Аврагчийн аминч бус хийгээд ариун золиослол

Нэгэн удаа ерөнхийлөгч Марион Ж.Ромни надад хэлэхдээ “Та нарт ойлгуулахын тулд би хэлж байна гэж битгий хэлээрэй; харин та нар буруугаар ойлгохгүй байж болохын тулд би хэлж байна гэж хэлээрэй” гэсэн юм.

Нифай “Учир нь тодорхой байдалд бодгаль минь баяснам; өөрөөр хэлбэл энэ маягаар Их Эзэн Бурхан хүмүүний дунд ажил хийдэг болой” хэмээн хэлжээ (2 Нифай 31:3).

Иймээс анхааралтай сонсоорой! Би үүнийг ярихаар дуудагдаж, үүрэг авсан мэт тодорхой ярих болно.

Та нар дайсан байдаг гэдгийг мэддэг. Судар түүнийг: “Чөтгөр болох, худал бүгдийн эцэг болох тэр, бүр хөгшин могой” мэтээр дүрсэлсэн байдаг (2 Нифай 2:18). Тэр эхлэлээс хөөгдсөн (С ба Г 29:36–38) бөгөөд мөнх бус бие хүлээн авах боломжоо алдсан юм. Тэрээр “аз жаргалын агуу төлөвлөгөөнд” (Алма 42:8) саад болохоор амласан бөгөөд бүх зөв шударгын дайсан болсон билээ. Тэрээр гэр бүлүүд рүү хамгийн их дайрч, давшилдаг.

Та нар порнограф дэлхий даяар газар авч байгаа үед амьдарч байна. Үүнээс зугтахад хэцүү. Амьдралыг бий болгогч та нарын тэрхүү хүчинд порнограф анхаарлаа хандуулж байна.

Порнографыг үзэх нь асуудал бэрхшээл, гэр бүл салалт, өвчин зовлонд болон бусад олон хор уршиг руу хөтөлдөг. Порнографт ямар ч сайн зүйл байдаггүй. Үүнийг үзэх, цуглуулах, авч явах нь хорт могойг үүргэвчиндээ хийгээд авч яваатай адил юм. Энэ нь чамайг хорт могойн үхлийн хатгалт адил, зугтах аргагүй сүнслэг доройтолд оруулдаг. Дэлхийн хаа сайгүй порнографтай холбоотой хэвлэл мэдээлэл байгаа учраас та нар үүний аймшигт хор уршгийг сайн ойлголгүйгээр үзэж, уншсан байж болно. Хэрэв тэгсэн бол би таныг зогсохыг анхааруулж байна. Яг одоо боль!

Мормоны Ном “хүмүүн нь тэд сайныг муугаас ялгаж мэдэхээр хангалттай зааварлагдсан буюу” хэмээн заадаг (2 Нифай 2:5). Энэ хүмүүсийн тоонд та ч мөн орж байгаа. Та юу буруу, юу зөвийг мэдэж байгаа. Буруу гэж бодож байгаа зүйлээ хийхгүйн тулд болгоомжтой байгаарай.

Ихэнх алдааг Их Эзэнд хувиараа хүлээж болдог ч гэсэн зарим гэм нүглээс уучлагдахын тулд илүү их зүйлийг хийх шаардлагатай байдаг. Хэрэв та ноцтой гэм нүгэл үйлдсэн бол бишоптойгоо уулзах ёстой. Хэрэв энэ нь ноцтой бус бол чимээгүй хийгээд хувийн гэмшил, наманчлал хангалттай. Өршөөлийн агуу өглөө нь нэг дор ирдэггүйг сана. Хэрэв эхний удаад бүдэрсэн бол битгий бууж өгөөрэй. Сэтгэл гутралыг даван туулах нь сорилтын нэг хэсэг юм. Бүү шантар. Би та нарт урьд нь хэлсэнчлэн, хэрэв та гэм нүглээ хүлээж, орхисон бол битгий эргэж хараарай.

Их Эзэн үргэлж бидний дэргэд байдаг. Хэрэв та Түүнийг Гэтэлгэгчээ гэж хүлээн зөвшөөрөх болбол Тэр таны төлөө зовж шаналан, шийтгэлийг нөхөн төлсөн.

