Teuana te Mwaneka n te Taina

Karekean ana kairi te tamnei bon te mwaneka ae kakawaki ni beku ibukin te Uea, ao Davide C., 15, e ataia bwa e aki mwakuri ngkana akea te mwakuri n ana itera. “I tangiria n riki bwa ana bwai ni mwakuri te Atua,” e taku. “I riai n tauraoi ni karekea ao n iri ana wirikiriki te Tamnei. Ni karaoan anne, I tangiria n teimatoa ni katobibiai ma ana bwai te Uea.”

Davide ma kaain ana utu a bon rairaki nakon te Ekaretia. Imwain are e bwabetitoaki, e reiakina aron kakawakin booki aika tabu Davide. Tarina boni ngaia are e moan bwabetitoaki, ao e aki maan imwiina ao ana karo. E ataia Davide bwa e kainnanoa oin ana kakoaua. Ngke e kamatebwaia ana Boki Moomon, e namakina te Tamnei. Namakin aika raraoi aika e namakin e buokia ni karaoa te babaire bwa e na kaina te Ekaretia.

Aua te ririki imwiina, Davide e teimatoa n onimakina ana kairiiri te Tamnei. “Ti riai n teimatoa. Ti aki kona ni kakerikaka ara kamatebwai man booki aika tabu ao te tataro,” e taku.

Marco D., 17, e taekina kakawakin te ongotaeka nakon taian tua, riki tuan te itiaki. “Te tia kakaitara e kataira ni kawai aika mwaiti, ni kataia ni kamangaoira,” e taku Marco. “A kona naba raao n riki bwa taan anai nano aika buakaka.” Tabeua te ririki n nako ao e na bitia raoraona Marco ake e a tia ni kabanea ana tai mangaia ibukina bwa e kinai aia mwakuri aika aki raoiroi ake a karaoi n ana rinerine. “N na kakaeia raoraou ake a butimwaeai ibukina bwa antai ngai ao tiaki bwa tera ae e kantaningaia te aonaaba ibukiu.”

N tabetai n ara tai n tamwarakea te maunga, ti maran nako. Ngkana e riki aei, “nako nora te bitiobi ao taetae mangaia,” e kawaekoa Marco. “Te bitiobi bon tarira. Ti kona n onimakinna.”

Ana kekeiaki n ongotaeka ao n teimatoa n itiaki e angan Marco ana tai ni beku ibukin te Atua ngkai, ao a katauraoia naba bwa e na tau n te bong teuana ni karaoa ana mwakuri ni mitinare ae bwanin taina.

Manuel M., 17, e kunea bwa e aki bebete n tainako te beku ibukin te Atua. “Ti teimatoa ni kataaki,” e taku Manuel. “N tabetai ti tangiria ni karaoi bwaai riki tabeua. N tabetai I tangiria ni kan matu, n nako n takakaro n te butibooro, ke n raoniia raoraou. Ma e a tia tinau n reireinai n tainako bwa ti riai n rineia ni beku ibukin te Uea. E tikiraoi karaoan bwaai riki tabeua, ma te mwakuri ibukin te Uea e kainnanoaki bwa e na riki bwa te bwai ae kakawaki nakoira.”

Miriam D., 14, e ataia bwa tii te kawai ibukina bwa e na kakoaua bwa te kamatebwai ni booki aika tabu ao te tataro a karaoaki ni katoa bong bon katukan te bong teuana ae onoti ibukin karaoakina. “I namakinna bwa I kona ni karaoa ae bati ngkana I katuka te tai ibukina,” e taku Miriam. “Irarikin anne, ngkana ti kabanea riki te tai ibukin te Uea, ti aki kona ni kaririaki n ae mwaiti—e karikiira bwa ti na korakora riki.”

Ibukin Sabrina D., 15, e beku ma nanona, ana kantaninga, ana iango, ao korakorana ma buona volontà. E nanonaki anne bwa karaoan bwaai ma te katei ae korakora ao ni kakukurei.

