KAU FAFINE ʻi he Ongoongoleleí

ʻOku ou ʻofa ʻi hoku kaungāmeʻa ko Lupitá ʻo hangē haku tokouá. Naʻá ma fetaulaki ʻi he kalasi onó peá ma fakatou kau ʻi he kau ifi laka ʻa e ʻapiakó. Naʻá ma toe vāofi ange ʻi he taʻu hono hokó pea mo kamata ke fefalalaʻaki moʻoni. Naʻá ne fakamatala mai kiate au ʻa e ngaahi palopalema naʻe hoko ʻi ʻapí koeʻuhí he naʻe ʻikai ke ʻi ai ʻene tamaí pea ʻikai ke lava heʻene faʻeé ʻo fai ange ʻa e faʻahinga tokanga naʻá ne fie maʻú. Naʻá ku ʻiloʻi naʻe loto mamahi ʻi he ʻikai hoko ʻene ongomātuʻá ko ha konga lahi ange ʻo ʻene moʻuí. Naʻe taʻelata, ka naʻá ku ʻi ai maʻu pē.

ʻOku ou ongoʻi monūʻia ke fāʻeleʻi ʻi ha ʻapi naʻa mau maʻu ai ʻa e ongoongolelei ʻo Sīsū Kalaisí. Kuó ne ʻomi ki heʻeku moʻuí ha nonga ʻoku ʻikai ke maʻu ʻe ha tokolahi ʻo hoku ngaahi kaungāmeʻá. Koeʻuhí ko ʻeku lava ʻo ʻilo ʻa e ngaahi tāpuaki kuo ʻomi ʻe he ongoongoleleí kiate aú, naʻá ku fie vahevahe ia mo Lupita.

Naʻá ku talanoa ki ai fekauʻaki mo e Siasí pea mo fakaafeʻi ia ke ma ō ki he Mutualé. Naʻá ne tali pea kamata ke ma ō ki he lotú mo e ngaahi ʻekitivitī ʻa e uōtí pea mo hoku fāmilí. Naʻá ku fakafeʻiloaki ia ki he ongo faifekaú, ʻa ē naʻá na akoʻi ki ai ʻa e ongoongoleleí mo fakaafeʻi ia ke papitaisó. Naʻá ne maʻu ha fakamoʻoni, pea ʻi he taimi naʻá ne kole ai ki heʻene faʻeé pe ʻe lava ʻo papitaisó, naʻe talaange heʻene faʻeé ʻio.

Naʻe makehe ʻaupito hono ʻaho papitaisó koeʻuhí he naʻá ne fai ha ngaahi fuakava mo ʻetau Tamai Hēvaní ke manatuʻi Ia mo tauhi ʻEne ngaahi fekaú. Naʻá ku fai ange ʻeku fakamoʻoní ki ai ʻi he ʻaho ko iá mo talaange naʻá ne ʻi he feituʻu totonú pea ʻoku pau ʻoku laukau ʻaki ia ʻe he Tamai Hēvaní. ʻOku ou ʻofa ʻia Lupita pea ʻoku ou fuʻu fiefia heʻene hoko ko hoku kaungāmeʻá pea mo hoko ʻeni ko hoku tokoua ʻi he ongoongoleleí. ʻOku ou ʻilo ʻe fiefia ange ʻene moʻuí koeʻuhí he te ne maʻu mo hono fāmili ʻi he kahaʻú ʻa e ngaahi tāpuaki ʻo e ongoongoleleí.

Kuo ʻosi talamai ʻe Lupita kiate au ʻoku fakamālō ʻi heʻeku fakakaukau ke vahevahe ʻa e ongoongoleleí mo iá. ʻOkú ne pehē ko e talu mei heʻene kamata maʻulotú, mo e lelei lahi ange ʻene moʻuí pea kuó ne ʻosi ongoʻi nonga. ʻOku ou ʻiloʻi ko e Laumālié ʻeni ʻokú ne fakapapauʻi ki ai ʻa e moʻoní. ʻOkú ne toe pehē foki ʻe mali ʻi ha ʻaho ʻi he temipalé. ʻOku ou houngaʻia ʻi he Tamai Hēvaní koeʻuhí he kuó u maʻu hoku kaungāmeʻá pea koeʻuhí ko e fiefia ʻoku ou ongoʻi ʻi he taimi ʻoku ou vahevahe ai ʻa e meʻa ʻoku mahuʻinga taha kiate aú.