Savali a Faiaoga Asiasi
O Uiga Paia o Iesu Keriso: E Loto Faamagalo ma Alofa Mutimutivale
Ia suesue ma le agaga tatalo lenei savali ma saili ia iloa mea e faasoa atu. O le a mafai faapefea e le malamalama i le soifuaga ma matafaioi a le Faaola ona faateleina lou faatuatua ia te Ia ma faamanuiaina ai i latou o loo e tausia e ala i le faiaoga asiasi? Mo nisi faamatalaga, alu i le reliefsociety.lds.org.
Faatuatua, Aiga, Toomaga
O le malamalama faapea o Iesu Keriso e loto faamagalo ma alofa mutimutivale ia i tatou e mafai ona fesoasoani ia i tatou e faamagalo atu ma tuu atu le alofa mutimutivale i isi. “O Iesu Keriso o lo tatou Faataitaiga,” o le saunoaga lea a Peresitene Thomas S. Monson. “O lona soifuaga o se talatuu o le alofa. O ē mamai na Ia faamaloloina, o ē mafatia na Ia siitiaina, o ē agasala na Ia faaolaina. I le faaiuga, na fasiotia o Ia e tagata leaga. Ae o loo tatagi pea mai le mauga o Kolokota upu nei: ‘Lo’u Tamā e, ia e faamagaloina atu ia te i latou; aua ua latou le iloa le mea ua latou faia’—o le faailoaga silisili lea i la le tino o le agalelei ma le alofa.”1
Afai tatou te faamagalo atu i isi i a latou agasala, o le a faamagaloina foi i tatou e lo tatou Tama Faalelagi. Ua finagalo Iesu ia i tatou ina “ia mutimuti vale lo outou alofa, pei ona alofa mutimuti vale o lo outou Tama” (Luka 6:36). “O le faamagaloga mo a tatou agasala e o mai faatasi ma tuutuuga,” o le saunoaga lea a Peresitene Dieter F. Uchtdorf, Fesoasoani Lua i le Au Peresitene Sili. “E tatau ona tatou salamo. … Pe sa tatou le faalatalata atu ea i se tasi taimi po o le isi ma le agamalu i le nofoa o le alofa ma aioi atu mo le alofa tunoa? Pe sa tatou le i momoo ea i le malosi atoa o o tatou agaga mo le alofa mutimutivale—ina ia faamagaloina mo mea sese ma agasala sa tatou faia? … Ia faatagaina le Togiola a Keriso e suia ma faamalolo lou loto. Ia fealofani. Ia faamagalo e le tasi le isi.”2
Mau Faaopoopo
Mai Tusitusiga Paia
“Ia tatou faamagalo atu e pei ona faamagaloina i tatou,” o le tala lea a Elder Jeffrey R. Holland o le Korama a Aposetolo e Toasefululua.3 Ua faailoa mai e le tala o le atalii faamaumau oa i itu uma e lua o le faamagalo atu: ua faamagaloina se tasi o atalii ma le isi atalii o loo taumafai e faamagalo atu.
O le atalii laitiiti na ave lona tofi, sa vave ona faaalu, ma ina ua tulai mai se oge, sa ia galue e fafaga puaa. Ua faapea mai tusitusiga paia “ona atamai ai lea o ia”, sa ia toe foi atu ma fai atu i lona tama sa le‘i agavaa o ia e avea ma ona atalii. Ae na faamagalo o ia e lona tama ma na tape se tamai povi peti mo se taumafataga. O le atalii matua na toe foi mai i le galue ai i le fanua ma sa amata ona ita. Sa ia faamanatu atu i lona tama sa ia auauna atu i le tele o tausaga, sa lei solia se poloaiga, peitai “e te lei aumai lava se tamai ’oti ma a’u, matou te olioli ai ma a’u uo.” Na tali atu lona tama, “Tā e, ta te nonofo pea ma oe, o au mea uma foi, o au ia. Ua tatau foi ona tatou fiafia ma olioli: aua o lou uso lena na oti, a ua toe ola mai; na le iloa foi, a ua maua” (tagai Luka 15:11–32).