« Hinaaro vau ia Oe »

I te pô o te mahana i muri mai, ua tae maua i te fare o te tamaiti, ua ineine no te haapii atu. Ua maere maua i te iteraa e ua hinaaro atoa o Pak Mi-Jung e ia haapii maua i ta’na tamahine, ia Kong Su-Jin. E no te mea ho‘i e taata êê maua i roto i to’na fare, ua hinaaro o Pak Mi-Jung e amui mai no te mau haapiiraa. Oia mau, ua oaoa roa maua ia haapii e rave rahi feia o te hinaaro e faaroo.

I muri mai, ua opere mai ratou i te tahi amuamuraa, ua parahi amui matou e ua haamata i te paraparau. Na mua‘e maua e haamata mau ai te haapiiraa, ua hinaaro o Pak Mi-Jung ia matau maitai ia maua, e ua parau mai ia maua i te huru o to’na utuafare. Ua faaite mai oia ia maua no ni‘a i te mau tamataraa e te mau fifi aita i maoro a‘e nei ta ratou i farii, oia to‘a te aroraa aita i maoro atoa a ta’na tamaiti e te ma‘i mariri ai taata. Ua manuïa ta’na tamaiti i te rapaauraa radiothérapie e ua ore te ma‘i mariri ai taata i teie nei, ua faaara mai râ te mau taote e e nehenehe te ma‘i e ho‘i faahou mai i te hoê taime. Ua riro te reira mai te hoê faaararaa no te utuafare. E utuafare oraraa ha‘iha‘i to ratou, e ua rohi itoito te metua tane ia vai te hoê tafare i ni‘a i to ratou upoo e te maa i ni‘a i te amuraa maa.

Ua hitimahuta vau e ua oto no te mau tamataraa i roto i to ratou oraraa. Aita te oraraa i te mea ohie no ratou, e mea papû e mea fatata roa te utuafare o ta’u i ite i roto i te tahi atu utuafare o ta’u i farerei i Korea, o tei parau-rahi-hia i roto i te hoê sotaiete tei faatumu i ni‘a i te utuafare mai to Korea. Ua faaru‘e maua i to ratou fare i taua pô ra ma te matau maitai i teie utuafare taa ê e ma te rave‘a ia faaite atu i te mau parau poro‘i o te evanelia ia ratou.

Ua ho‘i faahou maua to’u hoa no te haapii e rave rahi taime i taua hepetoma ra, e i te mau taime atoa e tupu tamau noa te tamahanahana e te horo‘a maitai o ta maua i farii i te farereiraa matamua. A tae mai ai te tumu parau o te bapetizoraa, ua hinaaro roa na tamarii e amui mai i te Ekalesia. Teie râ, aita te metua vahine i amui mai i roto i to raua oaoa. Noa’tu ua tano te mau haapiiraa ia’na e ua ti‘aturi oia e parau mau te reira, aita oia e farii ra e e ti‘a ia’na ia rave e ia haapa‘o i te huru o te mau fafauraa e te amuiraa mai i te Ekaleisia e titauhia. Aita atoa oia e mana‘o nei e mea tano no’na ia bapetizohia aita to’na hoa faaipoipo, o ta maua e farerei atu. Teie râ, e hinaaro rahi to’na e tamau noa e farerei ia maua e ua hinaaro atoa e haere mai i te pureraa na muri i ta’na mau tamarii.

I te hopea o te piti o te hepetoma, no to maua tamau-noa-raa i te haapii i roto i to’na fare, ua farerei maua i to’na hoa faaipoipo, o Kong Kuk-Won—hoê taata haehaa, te peu maitai, e te horo‘a maitai. Ua amui mai oia no te tahi mau aparauraa hopea e ua ti‘aturi noa i te mau mea ta maua i haapii, oia’toa te tahi atu mau haapiiraa tumu e ite-noa-hia e mea fifi mai te tuhaa ahuru e te parau paari. Noa’tu to ratou rava‘i ore i te pae no te moni, ua haamata ratou i te aufau i te tuhaa ahuru. Te fifi rahi o te metua tane e rave oia i te ohipa i te sabati E ohipa oia i te tauraa manureva rahi no Seoul i te mau sabati atoa, no reira aita oia e nehenehe e haere i te pureraa e te toe‘a o to’na utuafare. Noa’tu ra ta’na tarena ohipa, ua faanaho oia e ta’na vahine faaipoipo no te haere i te bapetizoraa o ta raua na tamarii i te sabati i muri mai.

I muri mai i te bapetizoraa o te mau tamarii, ua tamau noa mau i te amui pinepine i roto i te fare o te utuafare. Ua haamau maua i te pô utuafare, ua horo‘a i te mau papa‘iraa mo‘a e te mau iteraa faaitoito, e ua faaite atu ia raua i te mau melo o te paroisa. Inaha, noa’tu te mau iteraa tamau o te evanelia, aita na metua i fatata mai no te bapetizoraa.

