Naʻá Ta Fai Nai ʻa e Meʻa Totonú?

Naʻá ku hoko ko ha tokotaha faiongoongo ʻiloa naʻe faiongoongo maʻá ha ngaahi makasini mo ha ngaahi kautaha nusipepa lelei ʻi Lima, Pelū, ka ko ʻeku tōʻonga moʻui—mamaʻo mei he ʻOtuá—naʻá ne fakamamahiʻi au ʻi he ʻaho kotoa pē. Naʻá ku tali ha ngāue, tuʻunga ʻi he meʻá ni, ke u hoko ko ha taha laukonga ke fakapapauʻí (proofreader) ʻa ha makasini ʻi he Vahefonua Venitanilá, naʻe mamaʻo mei hoku ʻapí. Naʻá ku feinga holiholivale ke maʻu ha founga ke u mavahe ai mei hoku ngaahi kaungāmeʻa lolotongá. Naʻe ongoʻi ʻe hoku lotó ʻi Venitanila ʻe liliu ʻeku moʻuí.

Naʻá ku faʻa maʻulotu mo hoku kaumeʻa fefiné, ʻa Malia Kilisitina, ʻi ha fakalotoʻi au ʻe ha ongo faifekau vilikikihi ke u ʻeke ki he Tamai Hēvaní ʻi he lotu pe ʻoku moʻoni ʻa e Siasí. Naʻá ku fai ia, pea ko e meʻa naʻá ku fouá naʻe ʻikai malava ke fakamatalaʻi. Kuo teʻeki ai ke u ongoʻi mālohi tuʻo taha pehē ʻa e Laumālie Māʻoniʻoní ʻo hangē ko e ʻaho fakangalongataʻa ko iá.

ʻOsi ʻema mali mo papitaiso ʻi ha taimi nounou mei aí, naʻá ku nofo totongi leva mo Malia Kilisitina ʻi ha kiʻi loki siʻisiʻi mo taʻefakafiemālie ʻi Venitanila. Naʻe hiki au tuʻunga ʻi heʻeku ngāue mālohí mei he tuʻunga laukonga ke fakapapauʻí ke ʻētita ʻi he makasini ʻa e kautahá mo e nusipepá. Naʻe teʻeki ai ke u hoko ko ha ʻētita kimuʻa, pea naʻá ku fiefia ʻi he tuʻungá. Neongo ia, naʻe kamata ke hoko ha liliu ʻi he kamata ke holoki ʻe he kautaha pulusí ʻenau ngaahi tuʻunga ngāué, ʻo pulusi ha ngaahi meʻa ʻoku tuʻu fehuʻia fakaeʻulungaanga. Naʻe fehangahangai ʻa e ngaahi liliu ko ʻeni naʻe tuʻutuʻuni ʻe homau kau talēkitá mo e ngaahi tefitoʻi moʻoni mo e ngaahi tuʻunga ʻulungaanga mahuʻinga ʻo e Siasí.

Naʻá ku fakaʻamu maʻu pē ke u hoko ko ha ʻētita, ka naʻe ʻai ʻe he tūkungá ni ke u ongoʻi taʻefiemālie. Naʻe fokotuʻu mai heʻema pīsopé kapau te ma fai ʻa e ngaahi meʻa ʻoku fakahōifua ki heʻema Tamai Hēvaní, te Ne tāpuakiʻi kimaua. Hili haʻaku fakakaukauʻi mo lotua ia mo hoku uaifí, naʻá ma ongoʻi ʻoku totonu ke u fakafisi mei heʻeku ngāué.

ʻOsi mei ai ha ngaahi ʻaho siʻi kuo kamata ke u ongoʻi loto mafasia mo fifili pe naʻá ku fai nai ʻa e meʻa totonú. Naʻá ku ʻave e tohi lekooti ʻeku akó mo e ngāué ki ha ngaahi kautaha, ʻi he ʻosi pē ʻeku fakafisí, ka kuo teʻeki ai ke u fanongo mei ai. Naʻe fokotuʻu mai ʻe Malia Kilisitina ke ma toe lotu, pea naʻá ma fai ia Naʻá ma lotu ke iku lelei ʻa e meʻa kotoa pea ʻoua naʻa mole ʻema tuí neongo kuo fokotuʻuna ʻa e ngaahi tohi moʻuá.

Naʻe poupouʻi au ʻe hoku uaifí ʻi ha ʻosi mei ai ha ngaahi houa siʻi ke u telefoni ki ha taha ʻo e ngaahi kautahá. Naʻá ku tā, neongo naʻá ku kiʻi taʻe-tui. Naʻá ku fuʻu ʻohovale ʻi he taimi naʻe pehē ai ʻe ha tokotaha mei ai ko e ʻai ē ke telefoni mai. Naʻá ne fie ʻilo pe ʻe lava ke u kamata ʻi he ʻaho hono hokó!

Naʻá ma tangi fiefia. Kuo tali heʻema Tamai Hēvaní ʻema ngaahi lotú.

Naʻe pau ke ma mavahe mei homau uōtí mo ha ngaahi kaungāmeʻa lelei koeʻuhí ko ʻeku ngāué, ka naʻá ma mavahe mo ha fakamoʻoni mālohi ange. Kuó u maʻu ʻeni ha ngāue māʻolunga mo ha vāhenga lelei, pea kuó ma maʻu ha feituʻu fakaʻofoʻofa ke nofo ai. Kae mahulu haké, kuo tāpuekina ʻaki kimaua ha ʻilo pau ko e taimi ʻoku tau fai ai ʻa e ngaahi meʻa ʻoku fakahōifua ki he ʻOtuá, ʻoku tau maʻu ʻEne ngaahi tāpuakí.