Pōpoaki ʻa e Faiako ʻAʻahí
Ko e Ngaahi ʻUlungaanga Fakalangi ʻo Sīsū Kalaisí: Angamaʻá
Ako ʻi he faʻa lotu ʻa e fakamatala ko ʻení pea feinga ke ʻiloʻi ʻa e meʻa ke vahevahé. ʻE fakatupulaki fēfē ʻe he mahino kiate koe ʻa e ngaahi ʻulungaanga fakalangi ʻo Sīsū Kalaisí hoʻo tui kiate Iá mo tāpuekina ai ʻa kinautolu ʻokú ke tokangaʻi ʻi he faiako ʻaʻahí? Ke maʻu ha fakamatala lahi ange, ʻalu ki he reliefsociety.lds.org.
Tuí, Fāmilí, Fakafiemālié
“Tuku ke ngaohi ke fakaʻofoʻofa maʻu ai pē ʻe he angamaʻá ʻa hoʻo ngaahi fakakaukaú; pea ʻe ʻāsili mālohi ʻa hoʻo falalá ʻi he ʻao ʻo e ʻOtuá; pea ko e tokāteline ʻo e lakanga fakataulaʻeikí ʻe mokulu ia ki ho laumālié ʻo hangē ko e ngaahi hahau mei he langí” (T&F 121:45).
Ko e hā ʻa e angamaʻa? Naʻe pehē ʻe Palesiteni Sēmisi E. Fausi (1920–2007): “Ko hono ʻuhinga kakato ʻo e Angatonú ko e angamāʻoniʻoni kotoa pē ʻokú ne tokoni ke fakafuo hotau ʻulungāngá.”1 Naʻe tānaki atu ʻe Palesiteni Kōtoni B. Hingikelī (1910–2008) ʻo pehē: “Ko e ʻofa ʻa e ʻOtuá e aka ʻo e angatonu kotoa pē, lelei kotoa pē pea mo e mālohi kotoa ʻo e ʻulungāngá.”2
Naʻe lea ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo kau ki he fehokotaki ʻa e fefiné mo e angatonú: “ʻOku ʻomi ʻe he kakai fefiné ki he māmaní ha faʻahinga ʻulungaanga fisifisimuʻa makehe, ko ha meʻafoaki fakalangi ʻoku nau malava ai ʻo fakatōkakano ʻa e faʻahinga ʻulungaanga lelei hangē ko e tuí, loto-toʻá, loto-mahinó, mo e feinga ke lelei ange e ngaahi vā fetuʻutakí pe anga fakafonuá. …
“ʻE tuofāfine, ʻi he kotoa ʻo e ngaahi feohi ʻoku mou faí, ko e meʻa kuo pau ke fakamuʻomuʻa maʻu pē ʻi hoʻomou moʻuí, ko homou vā fetuʻutaki ko ia mo e ʻOtuá, ʻa hoʻomou Tamai Hēvaní, ʻa e tupuʻanga ʻo homou mālohi fakaeangamaʻá. Manatuʻi ko e mālohi ʻo Sīsuú, naʻe fakafou mai ia ʻi Heʻene tauhi mateaki matematē pē ki he finangalo ʻo e Tamaí. … Feinga ke ke aʻusia e tuʻunga fakaākonga ko ia ʻo e Tamaí mo e ʻAló, pea ʻoua naʻa teitei mōlia ho ivi takiekina ki he leleí.”3
Ngaahi Potu-folofola Kehé
Saame 24:3–5; Filipai 4:8; 2 Pita 1:3–5; ʻAlamā 31:5; Tokāteline mo e Ngaahi Fuakava 38:23–24
Konga naʻe toʻo mei he Thy Faith Hath Made Thee Whole, fai ʻe Walter Rane
Mei he Folofolá
ʻI he ʻaho ní, ʻoku tokoni ha kau fafine fonu ʻi he tuí ki he Fakamoʻuí. ʻOku tau lau ʻi he Luke 8 ki ha fefine ne ʻau toto ʻi ha taʻu ʻe 12 naʻe ʻikai lava ʻo fakamoʻui. Naʻá ne fekumi ke fakamoʻui ia ʻi heʻene “haʻu kia [Kalaisi], ʻo ala ki Hono kapaʻi kofú: pea ne [tuʻu] he taimi pē ko iá ʻene ʻau totó. … Pea pehē ange ʻe Sīsū, kuo ala ange ha taha kiate ia: he ʻokú Ne ongoʻi kuo ʻalu atu ʻa e mālohi4 ʻiate Ia.” Naʻe fakatōmapeʻe ʻi hono ʻaó ʻa e fefine angatonu faivelenga ko ʻení, ʻo fakahā ange “kiate Ia ʻi he haʻohaʻonga ʻo e kakaí” pea naʻá ne “ala kiate Ia” pea “moʻui ai leva. Pea pehē ʻe ia kiate ia, ʻOfefine ke ke fiemālie: kuo fakamoʻui koe ʻe hoʻo tuí” (vakai, Luke 8:43–48; vakai foki 6:17–19).
ʻI Heʻene angatonú,5 ʻoku malava ʻa Kalaisi ʻo fakamoʻui, fakaʻatā, fakamālohia, fakanonga pea fakafiefiaʻi ʻi heʻetau fili ʻi he loto-toʻa mo e tui ke ala hake kiate Iá.