O Le Ofu Faaipoipo a Lo‘u Tina
Angélica Flores Algaba, Querétaro, Mekisiko
Sa ou teineitiiti ina ua ou vaai muamua i le ofu faaipoipo a lo‘u tina. Sa afifi ma le faaeteete i totonu o se atigipusa, ma ou te manatua le tatalaina ma le agalofa e lou tina ina ia mafai ona ou vaai i ai. O se mea matagofie tele! Sa ou manao tele e ofuina lena ofu pe a oo mai le aso o la‘u faaipoipoga.
Na toe tuu ma le faaeteete e lo‘u tina [le ofu] ma folafola mai e nonoina mai ia te au i le lumanai. Sa ia fai mai o le ofu o se meaalofa faapitoa mai i lo‘u tama. Sa ia foliga ua faamemelo i le alofa ma aulelei i ata o lana faaipoipoga. O o’u matua, e lē o ni tagata o le Ekalesia, ae o ni tagata lelei.
Sa ou aoao e uiga i le Ekalesia ina ua ou feiloai atu i le alii o le a avea ma o‘u toalua. O lena feiloaiga sa ese lava aua, e ui ina sa le‘i toaga i le Lotu, o la ma feiloaiga na tatai atu i le tala o le Uluai Faaaliga. Sa ou iloaina le ofoofogia o le tala, ae sa ou le saunia e taliaina.
Ina ua uma ona ma tafafao faamasani mo le 16 masina, na oo mai le moni o au miti ina ua ou ofuina le ofu faaipoipo a lou tina faatasi ai ma lona siusiu umi ma savali atu i le ala savali e agai atu i la’u uo. Sa ou faamemelo tele i le alofa. Fai mai le toatele o tagata sa ou pei o lou tina ina ua faaipoipo.
Na mavae tausaga, ma na ma maua ni atalii se toalua. Ina ua taumafai lou toalua e toe foi i le lotu, sa ou taofia ana taumafaiga. E ui ina sa ou le toaga i le lotu o lou talavou, sa faigata lou taliaina o se isi ekalesia.
Na iu lava ina suia lena mea i le mavae ai o le 19 tausaga o le faaipoipoina. Na toe foi atu lou toalua i le lotu, ma i le mavae ai o ni nai vaiaso na amata ona ou auai atu faatasi ma ia. Sa vave ona tuputupu ae la‘u molimau, ma sa ou papatiso ma faamauina. E lei umi i le mavae ai [o lou papatisoga] o lo‘u naunautaiga sili o le saunia o au lava ia ina ia faamauina i lo’u toalua i le malumalu.
Ina ua oo mai le aso fiafia o lo maua faamauga, sa ou toe ofuina le ofu paepae o lo‘u tina. O se uo mai le ekalesia sa fetuunaia ina ia mafai ona talafeagai e ofuina i le malumalu. Ou te ofuina lava iina talu mai lena taimi.
E oo atu i le taimi na maliu ai lo‘u tama ma sa latalata ona maliu lou tina, sa le’i saunia o ia e taliaina le Ekalesia toefuataiina. Ae sa ou tau atu ia te ia le tele o mea matagofie e uiga i le Toefuataiga. Sa ou fai atu foi ia te ia a ia laasia le veli, o le a ia faalogo i le savali o le talalelei moni. Sa ou folafola atu ia te ia, o le a ou ofuina mo ia lo ma ofu ina ia mafai ona fai ma sui e maua sauniga o le malumalu ma faamauina i lo‘u tama. Ma sa ou faia.
O lou ofu ua tuai nei, ma ou te iloa o le a i ai se aso o le a le toe mafai ona ou ofuina. Seia oo ina oo mai lena aso, o le a faaauau pea ona ou ofuina ma le alofa—mo lo‘u toalua, mo lo’u tina ma lo‘u tama, mo tagata o le aiga na ou auauna atu e fai ma sui i le malumalu, mo le talalelei moni, mo au sauniga paia, ma mo lo’u Tama Faalelagi ma Lona Alo, o Iesu Keriso.