Paionia: O Se Taula mo le Asō
Saunia e Elder Marcus B. Nash
O Le Fitugafulu
Mai se saunoaga, “Pioneers—Anchors for the Future,” na tuuina atu i Le Aai o Sate Leki i le Sauniga Faaosola o Atalii o Paionia i Iuta i le aso 24 o Iulai, 2013.
Manatua le au paionia, o a latou tala, ma le lagolagoina, faasaoina, o le auina atu o le mana o le Atua na oo mai o se taunuuga o lo latou faatuatua ma le faamoemoe.
I le talitonu ai i le moni o le Tusi a Mamona, na fesili mai ai Weltha Bradford Hatch mo le papatisoga i se vaitafe na aisa atoa nai lo le faatalitali seia oo i le taumafanafana.
I le 1832, o Weltha Bradford Hatch—o se tuaa o lo‘u toalua, o Shelley—ma lona toalua, o Ira, sa aumau i le taulaga laitiiti o Farmersville, Niu Ioka, ISA, i tafatafa o le Vaituloto o Seneca. Ina ua o atu ia faifeautalai o Oliva Kaotui ma Parley P. Pratt i le maota o le au Hatch, sa faatau mai e Weltha se Tusi a Mamona ma faitau i ai i le taimi lava lena. I le talitonu i lona moni, sa talosaga atu ai mo le papatisoga.
Ae peitai o lona toalua, na lapatai atu ia te ia ina ia faatali ona o sauaga ua faateteleina ma se pepe ua latalata ona [fanau] mai. Ina ua faatoa mavae le fanau mai [o le pepe], sa papatisoina Weltha—ae sei vagana ua maea ona tipiina se aisa i luga o le vaitafe lea e faatinoina ai le sauniga!1
Sa faagaeetia Ira i le savali o le talalelei. Sa ia fia iloa atili ma lagona foi le uunaia e faia se saofaga i le fausiaina o le Malumalu o Katelani. O lea sa ia malaga ai ma Weltha i le taavale toso i Katelani, Ohaio, ISA, e feiloai atu i le Perofeta o Iosefa Samita. Ina ua taunuu atu, sa tau atu ia i latou o le Perofeta e mafai ona maua faatasi ma se vaega o alii o loo tatuu laau i se togavao lata ane.
I le mavae ai o le latou taunuu atu i le togalaau, o se tasi o alii na faatu lana to’i i se laau, ma savali atu ia i laua ma faapea atu, “Uso Hatch, sa ou faatali mo oe mo aso e tolu; o le tupe ua e aumaia o le a faaaogaina e fesoasoani e fausia ai le pulelaa i totonu o le malumalu.”
O lenei alii o Iosefa Samita. E tau le tauina atu, sa papatisoina Ira, na toe foi atu o ia ma Weltha i lo laua fale, faapotopoto a laua meatotino, ma faatasi atu i le Au Paia i Katelani.2
O se tasi o o‘u tuaa, o Isaako Bartlett Nash, na auai i le Ekalesia i Uelese ma na sopoia le Atelani ma laufanua valevalenoa a o lei faatasi atu i le Au Paia i le Aai o Sate Leki. Ina ua mavae lona taunuu atu sa ia faalogo i se tasi o toeaina pulefaamalumalu o tauleagaina le faaaogaina o le tapaa i upu nei: “E i ai Toeaina i lenei faapotopotoga o e ua i ai nei tapaa i o latou gutu, e ui e oo lava i se puaa e le mafai ona lamuina le vao leaga.” O Isaako, faatasi ai ma se lamuga tapaa i lona fofoga, na aumai i fafo ma le filemu ma faapau i le eleele, ma faapea atu i le tapaa, “Ia nofo ai iina seia ou toe sau mo oe.” E lei toe sau lava i ai o ia.3
O le a le mea na uunaia ai Weltha e saili i le papatisoga i se vaitafe ua to’a nai lo le faatalitali seia oo i le taumafanafana? O le a le mea na faaosofia ai Ira e malaga mai Niu Ioka i Ohaio ma foai atu tupe mo se malumalu e fausia e se ekalesia e le’i auai ai o ia? O le a le mea na mafai ai e Isaako ona lafoai lona nuu moni, folau atu i le Vasa Atelani, sopoia laufanua valevalenoa, ma faaopoopo le lamuina o le tapaa i le lisi o mea sa ia tuu ese?
