“Би өөртөө тохиолдсон асуудал, санаа зовоосон зүйлийнхээ талаар бишоптойгоо ярилцахын тулд хэрхэн тайван байж болох вэ?”

Танай тойргийн бишопт наманчлалын үе шатуудаар дамжуулан чамайг удирдах эрх мэдэл өгөгдсөн билээ. Заримдаа бишоп дээрээ очих нь чиний хувьд Аврагчаар дамжуулан бүрэн наманчилж болох цорын ганц арга зам байдаг. Намайг бишоптойгоо ярилцах үед тэр Аврагчийг олоход, бас амьдралдаа тохиолдсон хамгийн гүн шархыг даван туулахад надад тусалсан юм. Бишоп тань чамд туслахыг хүсдэг. Түүний дуудлага бол та нарт санаа тавих бөгөөд түүнтэй уулзах шаардлагатай болсон шалтгаанаас тань болж тэр чамайг муугаар бодохгүй.

Ярилцахад надад эвгүй байдаг байсан ч асуудлуудаа шийдвэрлэхэд минь бишоп туслахад үргэлж бэлэн байдгийг би сүүлд ойлгосон юм. Бишопдоо итгэ; Тэр хоньчин бөгөөд тойрог бол түүний хонин сүрэг юм.

Бишоп бол өсвөр үеийнхний тусламж хүсэж болох хамгийн итгэл даахуйц насанд хүрсэн хүн юм гэдгийг би мэдэж авсан. Тэр та нарын итгэлийг хэзээ ч хөсөрдүүлэхгүй бөгөөд түүнтэй хуваалцсан бүх зүйл тань түүний өрөөнд үлдэх болно. Заримдаа асуудлуудынхаа талаар ярихад үнэхээр хэцүү байж болох ч та нарыг хайрлаж, санаа тавьж, та нарт хамгийн сайн сайхныг хүсдэг хэн нэгэнтэй нүүр тулан ярилцах нь үүнийг илүү амархан болгодог.

Бишоп эсвэл салбарын ерөнхийлөгч тань Их Эзэний үнэнч үйлчлэгч мөн. Та нар Ариун Сүнснээс болон судруудаас илчлэлт эрэлхийлэх үедээ түүний удирдамжинд найдаж болно. Бишоп нь та нарт туслахын тулд байдаг бөгөөд тэрээр Бурханаар удирдагддаг гэдгийг та нар ойлгох ёстой.

Бишоптойгоо үнэхээр ярилцахыг хүсэж байгаа ямар нэг зүйл чамд байгаа бол эхлээд сургуулийнхаа талаар, бас бусад ерөнхий зүйлийн талаар түүнтэй ярилцах нь илүү хялбар байж болох юм. Түүнтэй наманчлалын асуудлаар ярилцах хэрэгтэй байгаа учраас сандарч байгаа бол зүгээр л тэр чамд хайртай гэдгийг сана. Тэр чиний талаар юу гэж бодох бол гэж санаа зовох хэрэггүй. Учир нь Христтэй илүү ойр байхыг хүсдэг атлаа тэр чамайг яагаад дорд үзэх билээ?

Бишоптойгоо ярилцахад чамд яагаад эвгүй санагдаж байгааг өөрөөсөө асуу. Асуудлуудаа шийдвэрлэхэд чинь тэр чамд туслах боломжгүй гэж чи бодож байна уу? Бишоп чинь чамд хайртай бөгөөд тэр чамд туслахын тулд дуудагдсан гэдгийг мэдэхийн тулд залбир.

Бишоптоо нүглээ хүлээх нь хэцүү бөгөөд ичмээр байж болох ч, түүний өрөөнөөс гарч явах үед чи тайвширснаа, мөн Тэнгэрлэг Эцэг чамд хайртайг мэдэх болно. Чи алдаа гаргасан ч, Тэр чамайг жаргалтай байгаасай гэж хүсдэг.

Бишоп нь танай тойргийн хоньчин юм. Тэр та нарт туслахын тулд чадах бүхнээ хийх бөгөөд Бурханы хүч түүний талд байгаа гэдгийг сана. Хэрэв чи айж байвал бишоптойгоо ярилцах боломжтой болох хүч чадлын төлөө залбирч болно. Эцэст нь чи түүнтэй уулзахаар явсандаа баяртай байх болно. Мөн энэ нь үнэ цэнэтэй зүйл байх болно.