Pureraa Pô Utuafare—E nehenehe ta tatou ia na reira !

Noa’tu te huru o to tatou utuafare, e nehenehe te pureraa pô utuafare e haamaitai e e faaitoito ia outou.

Hōho’a

composite of older photo and paint brushes with paint on them.

Te mau hoho‘a aamu i faati‘a e Brigham Young University ; hoho‘a peni na iStock/Thinkstock

Ua ho‘i te hoê metua tane i te fare ma te rohirohi, i muri mai i te hoê mahana ohipa roroa, e ua ite atu i te toe‘a o to’na utuafare i roto i te fifi ma te mana‘o anaanatae ore. E pô monire teie, e e au ra e mea fifi rii no te haamau i te pureraa pô utuafare. I muri mai i te parauraa i te hoê pure tauturu, ua faaoti te metua tane e te metua vahine e tape‘a noa te mau mea ohie. Ua pii i to raua utuafare ia amui mai, ua himene e ua pure amui. Ua horo‘a raua i te melo tata‘itahi i te hoê mori hinu iti ama a parau ai ratou no ni‘a i te hoê ohipa tei faaûru ia ratou aita i maoro a‘e nei. I roto i te hoê piha pouri, faaauhia te maramarama o te mau mori hinu i te faaûruraa e ua rotahi te ara maitai o te mau tamarii. A faaitehia’i te mau iteraa papû, ua tomo mai i roto i te fare te hoê putapuraa o te aau no te hau marû e te here. I te hopea, ua mauruuru rahi te utuafare i to ratou haamauraa i te pô pureraa utuafare.

Ua ite anei outou e ua riro te pureraa pô utuafare ei hoê faanahoraa na te Ekalesia e 100 matahiti i teie nei ? I te ava‘e eperera 1915, ua faaue te Peresideniraa Matamua i te mau melo ia faataa i te hoê pô i te mau hepetoma atoa no te pureraa utuafare, te pehe, te haapiiraa evanelia e te mau faaoaoaoraa. (Hi‘o api 80 no te hoê tuhaa o te rata a te Peresideniraa Matamua). Ua tamau noa te mau peropheta i te faahaamana‘o mai ia tatou i te faufaa rahi no te pureraa pô utuafare. « Eiaha tatou e haapa‘o-ore i teie faanahoraa faauruhia », ua parau te peresideni Thomas S. Monson. « E hopoi mai te reira i te tupuraa pae varua o te melo tata‘itahi o te utuafare, ma te tauturu ia’na ia ti‘a atu i mua i te mau tamataraa e vai nei i te mau vai atoa ».¹

Teie te tahi mau huru raveraa ia tape‘a mai i roto i to tatou feruriraa a rave ai outou i te tuhaa pureraa pô utuafare i te hepetoma :

E tano te reira no’u. « Na te taato‘araa te pureraa pô utuafare », ua parau o Elder L. Tom Perry no te Pŭpŭ no te Tino Ahuru ma Piti Aposetolo.² Tatou paatoa—tei faaipoipo e aore râ tei otahi, ia te tamarii e aore râ aita—e nehenehe e horo‘a i te taime no te faaitoito i te utuafare e ia haapii i te evenelia.

E ti‘a ia’u ia ite mai te taime. Ua horo‘a mai te Ekalesia i te hi‘oraa ma te tape‘a mai i te pô monire aita e ohiparaa ta te Ekalesia E nehenehe outou e faaite i te Fatu e i to outou utuafare e ua ineine outou no te horo‘a i te taime no te tahi mea faufaa rahi roa.

E nehenehe au e ite mai eaha te ohipa na to’u utuafare. Mai te peu mea atea haere to outou utuafare, a tamata i te hoê « pureraa pô utuafare i ni‘a i te reni » no te paraparau e te mau melo o te utuafare na ni‘a i te itenati e aore te niuniu paraparau. Te rave ra anei te hoê taata i te ohipa maoro te pô? A haamau i te hoê « pureraa pô utuafare i roro i te vahi tape‘araa pereoo » i piha‘iho te vahi raveraa ohipa i te taime faafaaearaa. Ua haamau te hoê metua tane tei taa i to’na hoa i te hoê « pureraa pô utuafare ta rata » i te mau monire atoa, e papa‘i oia i ta’na mau tamarii e faaearaa i te atea.³ A vaiiho i te mau tafifiraa ia riro ei hoê tauiraa no te hoê imiraa rahi.

E nehenehe ta’u e haamata i teie hepetoma. E nehenehe te pureraa pô utuafare e faanahohia ia au i te mau hinaaro e te huru o to outou fare. Teie te tahi mau mana‘o rarahi :

Haamata e faaoti no roto i te pure.
Faaohipa i te pehe, oia’toa te mau himene e te mau himene a te Paraimere.
Haapii na roto mai i te mau papa‘iraa mo‘a e te mau peropheta no teie tau.
Tuu atoa te mau faaoaoaraa rau no te pae tino, te mau opuaraa tavini, e te mau faaoaoaraa faatumuhia i ni‘a te evanelia i tera hepetoma e tera hepetoma.
A arearea ! A hauti i te hoê hautiraa e aore râ a faatupu i te amuamuraa
Ia amui mai. Mai te peu e aita outou e nehenehe e rave i te monire, a imi i te hoê mahana ê atu e ti‘a ai.

E hinaaro vau te mau haamaitairaa. Ua fafau mai te mau peropheta e mai te peu e amui mai tatou i roto i te pureraa pô utuafare, te hopearaa o te mau haamaitairaa rarahi : E maraa mai te here e te haapa‘o i te fare. E tupu rahi te faaroo i roto i te aau o te feia apî. « E roaa i te mau utuafare te mana no te aro i te mau umeraa e te mau faahemaraa a te enemi » e haati ra ia ratou.⁴

Noa’tu e aita to outou pureraa pô utuafare i riro ei mau iteraa maitai a‘e i te mau taime atoa, e faaitoitohia e e haamaitaihia to outou utuafare na roto i ta outou mau tautooraa. « Ua riro te pô utuafare tata‘itahi mai te hoê potaa peni i ni‘a i te hoho‘a o to tatou varua », ua haapii mai o Elder David A. Bednar no te Pŭpŭ no te Tino Ahuru Ma Piti Aposetolo. « Aita hoê o te reia mau ohipa i riro ei ohipa nehenehe roa e te haamana‘o-maoro-hia. Tera râ… ia amuihia e horo‘a mai i te hoê hoho‘a nehenehe roa, oia atoa to tatou vai aueue-ore-noa-raa i te mau mea ha‘iha‘i, e arata‘i te reira ia taou i ni‘a i te mau mea pae varua faufaa rahi ».⁵