E kariaia, Alessio I., 12: “E aki raoiroi karaoakina tii ngkana bukina bwa e tuangko te bitiobi ke am karo bwa ko na karaoia. Ko aki riai n namakinna ae ko kairoroaki. E tangirira te Uea bwa ti na beku n iai bukina aeriai.”

Ti na kanga ni karekei riki buona volontà n ara tai ni beku? “E buokai warekan booki aika tabu, ibukina bwa a reireiniira bwa te beku bon te bwai ae ti riai ni karaoia,” e taku Sabrina.

Kamatebwaiakan ao karekean te oota ae raoiroi riki n te Mwakuri ni kamaiu e kona naba ni buokira ni beku ma te nano ae kukurei ao ni kimareirei. Elvisa D.,17, e taku, “Kanga aron te Tama are i Karawa ngke e kanakoa Ana rikitemanna, are e anga bwai ni kabane ibukira, ti kainnanoia n anga bwai ni kabane aika ti kona ni beku ibukin te Uea.”

Titita Giulia, 16, ao Veronica D., 14, e ataia ae kakawaki tabeakinaia tabeman. “E buokira te mwakuri n ibuobuoki n noria aomata n aroia aika kakaokoro. Ngkana ko beku ibukin temanna, kam uaia ni kakabwaiakaki,” e taku Giulia.

E taku Veronica, “N te tai teuana I tangiria n tibwaua te euangkerio, ma I namakinna ae I tuai tauraoi. I maaku. Ma ngke I iangoa te aomata are I beku ibukina, I namakinna ae e a korakora riki au onimaki ibukina bwa I ataia ae e na buokai te Uea.”

Giulia ao Veronica a kona ni buoka raoraoia ae Virginia ni bita maiuna. A moanna man kaoakina bwa e na raoniia nakon ana waaki ni kakukurei te Ekaretia. A kaoia naba ana utu Virginia bwa a na karaoi bwaai ma aia utu. N te tai ae waekoa a moanna ana utu Virginia ni kaitibo ma mitinare. Te ririki imwiina, e bwabetitoaki Virginia ma tarina ae uarereke.

Ngkai ai ngaia kain te Ekaretia, e tarai kawai Virginia ni beku ibukiia aomata ake irarikina. E rangin n tangiria n tibwaua te euangkerio ma tabeman. N tabetai raoraona n te reirei a manikangareia ibukin ana koaua ae boou, ngaia are e tataro bwa antai ae na riai n taetae mangaia. N te bong teuana e wirikiriki te Tamnei nakoina bwa e na taetae nakon te ataeinaine ae kina. “I anganna Ana Boki Moomon ao I kaoa bwa e na roko n taromauri ma ngai. E roko! Ao ngkai e a wareka Ana Boki Moomon.”

Samuele D., 14, e tarai anga ae na kakorakoraia iai membwa n ana kooram: “I kataia ni buokiia ataeinimwaane ake tabeman n au kooram man kaungakiia n te kiraati. N tabetai a aki kukurei ke n nako nanoia n iri.” E taku Samuele e namakinna bwa buokaia tabeman bon teuana te kawai ni beku ibukin te Atua ao ni katauraoi ibukin tabem nakon taai aika a na roko.

Ngaia ae, tera ae ko na karaoia? Alessio I. taku, “I aki riai n tataninga te tai are I a ikawai iai ao I a tibwa kona ni karaoa te kaokoro. I kainnanoia ni karaoia ngkai.”

Kawai aikai a na buokiko naba ngkana ko ataia ae ngkoe mwakoron ana mwakuri te Uea ae bongana. Karaoia n te mwaneka teuana imwiin teuana. Ko na karekea te kaokoro ae kakawaki ngkana ko reiakinna n anga am bwai ni kabane nakon ana mwakuri te Uea.