Nahea i te faatupu i to tatou paari

I teie tau no te haaparareraa parau mai te hoê vave‘a te huru, titau-roa-hia te paari—te paari no te ma‘itiiti e no te haro‘aro‘a nahea i te faa‘ohipa i te mau mea ta tatou e apo nei.

E haamana‘o na tatou :

1. E ti‘a ia tatou ia imi i te paari.

2. Ua rau te huru o te paari e ua rau to’na faito e to’na ‘u ia tae mai te reira.

3. Ia oioi te paari i te apohia mai, e rahi roa’toa mai te mau haamaitairaa.

4. Te paari no te hoê ohipa, eita paha e nehenehe e faa‘ohipa no te tahi atu.

5. Te paari o te ao, noa’tu to’na faufaa rahi i roto i te mau mea e rave rahi, e rahi atu â te reira ia aurarohia ma te haehaa i te paari o te Atua.

E piti huru paari ta te papa‘iraa mo‘a e faataa nei : te paari o te ao e te paari o te Atua. Toopiti pae to te paari o te ao, te pae maitai e te pae ino. I to’na faito poiri roa a‘e, e nehenehe te reira ia parauhia ei afa parau mau, tei ano‘i-maramarama-hia e tei faanahonahohia no te rave-faaoti-raa i te tahi opuaraa pipiri e te ino.

Te vai atoa nei te tahi huru paari o te ao e ere i te mea ino roa. E e ti‘a roa ia parau e, e mea maitai. E imi-papû-hia te reira paari na roto i te tuatapaparaa, te feruriraa, te hi‘oraa e te ohipa papû. E mea faufaa rahi e te au roa no te mea ta tatou e rave nei. No te taata maitai e te au, e tae mai te reira a ratere ai oia i roto i te tahuti nei.

E hau roa’tu, e ti‘a i teie paari haamanuia taata i roto i te ao ia farii i te otohe i muri mai i te paari o te Atua ma te ore e mana‘o e, e nehenehe ta’na ia mono i te reira.

Aita pauroa te paari i hamani-aifaito-hia. E ti‘a ia tatou ia haapii e, ia tupu noa’tu te titoraa i rotopu i te paari o te ao e te paari o te Atua, ia auraro to tatou hinaaro i raro a‘e i te paari o te Atua e ti‘a’i.

Teie to’u mana‘o ia outou, ia rave outou i te mau fifi i mua ia outou. E huti i te hoê reni i ropu, i ni‘a i te hoê papie. E tapura i te paari o te ao i te pae aui e te paari o te Atua i te pae atau. E papa‘i i te mau fifi e faatito ra i te tahi e te tahi o te pae.

E aha te mau ma‘itiraa ta outou e rave nei ?

I roto i te tufaa 45 o Te Parau Haapiiraan te Mau Parau Fafau, te parauhia nei no te mau ohipa e tupu e tae roa i te Tae-piti-raa mai o te Faaora, e te faati‘a faahou nei te Fatu i te aamu o na paretenia e ahuru ma te faaoti na roto i teie mau parau : « No te mea o ratou o tei paari e ua farii ho‘i i te parau mau, e ua rave ho‘i i te Varua Mo‘a ei arata‘i no ratou ra, e aita ho‘i ratou e haavarehia—oia mau ta’u e parau atu ia outou na e ore roa ratou a tapuhia i raro e e hurihia i roto i te auahi, e faaoromai râ ratou i te reira mahana » (hi‘o PH&PF 45:57).

E mata na tatou ia imi i te paari o te Atua. E rave rahi ta tatou e nehenehe e haapii tano mai no ni‘a i te paari i teie nei. Te parau fafau nei au ia outou e, e tae mai te mau haamaitairaa o te Fatu ia outou a imi ai outou i te paari, te paari o te Atua. Te tia‘i ananatae nei ho‘i Oia ia horo‘a mai i To’na paari ia tatou nei. E ia haapa‘o tatou, ia pure tatou e ia imi tatou i te reira, e tae mai te reira.