Ana Rinan n Riiti Abby aika 10 ake a Moanibwai
Iroun Rosemary M. Wixom
Beretitenti ni Kabuta ibukin te Buraimwari
Man “Taking Time to Talk and Listen,” Liahona, Eberi 2012, 37.
“Aio te babaire ni kamaiu nakoia ni kabane” (Moses 6:62).
Te taina ngke I kawariia kairake n ataeinaine n aia kiraati, e titirakinia kaain te kiraati te tia reirei bwa a na korei 10 aia kouru aika Moanibwai inanon maiuia. Imwiina e tuangiia bwa a na tibwaua are a tia ni koreia. Abby, are e a tibwa koro 12 ana ririki, e bon tekateka irakiu. Aio ana rinan n riiti Abby:
-
Nako n te reirei.
-
N riki bwa te tia korobanna inanon auti.
-
Nako ni mitinare i India.
-
Mareaki n te tembora ma ae e a tia ni mitinare.
-
Karikiia niman natiu ao iai mweengau.
-
Kanakoia natiu ni mitinare ao nakon te reirei.
-
N riki bwa “te tia karao kuuki” kanga kuraenimwa.
-
Kamonaia tibuu.
-
N reiakina riki ae mwaiti n taekan te euangkerio ao n noora kakukurein te maiu.
-
N oki ni maeka ma te Tama are Karawa.
Iai ana taratara Abby n ana babaire te Tama are i Karawa ibukira ni kabane. Ngkana kawaim e katuruturuaki iaon te kouru ane te kabanea ni kakawaki anne n oki rikaaki nakon te Tama are i Karawa, ko na roko ikekei!