I roto i te tia‘iraa, ua tauihia to’u hoa, e to’u hoa apî o te hoê ïa misionare tei matara mai na roto i te pû haapiipiiraa misionare. E taata faaroo rahi, te itoito e te peepee, e e parau mau ua fifi rii au i te hoê taime i te faaearaa e o’na. I muri mai i te hoê farereiraa no te hoê taime poto e o Kong Kuk-Won e o Pak Mi-Jung, ua haafatata mai to’u hoa ia’u e ua ani mai e ua haapae anei to’u hoa tahito e o vau nei i te maa e o raua ê aore râ aita. Aita. Aita roa teie mana‘o i tupu ia’u No reira, ua farerei maua i te utuafare e ua ani i te hoê haapaeraa maa. Ua hitimahuta vau i te iteraa e ua haapae pinepine raua i te maa no raua iho, no te ea o ta raua tamaiti e no te taui i te tarena ohipa o te faati‘a ia Kong Kuk-Won ia haere i te pureraa. I muri iho, ua amui atu vau e to’u hoa ia raua i roto i te hoê haapaeraa maa, e ua pahonohia ta matou pure e ua tauihia te tarena ohipa a Kong Kuk-Won. Tera râ, aita ihoa o Pak Mi-Jung i hinaaro ia bapetizohia.

I reira, e mana‘o maramarama faahou to to’u hoa. Ua tatara mai oia i ta’na buka himene iti e ua ani mai e nehenehe anei maua e himene e o raua. Maoti to maua himene amuiraa e rave rahi taime, aita vau i ite na ia Pak Mi-Jung i te himeneraa, e ua mana‘o noa na e aita oia e au ia himene e aore râ haama rii no te mea e mea apî na’na te pehe. Ua ani to’u hoa ia’na e te vaira anei te hoê himene au-roa-hia e a’na, e mau to’u hitimahuta rahi, ua faaea rii oia e ua pahono mai oia e mai to’na tamariiriiraa, ta’na himene au roa oia ho‘i « Hinaaro vau ia oe » (Te mau himene, no. 50) Ua haamata matou i te himene na roto e maha tuhaa, na te metua tane e himene te pehe navenave, te metua vahine te auri alto, to’u hoa te auri marû teitei (tenor), e o vau te auri marû (bass).

E mea puai te Varua i roto i te piha. A himene ai matou te toru o te irava, ua î te metua vahine i te faaûruraa, e ua faaea to’na reo a tamau noa ai matou i te himene :

A faaoti ai matou te maha e te irava hopea, ua ta‘i oia. A tamata ai ta’na tane faaipoipo i te tamărû ia’na, i muri iho mai ua marû oia. Ua hi‘o afaro mai oia ia’u i roto i te mata e ua parau mai : « Hinaaro vau ia bapetizohia vau ».

Hōho’a

drawing of woman holding an Asian hymnbook

Ua riro te oro‘a bapetizoraa o Kong Kuk-Won e i Pak Mi-Jung i taua sabati avatea ra ei hoê o te pae varua rahi o ta’u misioni. Ua amui mai ta raua na tamarii i roto i te faanahoraa, e e rave rahi melo o te fenua iho tei haere mai no te faaite i to ratou paturu i te utuafare faafariu apî i roto i ta ratou paroisa. Ua faatupu maua to’u hoa i te hoê himeneraa taa ê : « Hinaaro Vau ia Oe ».

Oia mau, ua hope ta’u misioni, e ua ho‘i i te fare. I muri mai hoê matahiti i te fare haapiiraa teitei, ua ho‘i atu vau i Korea no te hoê haapiipiiraa i te tau mahanahana, e i te hepetoma atoa e rave au i te hoê taime no te hahaere e rave rahi mau hoa e mau utuafare o ta’u i farerei i roto i ta’u misioni. I muri mai te tahi tau hepetoma, ua ho‘i faahou mai au na ni‘a i te puromu no Balsan e ua farerei i taua utuafare taa ê ra. I te taeraa’tu i te fare, ua ite atu vau e te mo‘e ra hoê taata—ta raua tamaiti. Ma te roi mata, ua faaite mai o Pak Mi-Jung i te parau apî ia’u, ua ho‘i faahou mai te ma‘i mariri ai taata o ta raua tamaiti e, i te 14raa o to’na matahiti, ua pau oia i te aroraa.

Ua tamata vau i te faaite i to’u aroha e te oto atoa o ta’u i farii, ua haapapû mai o Kong Kuk-Won ia’u e eiaha e haapeapea. Ua here ratou i te evanelia, ua haere i te pureraa ma te haapa‘o maitai, e te tia‘i nei i te mahana e taatihia ai to ratou utuafae no te oraraa a muri atu i roto i te hiero no Seoul, i te fenua Korea. Noa’tu te oto o ta ratou i farii, ua ite te utuafare e e farerei faahou ratou ia Kong Sung-Gyun e e tahoê faahou ratou. Ua parau atoa mai o Pak Mi-Jung e ua tauturu te himene o te buka himene ia farii i te puai no te faaruru e ia ite i te hau ta te Varua e hopoi mai.

A faaru‘e ai au i to ratou fare, ua feruri faahou vau i ni‘a i te mau paraparau o te himene au-roa-hia e Pak Mi-Jung. Ua mauruuru roa vau e ua haamaitai te Metua i te Ao ra i te utuafare i te hau i muri mai i te poheraa o Kong Sung-Gyun, e ua mauruuru rahi roa vau no te ohipa ta te Varua i rave no te faafariuraa o Pak Mi-Jung, o tei faati‘a i te utuafare ia faataahia no te mau haamaitairaa mure ore o te hiero.