Sa matauina e Peresitene Gordon B. Hinckley (1910–2008): “O le mana, na faaosofia ai o tatou tuaa o le talalelei o le mana o le faatuatua i le Atua. O le mana lava lea e tasi lea na mafai ona malaga ese ai mai Aikupito, le ala i le Sami Ulaula, o le malaga umi i le vao, ma le faatuina o Isaraelu i le Laueleele na Folafolaina.”4
O le faatuatua o se mataupu faavae o le faatinoga ma le mana.5 E “le o le maua lea o se malamalama atoatoa i mea” (Alema 32:21). Ae, o se “mautinoa” o le Agaga (tagai i le Eperu 11:1, vaefaamatalaga e) e uunaia i tatou e galulue (tagai i le Iakopo 2:17–26; 2 Nifae 25:23; Alema 34:15–17), ia mulimuli i le Faaola, ma ia tausia Ana poloaiga, e oo lava i taimi o le ositaulaga ma tofotofoga uma (tagai i le Eteru 12:4–6).6 Pei lava o le oso a‘e o le la i le taeao, e maua mai i le faatuatua le faamoemoe—le faamoemoega o mea lelei e oo mai (tagai i le Moronae 7:40–42)—ma aumai ia i tatou le mana o le Alii e fesoasoani ia i tatou.7
Afai o le faatuatua o le mana lea na uunaia ai o tatou tuaa paionia, o le faamoemoe na maua e ala i lo latou faatuatua na taulaina ai i latou. Na tusia e Moronae:
“O le faatuatua e faataunuu ai mea uma—
“O le mea lea, soo se tasi e talitonu i le Atua e mafai moni lava ona faamoemoe mo se lalolagi sili atu ona lelei, ioe, se nofoaga lava i le aao taumatau o le Atua, o le faamoemoe lea e sau mai le faatuatua, e fai ma taula i agaga o tagata, lea o le a latou mautinoa ma mausali ai, ma faatumulia ai pea i galuega lelei e le aunoa, ma taitaiina ai e viia le Atua.” (Eteru 12:3–4).
O le faavae o le faatuatua ia Keriso na uunaia ai paionia e galulue faatasi ma le faamoemoe, o le faamoemoega o le mea e sili atu ona lelei e oo mai—e le gata mo i latou lava ae faapena foi mo a latou fanau. Ona o lenei faamoemoe, sa latou mautinoa ma le mausali, na taitai atu ai i le faamamaluina o le Atua e ala mai i soo se mativa. Mo i latou o e sa faamaoni pea, o le mana o le Atua na faaalia i ni auala faavavega.
E faapefea ona mafai e na paionia ona avea ma se taula mo i tatou i aso nei? Ou te faia atua ni fautuaga se tolu:
Manatua Paionia
Manatua paionia, o a latou tala, ma le lagolagoina, faasaoina, le mana laveai o le Atua na oo mai ona o se taunuuga o lo latou faatuatua ma le faamoemoe. O o tatou tama ma tina paionia e fesoasoani ia i tatou e iloa lo tatou faasinomaga o ni tagata o le feagaiga ma faamautu mai o lo tatou Atua—lea na tatou osifeagaiga ma o le e “le feliuai” (Mamona 9:19)—o le a faamanuiaina i tatou i taimi o faigata ma tofotofoga, e pei ona sa Ia faia i o tatou tama ma tina paionia.
Na aoao mai Alema faapea o le Atua “Ona o le a ia faataunuuina ana folafolaga uma ia o le a ia faia ia te oe, ona ua ia faataunuuina ana folafolaga ia na ia faia i o tatou tamā.” (Alema 37:17). O le iloaina o lenei mea, o le a musuia ai i tatou e paionia e faapena foi ona tatou galulue i le faatuatua ma ia taulaina i le faamoemoe.