Мөнх бус хүмүүний хувьд бид Тэр цагаатгагч золиослолыг хэрхэн хийснийг бүрэн дүүрэн ойлгохгүй. Гэхдээ одоохондоо Түүний хэрхэн зовж шаналсан нь Түүний яагаад зовж шаналсантай адил чухал биш байна. Яагаад Тэр таны төлөө, миний төлөө мөн бүх хүн төрөлхтний төлөө үүнийг хийсэн юм бол? Тэр үүнийг Бурхан Эцэг болон бүх хүн төрөлхтнийг хайрлах хайрын төлөө хийсэн. Нөхдийнхөө төлөө амиа зориулахаас өөр агуу хайр байхгүй” (Иохан 15:13).

Христ Гетсеманид залбирахаар төлөөлөгчдөө орхин явдаг. Гетсеманид юу ч болсон байлаа гэсэн, энэ нь бидний ойлголтоос хэтэрсэн зүйл юм! Гэхдээ бид Түүнийг Цагаатгал хийсэн гэдгийг мэддэг. Тэрээр бүх дэлхийн алдаа, нүгэл, гэм буруу, эргэлзээ, айдсыг Өөр дээрээ авахад бэлэн байсан. Биднийг зовж шаналахгүй байхын тулд Тэрээр бидний өмнөөс зовж шаналсан юм. Маш олон хүн зовлон шаналлыг амсаж, аймшигт үхлээр үхсэн байдаг ч Түүний зовлон шаналалтай харьцуулшгүй юм.

Би амьдралдаа бие өвдөх гэж юу болохыг амссан бөгөөд энэ нь тийм ч амар зүйл биш! Хэн ч зовлон шаналлыг туулалгүйгээр энэ дэлхийгээс халин оддоггүй. Гэвч миний тэвчиж чаддаггүй ганцхан зовлон бол би хэн нэгний зовох шалтгаан боллоо гэдгээ мэдэх тэр үе байдаг юм. Ийнхүү би Аврагчийн Гетсеманий цэцэрлэгт амссан зовлонгоос өчүүхэн ч гэсэн мэдэрдэг.

Түүний туулсан зовлон шаналал хүн төрөлхтний зовлон шаналлаас өөр юм. Учир нь Тэрээр хүн төрөлхтний бүхий л шийтгэл, үр дагаврыг өөр дээрээ авсан билээ. Төсөөлөөд үз дээ! Түүнд төлөх ёстой өр байгаагүй. Тэрээр ямар ч буруу зүйл үйлдээгүй. Гэсэн хэдий ч Тэр бидний мэдэх бүх гэм нүгэл, гуниг харуусал, өвчин зовлон, ичгүүр, биеийн болон оюун ухааны бүх зовлонг туулсан. Бүх цаг үеийн хүн төрөлхтний түүхэнд бүх хүмүүний нүглийг цагаатгаж, тэдний өвчин зовлонг тэвчих ганц л гэм нүгэлгүй хүн байсан юм.

Тэр Өөрийнхөө амьдралыг золиослоход бэлэн байсан бөгөөд “Дэлхийн нүглийг өөр дээрээ авагч нь би билээ” хэмээн хэлсэн билээ (Мозая 26:23). Тэр цовдлогдож, нас барсан. Тэд Түүний амийг авч чадахгүй байв. Тэр өөрөө үхэхийг сонгосон юм.

Хэрэв та унаж, алдагдсан бол, хэрэв та боолчлолд орсноо ухаарсан бол итгэлтэй урагшилж, дэлхийд битгий дахин хэрэн тэнүүчлээрэй. Таныг амар амгалан, аюулгүй газар руу хөтлөх хүмүүс үргэлж байдаг юм шүү. Сударт амласанчлан, Бурханы ач ивээл “хийж чадах бүхнээ” хийсний дараа л ирдэг юм (2 Нифай 25:23). Энэ нь боломжтой гэдгийг мэдэх нь хамгийн үнэ цэнэтэй үнэн билээ.

Өршөөлийн цэлмэг өглөө ирнэ гэдгийг би амлаж байна. Тэгээд “бүх оюун ухаанаас дээгүүрх Бурханы амар тайван” (Филиппой 4:7) таны амьдралд дахин нэг удаа яг л нарны цацраг мэт ирж, Тэрээр “та нарын нүглийг дахин санахгүй” (Иеремиа 31:34). Харин та хэрхэн мэдэж болох вэ? Та мэдэх болно! (Moзая 4:1–3-ыг үзнэ үү.)

Хүнд нөхцөл байдалд байгаа та нарт заахаар ирсэн нь миний зорилго юм. Тэрээр ирж, таны шийдвэрлэж чадахгүй байгаа асуудлыг шийдэх болно. Харин та төлбөрийг нь төлөх ёстой. Та төлбөрийг төлөхгүйгээр энэ нь улиран тохиохгүй. Тэр шаардлагатай бүх төлбөрийг төлдөг үнэхээр эелдэг захирагч юм. Гэвч Тэрээр та нарыг энэ нь бүр хэцүү байсан ч хийх ёстой зүйлсээ хийгээсэй гэж хүсдэг.

