Fehokotaki Taʻengata ki Hoku Fāmilí

Ko e taimi naʻe ohi ai au ʻi hoku taʻu tolú, naʻe toki fakangofua pē heʻeku faʻē totonú ke aofangatuku ʻa e ohi fakalaó kapau ʻe loto ʻeku ongomātuʻá ke fakahoko hoku ngaahi ouau faka-Siasí ʻi he hili e hoko hoku taʻu 12. Naʻá ne fakakaukau naʻe fie maʻu ke u lahi feʻunga ke u fai e filí maʻaku, ka naʻe faingataʻa ʻaupito ke tatali.

ʻIo, naʻe faingataʻa ke sio ki he papitaiso ha tokolahi ʻo hoku ngaahi kaungāmeʻá ʻi he hoko honau taʻu valú, ka ko e meʻa naʻe toe faingataʻa angé ko e ʻiloʻi he ʻikai ke lava ʻo silaʻi au ki heʻeku ongomātuʻa ohí mo ha toko nima kehe ʻo e fānau lalahi angé kae ʻoua kuo hoko hoku taʻu 12. Naʻá ku manavasiʻi naʻa hoko ha meʻa kiate au pea ʻikai ke lava ʻo silaʻi au kiate kinaua.

Naʻa mau kamata palani hoku papitaisó pea mo e silaʻi ki hoku fāmilí ʻi he ofi ki hoku taʻu 12. Naʻe tuku pē heʻeku ongomātuʻá ke u fili ʻa e temipale ʻe silaʻi ai kimautolú. Naʻá ku fakakaukau maʻu pē ko e Temipale Sanitiako Kalefōniá ko e fakaʻofoʻofa tahá ia, ko ia, naʻe loto kotoa ai hoku fāmilí ke mau fononga meʻalele ki Kalefōnia ki he silá.

Naʻe ʻikai ke u faʻa tatali ke u hoko ko ha fāmili taʻengata mo ʻeku ongomātuʻá pea mo hoku ngaahi tokouá. Naʻá ku ongoʻi mālohi moʻoni ʻa e Laumālié ʻi he lolotonga ʻo e silá, ʻoku faingataʻa ke fakamatalaʻi. ʻI he fāifai pea silaʻi ko ʻeni au ki hoku fāmilí, kuo fetongi ai ʻeku loto hohaʻá ʻaki ha fakafiemālie mo ha nonga, ʻi heʻeku ʻiloʻi kuo fakafehokotaki taʻengata au he taimí ni kiate kinautolu.