Naʻe Fuʻu Masivesiva Nai ʻEku Meʻatokoní?

ʻĪmisi

illustration of casserole dish with hands clasping in front of it

Tā fakatātā ʻa Bradley H. Clark

Naʻá ku faiako ʻaʻahi ʻi ha taʻu ʻe ua ki hoku kaungāʻapi mo e kaungāmeʻa ko Mīsisi Mōkení. Naʻá ne lahi ʻaki iate au ha taʻu ʻe uofulu tupu, ko ia naʻá ku ako ki he lahi tahá meiate ia mo ʻene moʻuí pea pehē pē mo ia mei heʻeku ngaahi pōpoaki faiako ʻaʻahí.

Naʻe sivi ʻo ʻilo naʻe maʻu ʻa Mīsisi Mōkeni ʻe he kanisaá, ʻi he lolotonga ʻo ʻeku ʻaʻahi ki aí. Naʻá ku fakatumutumu ʻi heʻene toʻa ʻi hono kātekina hono ngaahi faitoʻó pea mo e meimei ke fofonga malimali maʻu pē.

Naʻá ne talamai ʻi he lolotonga e taha ʻo ʻeku ngaahi ʻaʻahí ko e ʻaho hono hokó ko e ʻaho ia naʻe mali aí. Naʻe afe leva ʻema pōtalanoá ki ha ngaahi meʻa kehe, pea fakaʻosi ʻema ʻaʻahí.

Naʻe ueʻi au ʻi he hoʻatā hono hokó ke u ʻave ʻa e meʻa naʻá ku teuteu ki he maʻu meʻatokoni efiafí kia Mīsisi Mōkeni pea mo hono husepānití ki he fakamanatua ʻo ʻena malí. ʻI he kamataʻangá naʻá ku tukunoaʻi pē ʻa e ueʻí he naʻá ku teuteu ha meʻakai fakaʻaho angamaheni pē ʻo e uiké. He ʻikai hano ʻaonga e faʻahinga meʻakai taʻe mahuʻinga ko ʻení ki ha faʻahinga meʻa mahuʻinga pehē.

Ka naʻe ʻikai mavahe meiate au ʻa e ueʻí ni. Naʻá ku telefoni leva ki hoku husepānití ʻi he ngāué, mo ʻamanaki te ma fakakaukau tatau ko e foʻi fakakaukaú naʻe ʻikai sai. Ka, naʻá ne poupouʻi au ke u telefoni kia Mīsisi Mōkeni ʻo talaange te u ʻaluange mo ha meʻatokoni efiafi.

Naʻe taʻofi au ʻe he ongoʻi mā ʻi heʻeku kiʻi meʻakai masivesivá mo e meʻa naʻá ku pehē ko e ʻulungaanga hīkisiá ke ʻoua te u telefoni ki hoku kaungāmeʻá, ka naʻe ʻikai ke u lava ʻo tekeʻi ʻa e ongo ʻoku totonu ke u vahevahe ʻeku meʻatokoni efiafí. Ko ia naʻá ku ʻai leva ʻa e meʻakaí ʻi ha peleti peá u luelue tailiili atu ki he kauhala ʻe tahá.

Naʻá ku fakatokangaʻi ʻa Misa mo Mīsisi Mōkeni ʻi heʻeku hū atu ki hona loto ʻapí, ʻokú na heka ki heʻena kaá. Naʻá ku fakahoko ange kuó u haʻu mo ha meʻatokoni ki he fakamanatua hona ʻaho malí pea ʻofa ʻoku sai pē.

Naʻe malimali ʻa Mīsisi Mōkení. Naʻá ne pehē naʻá na fakakaukau ke na fakamanatua pē hona ʻaho malí ʻi ha falekai he feituʻú koeʻuhí he ʻoku fuʻu ongosia ʻi he faitoʻo hono kanisaá ke teuteu ha meʻakai pe toe ʻalu ki ha feituʻu. Naʻe fofonga fiefia ke lava ʻo toe nofo pē ʻi ʻapi ʻi he maʻu meʻatokoni efiafí.

Naʻe haʻu kiate au ha ongoʻi nonga mo fiefia ʻi heʻena tali ʻeku kiʻi meʻakaí.

Naʻe ʻikai lōloa ange ʻi ha māhina ʻe ua mei ai, hili pē hono kakato e faitoʻo kanisā ʻo Mīsisi Mōkení, kuo mālōlō siʻono husepāniti ʻofeiná ʻi ha puke fakafokifā. Ko e fakamanatua hona ʻaho malí ʻi he ngaahi uike ko ia kimuʻá, ko siʻena fakaʻosí ia.

Naʻá ku ako ha meʻa lahi ʻi he faʻahitaʻu māfana ko iá fekauʻaki mo e muimui ki he kihiʻi leʻo siʻi mo vanavanaiki ʻo e Laumālié ʻi he tokoniʻi ʻo e kakaí. Ko e ngāue tokoni ʻoku kole mai—pe ueʻi—ke tau faí mahalo he ʻikai fakafiemālie, taimi hala, pe ngali māʻulalo ʻi heʻetau vakaí, ka mahalo ko e meʻa tonu pē ia ʻoku fie maʻú. Naʻe ʻomi ʻe he meʻá ni kiate au ha loto-toʻa ke tokoni ʻi ha faʻahinga fatongia pē ʻoku fie maʻu ai au ʻe he ʻEikí, pea naʻá ne fakatupulaki ʻeku tui ke fai “ʻa e ngaahi ngāue ʻa e kau ʻāngeló” (“Kau Fefine ʻo e Saioné,” Ngaahi Himí, fika 201).