UaLelei

O paionia na tausia le tasi ma le isi e aunoa ma talaaga faaagafesootai, tamaoaiga, pe faaupufai. E tusa lava pe na faatuai ai lo latou alualu i luma, maua ai faafitauli, po o lona uiga o le taulaga o le tagata lava ia ma le galue malosi, na latou fesoasoani i le tasi ma le isi.

I lo tatou lalolagi e naunau i sini ma manatu faapito, e mafai e faamoemoega a tagata taitoatasi po o pati ona sili le taua nai lo le tausiaina o isi po o le faamalosia o le malo o le Atua. I le lalolagi i aso nei, o le ausiaina o sini faaupufai e mafai ona foliga mai o se fuataga lea o lo tatou taua.

O le faatulagaina ma le ausiaina o sini e mafai ona avea ma se mea matagofie tele. Ae a faapea ua manuia le ausiaina o sini i le faagaloina, le amanaiaina, po o le faatiga i isi, atonu e taua tele le tau o lena tulaga manuia.

Sa tausia e le au paionia i latou na i ai i lo latou kamupani, ae na latou manatu foi ia i latou na mulimuli mai ia i latou, i le totoina lea o mea toto mo le solo o taavale toso na mulimuli mai.

Sa latou iloa le malosi o le aiga ma uo. Ona sa latou faalagolago le tasi i le isi, sa oo ina latou malolosi. Na avea o ni uo ma aiga.

Na auauna atu le au paionia i le avea ai ma se faamanatu lelei o le mafuaaga e tatau ai ona tatou sosola ai mai le faaosoosoga e vavaeeseina i tatou, ma, nai lo lena, e aapa atu e fesoasoani le tasi i le isi ma maua le agaalofa ma le alofa mo le tasi i le isi.

“O mai, o mai, outou le Au Paia.”

O lenei fuaitau na avea ma se vii i le au malaga vaivai. E faigata ona vaai faalemafaufau i le malosi na galulue ai nei agaga maoae. O le savavali ua na o se tasi o mea e sili ona faigofie na latou faia. Sa tatau ona latou toso faatasi e saunia ai meaai, lipea taavale solofanua, tausia manu, auauna atu i e mama‘i ma vaivai, saili ma ao mai le vai, ma puipuia i latou lava mai le matautia o le mamafa o le elemene ma le tele o ala faigata o le vao.

Latou te ala ae i luga i taeao taitasi ma faamoemoega ma sini ua faamaninoina ma malamalama ai tagata uma: ina ia auauna atu i le Atua ma o latou uso a tagata, ma ia taunuu i le Vanu o Sate Leki. I aso uma o na faamoemoega ma sini sa manino ia te i latou; sa latou iloa le mea e tatau ona latou faia ma sa taua le alualu i luma i aso taitasi.

I o tatou taimi—ona o le tele o mea tatou te mananao ai e faigofie ona i ai i o tatou lima—o se faaosoosoga le liliu ese pe fiu i soo se taimi e foliga mai ai o loo i ai ni nai patupatu laiti po o le malifa e foliga mai ua tu sao i luga i o tatou luma. I na taimi, e mafai ona musuia ai i tatou e mafaufau i na alii, tamaitai ma tamaiti o e sa le mafai e ma‘i, faigata, tiga, e oo lava i le oti ona taofia i latou mai lo latou ala filifilia.

Sa aoaoina e le au paionia o le faia o mea faigata e faalolotoina ma faamalosia ai le tino, mafaufau, ma le agaga; faalauteleina lo latou malamalama i lo latou natura paia; ma faateleina ai lo latou agalelei atu i isi. O lenei uiga na faamalosia ai o latou agaga, ma avea ai ma se faamanuiaga ia i latou ina ua leva ona mavae atu la latou savaliga i le salafa o le laufanua valevalenoa ma le mauga.

Pe a pepese le au paionia, na latou faaleoina se lesona lona tolu: “Galulue fiafia.”

O se tasi o tulagaese maoae o o tatou taimi, ua faamanuiaina i tatou lava i le tele o mea ae e mafai lava ona tatou matuai le fiafia lava. O mea ofoofogia o le tamaoaiga ma tekinolosi ua lofituina ai i tatou ma ufitiaina i tatou i le saogalemu, faafiafiaga, faamalieina, vave ona faafiafiaina, ma le faigofie. Ae o mea uma ua siomia ai i tatou ua tatou vaaia ai le tele o le le fiafia.

O paionia, na ositaulagaina le tele o mea, na leai ni meatotino ma fiaaai e oo lava i mea e sili ona manaomia e ola ai. Sa latou malamalama e le oo mai le fiafia ona o le tulaga laki pe faafuaseia. E mautinoa lava e le maua mai i le faataunuuina o o tatou moomooga uma lava. E le maua le fiafia mai le tulaga faaletino. E sau mai i totonu—e tusa lava po o le a se mea o loo tupu i lo tatou siosiomaga.

Na silafia e le au paionia lena mea, ma i lena agaga na latou maua le fiafia i tulaga uma ma tofotofoga uma—e oo lava i na tofotofoga e oo atu i lalo ma faalavelavea ai le loloto o o latou agaga.

Tatou te toe tepa i tua i nisi taimi i mea na onosaia e paionia ma fiafia ma faapea, “Faafetai tele ou te lei ola i lena taimi.” Ae ou te mafaufau i na paionia lototetele, pe a mafai ona latou vaai ia i tatou i aso nei, atonu latou te le faaalia le popolega lava lea e tasi.

E ui ina ua suia taimi ma tulaga, e lei suia mataupu faavae mo le feagai ai ma tofotofoga ma le manuia o le ola faatasi o se nuu e manatu alofa ma faamanuiaina i lalo o le Atua.

Mai le au paionia e mafai ona tatou aoao e maua le faatuatua ma faalagolago i le Atua. E mafai ona tatou aoaoina le agaalofa mo isi. E mafai ona tatou aoaoina o le galuega ma le galue malosi e faamanuiaina i tatou e le gata i la le tino ae faapea foi le faaleagaga. E mafai ona tatou aoaoina o le fiafia e avanoa i ai i tatou e tusa lava po o a o tatou tulaga.

O le auala sili e faaalia ai lo tatou agaga faafetai i paionia o le faaaofia lea o o tatou lava olaga i le faatuatua i poloaiga a le Atua, agaalofa ma le alofa mo o tatou uso a tagata, ma le galue malosi, faamoemoe, ma le olioli na faaalia e le au paionia i o latou lava olaga.

A o tatou faia faapea, o le a mafai ona tatou aapa atu i le fiasefulu o taimi, uu lima o na paionia mamalu i o tatou lima, ma faaopoopo atu o tatou leo ia i latou a o tatou pepese faatasi ma i latou: “Ua lelei! Ua Lelei!”