O le taula lea tatou te saili atu i lo tatou ola, o le faaleagaga, ma o le lalolagi gaogaosa faaletino: o le faatuatua ola ma malosi ia Keriso ma le faamoemoe lea e taula ai i tatou i Ona ala.
O le tala o le kamupani taavale tosolima a Uili ma Matini ua avea ma se faatusa o le faatuatua ma le faamoemoe o uluai paionia. O se vavega lava le na o le 200 o le tusa ma le 1,000 tagata o le kamupani na maliliu.8 O taumafaiga e faatumulia i le faatuatua ma le faamoemoe a le au laveai, faatasi ai ma le fesoasoaniga paia, na faaolaina ai kamupani taavale tosolima.9
Ina ua tuua le Vanu o Sate Leki, sa taia le au laveai e afa lava ia muamua o le taumalulu, e matautia, ma le tetele na siomia ai kamupani o taavaletosolima. I le feagai ai ma le mataita o le natura, na vaivai ai le faatuatua o nisi o le au laveai, na leai se faamoemoe, ma toe foi mai.
I se faatusatusaga, o Reddick Allred sa faaauau pea ona taitaia se nofoaga o le laveai mo le tolu vaiaso i le tau malulu lamatia. Ina ua taumafai se isi tagata laveai e faatauanau Uso Allred e faatasi ma ia i le liliu atu i tua, na musu Reddick:
“Sa ou teena lana fautuaga, ma … fautuaina o ia e nofo, aua o le ola o le kamupani na faalagolago lea ia [i] tatou,” na ia tusia i lana api o talaaga. “Ona ia … faatuina mai lea e avea au ma peresitene o le nofoaga laveai, latou te taulai mai lo latou faatuatua ia te au, e tatau ona ou maua ai le afioga a le Alii ina ia iloa le mea e tatau ona matou faia. I lenei mea sa ou faasalavei atu o le [Alii] ua uma ona fai mai ia te [i tatou] le mea e faia.”10
O lena faatuatua le mafaagaeetia i le taimi o tofotofoga e fausia ai le mausali o alii ma tamaitai ma tuuina atu le auala mautinoa, ma mautu a o agi tetele mai afa faataumaoi malolosi. O se tasi o fua o se faatuatua faapena e faapea o i latou o e mauaina o le a i ai i se tulaga e faafaileleina, ma laveai mai, ma faamanuiaina isi. Vaai faalemafaufau i le mafanafana na lagonaina e Reddick Allred ina ua ia vaaia le kamupani taavale tosolima ua oo mai i lona nofoaga. Vaai faalemafaufau i le olioli na lagonaina e le kamupani ina ua latou vaai ia te ia!
Ia Manatua lo Latou Lotogatasi
Ia manatua o le au paionia, i se tulaga lautele, sa tasi i latou. Ua matauina e tagata tusi talafaasolopito o le malaga i sisifo o le au Paia o aso e gata ai sa ese lava mai isi malaga a Amerika i Sisifo.
“Sa avea i latou moni lava o ni nuu i luga o le savaliga, o nuu o le faatuatua, lotogatasi, ma le puleaina e lei iloaina muamua lava i se isi mea i luga o auala sopo i sisifo. …
“Na oni nai tagata malaga mai o Kalefonia po o Oregon na tuuina atu se manatu i tagata o loo mulimuli mai ia i latou. … Ae e le faapena Mamona. O le manatu muamua o le aumalaga paionia o le mautinoa ua lelei nofoaga o tolauapiga, fafie, vai, le vao, ia fua le mamao ma faatuina pou o maila. O i latou ma kamupani na sosoo mai na latou punonou o latou tua e fausia ni alalaupapa ma eli i lalo aega maualuluga o vanu. Na latou faia foi ni vaa ma tuu ai mo le faaaogaina e kamupani o mulimuli mai.”11
O le mafuaaga o lenei eseesega ona o tagata o le Ekalesia na o mai e atiina ae Siona. I se faaupuga talafeagai, o Siona o “Ia taitasi le tagata ma manatu [taua] i lona uso e pei o ia lava, ma faia[le] amiomama ma mea paia i luma [o le Alii]” (MF&F 38:24). Siona—o se nuu o tagata e tasi le loto ma tasi le mafaufau, e nonofo i le amiotonu, ma e leai se mativa ia i latou (tagai i le Mose 7:18)—sa avea ma o le a avea o se taunuuga e “saili ai e tagata taitoatasi le lelei o lē la te tuaoi, ma faia mea uma i le manatu tasi i le mamalu o le Atua” (MF&F 82:19).
