Sa ou Talanoa i le Atua e pei o se Uo

A o ou laitiiti, sa ou matamuli lava, ma sa faigata ia te au ona maua ni uo. Sa ou tatalo soo i le Atua e uiga i le faatoilaloina o lo‘u fefe ma lo’u matamuli. Sa ou tatalo atu ia te Ia e pei o se uo. E leai se isi na aoao mai ia te au pe faapefea ona faia—sa na ona ou matua manaomia lava ona talanoa atu i se tasi. Ou te lei maua ni uo, lea na ou maua ai se tasi [o uo] i le talanoa atu ia te Ia.

Ona ou feiloai lea i faifeautalai. Sa la tuu mai ia te au se Tusi a Mamona, ma sa amata ona ou faitau i ai. Ina ua ou faitau i le 3 Nifae 17, sa matua faagaeetia au i le ala na ave ai e Iesu fanau laiti ma tatalo mo i latou. Sa ou iloaina o lenei mea o le auala sao lea e tatalo ai.

Sa ou filifili e faitau uma mau e uiga ia Iesu Keriso o loo tatalo. I le Luka 3:21, ina ua uma ona papatisoina e Ioane o Ia, na tatalo atu Iesu i le Tama Faalelagi ma sa tatalaina le lagi. Ina ua ou faitauina lena mea, sa ou iloaina sa ou manao e tatalo i se auala o le a tatalaina ai foi le lagi.

O nisi taimi sa ou lagonaina le vaivai ma le maua ai se lagona e tatalo. Peitai, na ou manatua le auala na tatalo ai Iesu. Ou te taumafai e faamaoni ma agatonu i lau tatalo ina ia tatalaina le lagi mo au foi.

O nisi taimi e puupuu a‘u tatalo ona e le mafai ona ou maua ni upu e lelei ai lou faaleoina ai au lava. Na o lou maua lava o le tele o lagona i totonu, ma ou faapea atu, “Ua e silafia mea o loo o’u taumafai e ta’u atu. Faamolemole, tau lava ina fesoasoani mai ia te au.”

O nisi taimi pe a ou tatalo e faamanuia meaai, ou te manatua ai e oo lava i lena tatalo faatauvaa, e mafai e le lagi ona tatala mai. Ou te taumafai e faagalo le lalolagi ma fesootai atu i le Tama Faalelagi. Ma i se auala e ese le faatauvaa, ou te fai atu mea e oo mai i lo‘u loto.

Pe a ou lagona le toafilemu ma le mafanafana, ou te iloa o le lagi e tatala mai ia te au.

Ina ua uma ona aoaoina e faifeautalai lo‘u aiga e uiga i le talalelei, o lo’u tina, tuafafine, ma au sa papatisoina. Ae e le‘i auai lo’u tama, lo‘u uso, ma le isi o’u tuafafine i le Ekalesia. Ou te matuai manao lava e avea lou tama ma se tagata o le Ekalesia. Sa ou anapogi, ma i aso uma sa ou tatalo mo lo‘u tama ina ia talia le talalelei ma ia papatisoina.

Sa ou iloaina e tatau ona ou tatalo mo lo‘u tama, ae sa ou iloa foi e tatau ona ou faatali mo le tali a le Atua. O nisi taimi o Lana tala lea, “Leai, e le‘o nei.” Na iu lava ina mafai e lo‘u tama ona faalogo ma malamalama, ma sa papatisoina o ia.

Afai o lou tina po o le tama e le o se tagata o le Ekalesia, talanoa i lau uo—lou Tama oi le Lagi. Fai atu ia te Ia e pa‘i atu i le loto o lou tina po o lou tama. Ia talanoa atu ia te Ia ma le lotomaualalo ma le faamaoni, i se ala faamaoni. Ona malolo ai lea. O ia o loo pule. Ua ia silafia pe faapefea ona e faia ni mea. Na te silafia lou tama ma lou tina e sili atu nai lo oe. Na te silafia le ala e aapa atu ai ia te i latou.

Aua le popole. E i ai sau uo. Tatalo ma lou loto, ma o le a faafofoga mai le Tama Faalelagi ia te oe. O le a tatalaina le lagi. Na te silafia oe, ma e alofa o Ia ia te oe.