Ngai ti kaoti imatana inanon te kawai. E rootaki n te kukurei, ao e tang.

N te bong aei, n uringa te atatai ae tabu anne, I namakina te Tamnei ao n noria riki n au iango rannimata aika bwaro man matan te titita arei are e butimwaea te euangkerio. Ma te kakaitau ae korakora, ngai ao toau e reke iroura te namakin ao te unganano n ira te kawai are e tangiria te Uea bwa ti na toua n te bong anne.