Би Их Эзэнд хайртай, мөн Түүнийг илгээсэн Эцэгт хайртай. Бидний гуниг гутрал, нүгэл, гэм буруу Түүний өмнө авчрагдаж, Түүний гайхамшигт нөхцөлийн дагуу бүх өр зээл “бүрэн төлөгдсөн” гэж тэмдэглэгдэх боломжтой.

“Нааш ир, Хамт хэлэлцье гэж Их Эзэн айлдаж байна: Та нарын нүглүүд час улаан мэт боловч цас шиг цагаан болно; Тэдгээр нь хүрэн улаан боловч ноос шиг болох болно.” Исаиа үргэлжлүүлэн “хэрэв та нар зөвшөөрч, дуулгавартай дагавал” (Исаиа 1:18–19) хэмээн хэлсэн.

“Насны залууд мэргэн ухаанд суралц; тийм ээ, насны залууд Бурханы зарлигуудыг дагаж сурагтун” (Алма 37:35) гэх судар нь амар амгаланг, мөн дайснаас хамгаалах хүчийг амладаг урилга билээ. “Хэн ч чамайг залуу хүн хэмээн дорд бүү үзэг. Харин чи итгэгч хүмүүст үг, зан байдал, хайр, итгэл хийгээд цэвэр ариун байдлаараа үлгэр дуурайл бол” (1 Тимот 4:12).

Амьдралд чинь бүх зүйл санаснаар чинь болно гэж бүү бодоорой. Бүр хийх ёстой зүйлээ хийж байхад хүртэл амьдрал хэцүү байх үе тохиолдоно. Амьдралын сорилт шалгуур бүртэй өөдрөгөөр, мөн итгэлтэйгээр нүүр тул, тэгвэл та амар амгалан, өнөөдөр болон ирээдүйд таныг дэмжих итгэлтэй байх болно.

Хүсэн хүлээсэн адислалуудаа хараахан авч амжаагүй байгаа, мөн амьдралд нь хоосон орон зай эзэгнэж, хэрэгтэй бүхнээ хүлээж аваагүй хүмүүст хандаж, би итгэлтэй тэдэнд аврал, гэтэлгэлд шаардлагатай бүх туршлага, боломжууд ирэх болно гэж баттай хэлмээр байна. Зөв зохистой хэвээр бай; итгэл найдвартай, тэвчээртэй, залбиралтай бай. Бүх зүйлд гарах арга зам байдаг. Ариун Сүнсний бэлэг таныг удирдаж, үйлдлийг чинь чиглүүлэх болно.

Хэрэв та хийсэн алдааныхаа үр уршгаас болж гэм буруу, гуниг зовлон эсвэл хүлээж авч чадаагүй адислалаасаа болж шаналж байгаа бол “Come unto Jesus” дуулалд гарах зааврыг уншаарай.

Би төлөөлөгч ах нарынхаа хамт Их Эзэн Есүс Христийн онцгой гэрчүүд билээ. Би Түүний ариун нандин золиослолын цэвэршүүлэгч үр нөлөөг бодох бүрд энэхүү гэрчлэл дахин батлагддаг юм. Миний гэрчлэл, мөн миний ах нарын гэрчлэл үнэн юм. Бид Их Эзэнийг мэднэ. Тэрээр Өөрийн бошиглогч, үзмэрч, илчлэгчдэд харь хүн биш.

Та нар төгс биш ч, тэр замаа даган явж байгааг би ойлгож байна. Зоригтой байгаарай. Бие махбодтай ямар ч хүн бие махбодгүй тэдгээрийг давах хүчтэй гэдгийг мэд.² Сатан бие махбодоос татгалзсан юм; хэрэв та хэзээ нэгэн цагт уруу таталттай нүүр тулах бол, хэрэв та Адам, Ева хоёрт Едений цэцэрлэгт өгөгдсөн, өнөөг хүртэл үе уламжлан ирсэн сонгох эрхийг ашиглах аваас уруу таталтыг ялах болно.

Хэрэв та найдвараар урагш харж, Их Эзэний хийгээсэй гэж хүсэж байгаа зүйлийг хийх хүсэлтэй байвал танаас хүсэн хүлээж байгаа бүх зүйл тэр билээ.