Hoê nana e hoê tia‘i mamoe

Ua riro te te hoho‘a no te ‘aua o te nana ei haapiiraa i te parau no te aupururaa o te Faaora i To’na mau taata.

Te ‘aua mamoe i tahito ra

Te raau ta‘iri

Tia‘i mamoe

Te patu ofa‘i

Te uputa

Te mamoe

Te maa

Te raau a te tia‘i mamoe

E aha te reira : E ‘aua patu ohie noa.

Te fa : No te paruru i te nana mamoe i mua i te animara taehae e te taata ‘eia, i te po ihoa râ.

Te materia no te paturaa : E ofa‘i, e i te rahiraa taime, e tuuhia te tahi raau taratara na ni‘a roa. E rave-pinepine-atoa-hia te raau taratara no te hamani i te tahi ‘aua taime poto no te nana. I te tahi taime, e faa‘ohipahia te mau ana ei ‘aua mamoe, e tuuhia te tahi ofa‘i e aore râ te tahi raau taratara no te paruru i te tomoraa.

Te mau ohipa i tupu i roto i te Bibilia

E mea faufaa roa te mamoe no to’na ‘i‘o, te û, te hinu, to’na huruhuru, te iri e to’na tara, e ua riro atoa te mamoe ei animara matamua no te faatusiaraa.
I te fenua no Iseraela, teie te mau animara taehae e ‘ou‘ou i te mamoe, te luto, te hyène, te panthère e te uri teni (chacal). I te tau tahito ra, e ite-atoa-hia te liona e te bea na tera mau vahi (hi‘o 1 Samuela 17:33–37).
E faa‘ohipa te tia‘i mamoe i ta’na raau no te arata‘i i te mamoe e te raau ta‘iri e te maa no te paruru ia ratou.
Ia ao, e arata‘i te tia‘i mamoe i ta’na mamoe i te vahi maa e te pape (hi‘o Salamo 23:1–2) e ia pô, e faho‘i oia ia ratou i te ‘aua. Ei reira te tia‘i mamoe e tai‘o ai ia ratou a ho‘i ai, e ia mo‘e noa’tu te tahi, e haere oia e imi ia’na. E ia oti, e tarava oia i mua i te uputa no te paruru ia ratou.
Ua pii Iesu Mesia Ia’na iho te Tia‘i mamoe maitai (hi‘o Ioane 10:11–15) no te mea ua horo‘a Oia i To’na ora no tatou. Ua faaau atoa Oia Ia’na ei uputa no te ‘aua (hi‘o Ioane 10:1–9) i te mea ho‘i e mea na roto ia’na tatou e farii ai i te maa pae varua, te tau faafaearaa, te hau, te faaoraraa e te faateiteiraa.
Ua faaau te aposetolo Paulo i te Ekalesia i te nana mamoe (hi‘o Te Ohipa 20:28).

E aha te nehenehe e haapii mai :

O te mau ‘aua :

Te mau vahi e haaputuputu ai te nana. Ei melo no te Ekalesia, e taamuraa no te hoêraa ta tatou no to tatou faaroo e ta tatou mau fafauraa, e te haaputuputu atoa nei ho‘i tatou. Ua haapii mai te peresideni Henry B. Eyring, tauturu matamua i roto i te Peresideniraa Matamua : « Te oaoa no te hoêraa [ta te Metua i te Ao ra] e hinaaro rahi e horo‘a mai no tatou, e ere ïa no te taata otahi. Ua titauhia ia tatou ia imi i te reira e ia farii i te reira ma te amui ia vetahi ê. No reira, e ere i te mea maere ia faaitoito mai te Atua ia tatou ia amui tahi, i reira ho‘i e ti‘a ai Ia’na ia haamaitai ia tatou. Ua hinaaro oia ia tatou ia amui i roto i te utuafare. Ua haamau Oia i te mau piha haapiiraa, te mau paroita, e te mau amaa, e ua faaue ia tatou ia haaputuputu pinepine. Tei roto i te reira mau haaputuputuraa… E nehenehe ta tatou e pure e e haa no te hoêraa o te horo‘a mai i te oaoa ia tatou, e o te faarahi i to tatou puai no te taviniraa » (« Ia amui-tahi-hia to tatou aau ei hoê », Liahona, Novema 8, 69).

E vahi no te haapuraa e te faafaaearaa. I roto ia Iesu Mesia « e noaa ho‘i te ora i to [tatou nei] varua » (Mataio 11:29). Ua riro Ta’na Ekalesia ei « parururaa, e ei vahi haapuraa » (PH&PF 115:6). E mai ta te peresideni Boyd K. Packer, peresideni no te Pŭpŭ no te Tino Ahuru Ma Piti Aposetolo, i haapii, « E paruru e e hau ta tatou e ite mai… na roto i te haapa‘oraa i te mau fafauraa ua rave tatou e na roto i te oraraa i te faito o te mau ohipa rii mâtau no te haapa‘o i te mau ture, te mau ohipa titauhia i te feia pee i te Mesia ».(« Teie mau mea ta’u i ite » Liahona, Me 2013, 7).

Tia‘ihia na te tia‘i mamoe. O Iesu Mesia te Tia‘i mamoe maitai o te faaora ia tatou. Ua mamae Oia e ua pohe ho‘i ia upooti‘a tatou i te hara e te pohe e ia ho‘i tatou i to tatou ra Metua i te Ao ra. A haere ai tatou i te Mesia ra e a haapa‘o noa ai tatou i Ta’na mau faaueraa, e haamaitai, e arata‘i e e paruru Oia ia tatou, ei taata hoê e ei taata No’na.