Hōho’a

illustration of firefighters

Faahoho‘araa na Julia Yellow

E mahana hau noa tera mahana, e ere te tupoheraa auahi ta’u toro‘a tamau, ua tapa‘o râ vau ia’u no tera mahana, e ua faaoti atura e tai‘o i te Buka a Moromona. I te iteraa mai te tahi hoa ohipa e, te tai‘o ra vau, ua ui mai oia e, ua ite anei au nahea i te tuu i te haana tama‘i a te Atua i teie mau tau apî. E te paraparau ra maua, ta‘i mai nei te oe. E auahi i tera fare toa fatata noa.

Ua oomo oioi maua i to maua ahu paruru auahi e afaro atura i ô. Ua puai roa te auahi, e i te tapiriraa’tu matou i te fare toa, paa‘ina a‘enei te tahi mea i ni‘a ia matou. Ua ati roa maua i te auahi. Ua taa ore rii maua to’u hoa ohipa i te tahi maa setoni no tera mea i paaina. Aua‘e râ to maua mauihaa e te ahu paruru, aita maua i pêpê rii a‘e.

I te ho‘iraa matou i te ‘aua, i te poheraa te auahi, ua ui au i to’u hoa ohipa, te haamana‘o ra anei oia i ta’na uiraa no ni‘a i te haana tama‘i a te Atua. Ua parau mai oia, e, e ua faataa atura vau e, mai te huru te haana tama‘i a te Atua i to matou ahu paruru auahi. E ti‘a noa ia matou ia ahu i te reira ia ti‘a ia matou ia pato‘i i te aroraa a te enemi. Ia haapa‘o tatou i te mau faaueraa, e riro tatou i te haamaitaihia i te mana paruru o te haana tama‘i a te Atua, e e riro mai te Varua Maitai ei arata‘i na tatou.

1 Samuela 16:7. « E ore ho‘i ta Iehova hi‘oraa e au i ta te taata ; e hi‘o ho‘i te taata i te huru i rapae au a‘e, are‘a o Iehova, e hi‘o ïa i te aau ».

Hou vau a tomo i roto i te Ekalesia, ua hi‘o noa vau ia’u ei taata noa e te aravihi taata. Ua mana‘o vau e, aita ta’u e faufaa e horo‘a atu. E mea taiâ na’u ia faa‘ite i te taata o vai au no to’u ri‘ari‘a e tuuhia vau i te hiti e mauiui noa ai. Ua mana‘o noa vau e, pauroa te mau taata ati a‘e ia’u, e mea puai a‘e e te maramarama a‘e e te maitai a‘e ia’u.

Ua taui râ te reira mau hi‘oraa i to’u riroraa ei melo no te Ekalesia a Iesu Mesia i te Feia Mo‘a i te Mau Mahana Hopea Nei. Ua haapii mai au e, e tamarii tatou na te Atua e te vai ra to tatou aravihi hanahana. Ua taa ia’u i teie nei e, aita e tata‘uraa no te hi‘o e, o vai te mea maramarama a‘e, te mea moni a‘e e te mea nehenehe a‘e. I mua i te mata o te Fatu, ua aifaito tatou, e tei Ia’na ra te faaotiraa—e ere i te huru to tatou hoho‘a pae tino, i te huru râ o to tatou haapa‘o e to tatou hinaaro ia pee i te e‘a Ta’na i tuu mai.

Hōho’a

illustration of men loading a truck

Faahoho‘araa na Julia Yellow

I te 15raa o to’u matahiti, ua farii au i te iteraa papû puai no te evanelia a Iesu Mesia e ua oaoa roa vau i te tomoraa i roto i te Ekalesia. I tera taime, te rave ra vau i te ohipa no te turu i te utuafare. Aita i maoro roa i muri iho i to’u bapetizoraa ua ere au i ta‘u ohipa.

Titauhia ia roaa faahou mai te tahi ohipa apî, inaha o vau tera e faaamu ra i to’u utuafare, ter vahi fifi râ, i roto i te mau ohipa atoa ta’u i ite, titauhia ia rave i te mahana sabati. Ua pato‘i au e rave rahi ohipa no te mea ua hinaaro roa vau ia haere i te pureraa i te mahana sabati (hi‘o PH&PF 59:9–10).

Ua ma‘iri e piti ava‘e imiraa, aita e ohipa. E ere to’u metua vahine i te melo no te Ekalesia, e noa’tu to’na ti‘aturiraa it e Atua, ua riri roa oia ia’u no to’u pato‘iraa e rave rahi ohipa.

I te hoê pô, ua hi‘o mai oia ia’u ma te roimata e ma te ani mai, « No te aha te Atua e vaiiho noa nei i teie mau mea ia tupu, te haapa‘o maitai nei ho‘i oe i te maitai »

Ua pahono atu vau, « Mama iti e, aita vau i ite no te aha teie mau mea e tupu nei i ni‘a ia tatou, ua ite râ vau e, te rave ra vau i te mea tano, e ua ite au e haamaitai mai te Atua ia tatou no te reira ».

I te po‘ipo‘i a‘e, ua faaau mai te tahi taata ia’u i te tahi tino moni rahi, ia haere au e piti mahana e faauta i te tahi mau tauihaa rahi mai te hoê fare i te tahi. E mea rohirohi te ohipa, atira noa’tu, i te fariiraa vau i te moni, ua horo afaro vau i te fare no te pûpû i te hoê pure haamauruuru. Aita i maoro roa, ua itehia mai ia’u te tahi ohipa e vata vau i te mahana sabati, e mai te reira mahana atu aita vau i ere i te ohipa.

Ua oaoa vau, ua ma‘iti au e haamo‘a noa i te mahana sabati ? E rave rahi tamataraa i roto i te oraraa, ua ite râ vau e, ia tutava noa tatou ma te vai puai noa i mua i te reira, e haamaitai mai te Fatu ia tatou.