Te pure e te fare pure

Ua fariu Dani i ni‘a, aita â râ i itehia ia’na te ni‘a o te fare pure nehenehe. Ua haere mai te mau taata no tera e tera faaroo i ô nei. Aita o Dani i maramarama maitai no te aha te haere ra to’na utuafare i teie fare pure i te mahana pae, ua parau râ papa e, te haere ra ratou i te hoê mea tei piihia Evensong.

« E aha te reira ? » Ua ani Dani.

« E putuputuraa no te himene, no te tai‘o i te mau papa‘iraa mo‘a e no te pure », ua parau papa. « Mai te hoê utuafare fetii rahi i te pae hopea o te mahana ».

Ua au Dani teie mea ta’na i faaroo. Te ratere ra Dani e to’na utuafare na te fenua Peretane. I te sabati i ma‘iri a‘enei, ua haere ratou i te hoê paroisa no te hoê oire tei piihia York. I te Paraimere, ua ite atoa te mau tamarii i te mau papa‘iraa mo‘a e te mau himene ta Dani i ite. Ua ite oia e, ua riro teie paroisa ta’na i haere ei tuhaa no te Ekalesia mau a Iesu, mai te paroisa i to’na fare.

Area râ, ua taa ê roa teie fare pure i mea ta’na i mâtau. Ua haru to’na mata i te hoê airaamaa iti e te tahi mori hinu. Ua ite Dani i te hoê tamaroa i te tu‘amaraa i te hoê mori hinu.

« No te aha outou e tu‘ama nei i te mau mori hinu ? » Ua ani Dani.

Hi‘o mai nei teie tamaroa ma te mata ataata. « E tu‘ama vau i te hoê mori hinu ia pure au no te tahi ohipa taa ê. A ama noa ai te auahi, te ti‘aturi nei au e, e faaroo noa mai te Atua i ta’u pure »

I te mata o Dani, e mau mori hinu noa ïa. Ua tafifi rii to’na mana‘o, aita râ oia i hinaaro ia inoino mai te tahi. Ua faa‘ite noa oia ia’na i te mata ataata.

Parahi atura Dani e to’na utuafare, e aita i maoro roa, ua haamata te Evensong. E ua ite faahou oia i tera tamaroa i te tahi rii noa parahiraa te atea. E ua faaroo a‘era i te mau himene ta te taata e himene ra, aita oia i ite i te reira mau himene. E ia pure ratou, e tai‘o ratou i roto i te hoê buka. Ua taa ê te mau mea atoa i te mea ta’na i mâtau.

E mea navenave râ te pehe, noa’tu e ere i te himene mâtauhia. Ei reira ti‘a mai nei te tahi taata no te tai‘o i te mau papa‘iraa mo‘a. E ahu roa to’na, aita e ahu uouo e te taamu aropo‘a mai ta to Dani episekopo. E a haamata ai oia i te tai‘o, ua tae mai te mana‘o e, ua ite atoa oia i teie aamu ! Te tai‘o ra oia i te aamu no Iesu a faaora ai Oia i na lepera 10.

« E papa », ua muhumuhu Davi, « E mea au na’u teie aamu ».

Ua hi‘o noa papa ma te mata oaoa. « O vau atoa ».

Ei reira ua pure tera taata ahu roa. Ua ani atoa oia i te Atua ia haamaitai i te feia ma‘i e ratou atoa i roto i te ati. Mai ta Dani i rave ! Ua ani atoa oia i te tahi mau haamaitairaa taa ê i ni‘a i te feia faatere o ta’na ekalesia. Ua haamana‘o atura Dani i to’na iho utuafare, e ani noa ratou i te Metua i te Ao ra ia haamaitai i te peresideni Thomas S. Monson e to’na na tauturu.

E mana‘o tamahanahana tei tae mai i roto i te aau o Dani. Ua ite oia e, te parau mai nei te Metua i te Ao ra ua here Oia i Ta’na mau tamarii atoa e te faaroo nei Oia i ta ratou atoa mau pure, noa’tu te haere ra ratou i te tahi atu fare pure e aita i roaa ia ratou te îraa o te evanelia.

A ti‘a ai ratou no te faaru‘e i tera vahi, ua hi‘o papa i ta’na niuniu. E mata oto to’na no teie parau apî tei tae mai. « Ua pohe te tuahine Monson », ua parau oia.

« Aia ! » Ua pure oioi Dani i roto ia’na ia vai maitai noa te peresideni Monson.

« E aha teie ? », ua ani mai te tahi reo. O taua tamaroa nei. Ua faaroo oia ia Dani e mai te huru ra e, ua pe‘ape‘a oia.

« Ua pohe te tuahine Monson », ua parau Dani. « E vahine oia na to matou peropheta, te peresideni Monson ».

« E e », ua pahono mai te tamaroa. « E tu‘ama vau i te hoê mori hinu no’na ».

Ua hi‘o Dani ia’na ma te mata ataata e ma te haamauruuru ia’na. E mana‘o au tei tae mai i roto ia’na no teie tamaroa tei parau i te hoê pure taa ê no te peresideni Monson. Ua ite oia e, e faaroo mai te Metua i te Ao ra i te pure ta’na i pûpû i roto i to’na aau e te pure a teie tamaroa atoa.