Ua muhumuhu mai te Varua ia’u
Christina Albrecht Earhart, Washington, Marite
Faahohoʻaraa na Bradley H. Clark
« Hai ! Haere mai ! » ua tuô te u‘ana te reo.
Ua fariu atu vau e ua ite atura e piti tamaroa, pae e hitu paha matahiti, te horo ra i roto i te vahi tape‘araa pereoo, e roimata te tahe ra. Ua huru pe‘ape‘a tera taata hoo a tuô noa ai ia raua.
Ua ho‘i au i to’u pereoo, ua muhumuhu mai râ te Varua, « E nehenehe ta oe e tauturu atu i reira ». E muhumuhu marû roa, e mea papû râ, e aita’toa i maoro, te horo ra vau na roto i teie vahi tape‘araa pereoo i tera na tamaroa.
Tei piha‘i iho te mea paari a‘e i te hoê pereoo ‘u ravarava. Ua haafatata atu vau ia’na e tuturi ihora i piha‘i iho ia’na.
« Ia ora. O Christina to’u i‘oa. E aha te fifi ? »
I to’na faarooraa ia’u, ua puai faahou atu oia i te ta‘iraa e ua tapuni i to’na hoho‘a mata i to’na rima. Tae mai nei te taata hoo e te tahi tamaroa.
« Ia mana‘o vau, te paraparau reo farani ra raua », ua parau mai te taata hoo ia’u. « Ua ite noa matou ia raua i te hororaa na roto i te fare toa, ua mo‘e raua ».
Ua parau faahou atu vau i to’u i‘oa ia raua na roto i te reo farani. E reo farani ihoa to’u reo tumu, tera râ aita vau i paraparau faahou to’u reo mai te taime ua faaamuhia vau e te hoê utuafare parau peretane, e tamarii noa â vau i tera taime. Ia paraparau vau i te reo farani, e mea maumau. I tera râ taime, aita roa i hapehape e i maumau. Ua papû roa te mau ta‘o i roto i to’u feruriraa e ua tamahanahana to’u reo i na tamaroa.
Ma te ta‘i rii noa, ua faataa mai te tamaroa paari e, e mai te huru ta’na mau parau te hoê taheraa pape, aita i itehia mai ia raua to raua na metua i roto i te fare toa e ua horo mai i rapae no te imi ia raua. A faaroo noa ai au ia raua, ua hitimahuta marû noa vau i teie ohipa faahiahia, oia ho‘i, te paraparau ohie ra vau i te reo farani e te taa ohie atoa nei ho‘i no te tamarû i teie e piti tamarii.
« Ua mo‘e to raua na metua e ua hinaaro raua ia tia‘i ia raua i piha‘i iho i te pereoo », ua faataa’tu vau i teie taata hoo. Ua parau mai te piti i te i‘oa o to’na na metua, o ta’u ïa i horo‘a i te taata hoo ia tuôhia mai raua. Te tahi rii noa minuti i muri mai, ua ite teie na tamaroa i to raua metua tane i te haereraa mai i rapae i te fare toa ma te horo mai ia raua ra.
A apee noa ai au i teie tamaroa i to’na ra metua tane, aita faahou i roaa ia’u ia paraparau i te reo farani, no te parau noa’tu a parahi. Ua tamata noa vau i te parau i te hoê mea e taa mai na tamaroa, aita râ i matara mai maori râ te tahi rii noa mau parau ûû. E no reira, ua na roto atu vau i te reo peretane no te parau i teie tamaroa, « A parahi, ua oaoa vau i te farereiraa ia oe ».
E i to’u vaiihoraa i teie na tamaroa e to raua na metua, ua î roa to’u aau i te mauruuru. Ua ohipa te Metua i te Ao ra na roto ia’u no te tamahanahana e piti o Ta’na mau tamarii rii. Ua tupu mai te mana‘o haehaa no te faarahiraa te Fatu i to’u aravihi iti no te rave-faaoti-raa i Ta’na opuaraa. Ua mauruuru vau i te iteraa i te mea e nehenehe e tupu a pûpû ai tatou ia tatou iho Ia’na i te taime a piihia ai, noa’tu te huru o te vahi.