O lenei lagona o le nuu ma le tiutetauave o le popolega tutusa e fua mai ai se taumafaiga tuufaatasi e mulimuli i le perofeta a le Atua. O se mafuaaga tupito lea o le faamanuiaina o paionia e pei ona latou i ai, ma o se vaega taua o le talatuu e tufa mai ia i tatou. E musumusu mai i latou faapea o i tatou foi o le a faamanuiaina e ala i le mana o le Alii pe afai lava o le a tatou galulue faatasi ia tasi ma se lagona o le tiutetauave faalenuu ma le felagolagomai i le mulimuli i perofeta a le Alii.
Ia Tuufaasolo le Agaga o Paionia
Tatou te nafa ma le totoina i a tatou fanau ma fanau a fanau le agaga lava lea e tasi na taitaia tulagaaao o le au paionia. O se lesona faigofie i le ala e faia ai lenei mea e mafai ona vaaia i le aiga o Muñoz o Otavalo, Ekuatoa. Ia Mati 2013, sa ou feiloai ai ma Uso Juan José Muñoz Otavalo, lona faletua o Laura, ma se tasi o le la fanau tama, o Juan Amado, ina ia aoao e uiga i o latou taimi i le Ekalesia. Sa ou aoaoina o Uso Muñoz o se tasi o uluai tagata liliu mai i Otavalo.
A o laitiiti, na tuuina atu ia Uso Muñoz se kopi o le Tusi a Mamona i le gagana Sipaniolo. Na te lei faitauina, ae sa ia lagonaina se mana maoae ma le agaga pe a uuina. Sa ia natia ai i lona fale, ona sa ia iloa e faaleagaina e ona uso.
Mai lea taimi i lea taimi na te ave le tusi mai lona nofoaga na natia ai, e tau lava ina ia uuina ma lagona ai lona mana. I le onosaia ai o le fili ma faigata, sa ia auai i le Ekalesia ma avea ma se tasi o faifeautalai muamua ua tofia mai le nuu o Otavalo. Mulimuli ane, na ia faaipoipo i se tasi o tamaitai ua maea lana misiona faafaifeautalai, ma la tausia faatasi se aiga faamaoni, e totonugalemu i le talalelei. Sa ia auauna atu ma le faamaoni o se taitai i le Ekalesia ma fesoasoani e faaliliu le Tusi a Mamona ma sauniga o le malumalu i lana gagana moni lava o Quichua.
O Juan Amado, o se faifeautalai ua maea lana misiona, sa tagi a o matou faalogologo atu ia Uso Muñoz o loo faamatala mai lana tala o le faatuatua. Ina ua faaiu le tala a lona tama, na fai mai lenei atalii lelei: “Ou te talisapaia pea uluai paionia o e na sopoia laufanua valevalenoa faatasi ma a latou taavale tosolima i Amerika i Matu. O lo latou faatuatua ma le tautino ma le faapaiaina na musuia ai au ma na matua ootia ai lo‘u olaga atoa. Ae, faatoa ou iloa i le aso, o loo i ai foi iinei paionia i Otavalo, ma o o‘u matua! O lenei mea ua tumu ai au i le olioli.”
Ua aoao mai i tatou e Uso ma Tuafafine Muñoz e tatau ona tatou tuufaasolo atu se talatuu o le faatuatua e ala i le avea ma se paionia—e ala i le tatalaina, faaali atu, ma ola ai i le ala o le talalelei mo isi e mulimuli ai. Pe a tatou faatinoina pea lava pea le faatuatua i le Alii ma taulaina o tatou agaga ma le faamoemoe ia te ia, tatou te avea ma “mautinoa ma le mausali ai, ma faatumulia ai pea i galuega lelei e le aunoa, ma taitaiina ai e viia le Atua” (Eteru 12:4). Ona, pei lea o Reddick Allred, o le a tatou auauna atu ia i latou ua leiloloa i le ala o le olaga, ma o i latou—e aofia ai tupulaga o le lumanai—o le a aoao mai ia i tatou le mana ma le filemu o se olaga faapena.
