E Valu Tama’i Fasi Moa

Ata

Bowl of pasta.

Faatasi ai ma lo‘u toalua ua le faigaluega, ma le sailia o tupe mo o matou manaoga uma mo se aiga ma se fanau e toalima ua matutua o se luitau. O le aso a o lumanai le faasalalauga o le konafesi aoao ia Oketopa 2013, sa matou siakiina ai a matou sapalai o meaai ma filifili loa o le a matou saunia se taumafataga faigofie o le aoauli o moa falai ma le araisa i le taimi o le malologa i le va o sauniga o le konafesi.

Na oo mai le Aso Sa, ma sa matou sauni uma. O le isi vaega o lo matou aiga lautele, e aofia ai o‘u matua ma o’u uso ma o latou aiga na feiloai i le nofoaga autu mo le afa itula a o lei amataina le faasalalauga.

E maoae le olioli ma se faamanuiaga i le faalogo atu i perofeta, tagatavaai, ma talifaaaliga o faasoa mai savali faapitoa mo lo tatou augatupulaga. A o ou faalogo i fautuaga ma fiafia i le agaga matagofie o le filemu ma le alofa sa ou lagonaina mai lo’u Tama Faalelagi, sa ou maua le faamautinoaga o le a lelei mea uma, o le a taulimaina manaoga faaleagaga ma faaletino a lou aiga, ma afai ae faaauau pea ona faaaogaina le faatuatua ma ia tuu atu i lo’u Faaola e taitaiina [lou olaga], o le a tuusaolotoina i matou mai i maea o le mativa ma isi faigata.

O le fiafia ai i le agaga matagofie o lena Aso Sapati, na galo ai ia te au le meaai o le aoauli. Faatoa ou iloa lava ina ua oo mai le taimi o malologa i va o sauniga e toa 17 i matou. E toaiva tagata matutua ma fanau e toavalu o le a faasoaina la matou meaai faatauvaa o ni tama’i fasi moa e valu ma se ipu araisa, faatasi ai ma se ipu makaroni na aumai e se tasi o ou uso.

Na faia e Henry e valu tausaga le matua le tatalo faafetai ma se faamanuiaga mo a matou meaai, ma talosagaina ia tagata uma o le a taumamafa ina ia maoona. Ona ou tofitofi lea o fasi moa taitasi i ni vaega laiti ma tuuina atu i le fanau a o tuuina e lou uso le makaroni ma le araisa i luga o a latou ipu. Na le mafai ona ou taofia ou loimata mai le maligi a o ou iloaina na matou lava i vaega laiti tai tasi mo tagata uma ma le vaega faasili e tasi i le maea ai ona tofitofi uma fasi [moa] ma le makaroni ma le araisa na vaevaeina ia i matou. Ona matou aai uma ai lea—ma sa maoona.

Sa ou fai atu i o‘u matua ma lo’u toalua, lea ua ou iloa ma le mautinoa sa tofitofi moni lava e le Faaola areto e lima ma i’a e lua ma fafagaina ai se motu o tagata e “limagaafe o tane, a e lei faitaulia fafine ma tama iti” (tagai i le Mataio 14:14–21). O nisi o le au faitio ma e le talitonu na faapea mai o le vavega o se atalilo, ua faatele, pe e le mafai ona tupu. Ae ia te au ma lo‘u aiga, e moni le tala e pei ona tusia.

Sa faafofogaina e le Tama faalelagi le tatalo a se tamaitiiti faamaoni o le na tuuina atu le faafetai ma talosagaina le faamanuiaga o e uma e taumamafa ai o le a maoona ma maua le tausiga tatau.

A o matou toe foi atu i le fale faafiafia mo le konafesi aoao, sa ou lagonaina le malosi o le agaga. Sa ou lagona le pei ua ou i ai i le motu o tagata na fafagaina e Iesu, ua naunau e nofo ma aoao mai ia te Ia o le e folafola mai e faapea afai tatou te gauai atu ma faalogo, o le a tatou le toe fia aai pe fia feinu (tagai i le Ioane 6:35).

Faatasi ai ma le ma fanau sa matou nonofo filemu i a matou nofoa i totonu o le falesa ma sauni atu e faalogo i auauna filifilia a le Tama Faalelagi. O se vaega o le a matou manatua pea.