Na matauina e Elder M. Russell Ballard o le Korama a Aposetolo e Toasefululua:
“O le la’uina o ni nai meatotino i totonu o taavale solofanua po o taavaletosolima ma le savalia o le 1,300 maila (2,090 km) e le o le auala lea o le a talosagaina ai le toatele o i tatou e faaali atu lo tatou faatuatua ma le lototele. E ese foi ni luitau ua tatou feagai ai i aso nei—ese foi mauga e aea, ese vaitafe e asaina, ese vanu e fai ia “fua mai e pei o le aute” (Isaia 35:1). …
“O a tatou tauiviga o loo maua i le ola ai i se lalolagi ua lilofia i le agasala ma le faaleagaga lea e foliga mai o le faaloloto, le faamaoni, ma le matapeapea o loo i ai i soo se mea. O se tasi o togavao o aso nei o le fenumiai ma savali feteenai.”
E tatau ona tatou le faasamasamanoa e tusa ai ma poloaiga a le Atua, na faaopoopo mai ai Elder Ballard. “Aloese mai faaosoosoga ma mea leaga o le lalolagi, e manaomia ai le faatuatua ma le lototoa o se paionia moni o aso nei.”12
Ia mafai e i tatou taitoatasi ona faapea foi ona tautino e avea ma se paionia ma e muamua atu, ma tatala le ala mo isi o e o loo featofai e se lalolagi ua lilofia i le agasala, o le le mautonu, ma le masalosalo. Ia tatou manatua o le au paionia ma a latou tala, ia manatua, sa oo ina latou fausia Siona i se taumafaiga tuufaatasi, ma talia le tiutetauave e totoina se faatuatua faapea i e uma tatou te feiloai—ae maise lava i le tupulaga faia‘e—ma e faia lea e ala i le ofoina atu o la tatou lava “taulaga o le ola” (Roma 12:1) o se olaga e uunaia e le faatuatua i le Alii o Iesu Keriso ma taula i le faamoemoe o mea lelei e o mai ia te ia.
O le avea ma se paionia o lona uiga ia “tatou le faavaivai i le faia o mea lelei” (MF&F 64:33). E le masalomia lava e lei lagonaina e Weltha Hatch se taua faapitoa i le papatisoina o ia i se vaitafe aisā. Pe na manatu foi Isaac Nash i le taua tele o le togiina o le tapaa ua lamuina i le eleele. Ma e pei foi o Reddick Allred, na faigofie lava lona faia o le mea na fetalai mai le Alii e tatau ona ia faia.
Mai mea uma o nei mea laiti ma faatauvaa ua oo mai ai se mea e tele! O lea ia tatou manatua o loo i ai ni mea laiti i se taumafaiga tele. A o tatou ola i le talalelei, mulimuli i le perofeta, filifili le faatuatua i le masalosalo, ma faia mea laiti e tupu ae le faatuatua ma fua mai ai le faamoemoe e taulaina ai le agaga, o le a avea i tatou taitoatasi ma se paionia, e saunia le ala mo isi e mulimuli ai.
“O le tupe na tou aumaia o le a faaaogaina e fesoasoani e fausia ai le pulelaa o le malumalu,” na tau atu e le Perofeta o Iosefa Samita ia Ira Hatch i le la feiloaiga muamua. I le uunaia e le Perofeta, na papatisoina Ira ma siitia atu ma lona toalua mai Niu Ioka i Katelani, Ohaio.
Ata na tusia e Dan Burr; ata mai faaaloaloga a le Church History Library; ata faavaa mai faaaloaloga a kittimages/iStock/Thinkstock
Ata na pueina o le aiga o Muñoz mai le faaaloaloga a Elder Marcus Nash