Seleseleinao Taui o le Amiotonu

“Pe faapefea ona ou tuu popolega faalelalolagi i se vaaiga lelei a o ou taumafai e ausia le alualu i luma faaleagaga?”

Tatou te avea o se vaega tele o lenei lalolagi. O vaega faaletino o le ola ai lea aso ma lea aso o se luitau patino. E foliga mai e vaai le lalolagi i mea uma e ala i le tioata o taui faalelalolagi.

O loo faamamafa mai i le faatomuaga o le Mataupu Faavae ma Feagaiga le faafitauli lava lea e lapataia ai i tatou i mea matautia, tuu mai ia i tatou le taitaiga e saunia ma puipuia i tatou i le taimi nei ma i le lumanai, ma tuuina mai malamalamaaga taua i lenei mataupu: “Ua latou le sailia le Alii e faatu lana amiotonu, ae ua taitoatasi le tagata ma savali i lona lava ala, ma tusa ai ma le faatusa o lona lava atua, o lona foliga ua tusa ma foliga o le lalolagi, ma o lona uiga o lena o se tupua” (tagai i le MF&F 1:16).

Na aoao mai Peresitene Spencer W. Kimball (1895–1985) o tupua e mafai ona aofia ai ni faailoga, tikeri, fanua, fale, meaafale, ma isi mea faitino faaletino. Sa ia fai mai pe a tatou siitia atu i nei sini agavaa i se auala e faaitiitia ai lo tatou tapuai i le Alii ma e faavaivaia ai a tatou taumafaiga e faatuina Lana amiotonu, ma faatino le galuega o le faaolataga i fanau o le Tama oi le Lagi, ua tatou fatuina ni tupua.¹

O nisi taimi o tioata o le lalolagi e mafua ai ona tatou taulai atu i faafitauli e fai lava si le maoae o le sailia ia mauaina o le oa silisili ae e le aveese ai i tatou mai le tautinoga loloto faaleagaga.

O le tele o tausaga ua mavae, sa tau mai ai ia te au i se faaaliga matagofie lea sa i ai nisi o vaaiga uiga ese. O vaaiga eseese na faaali mai ai i lalo ifo o se fua tele e faitauina, “Pe a afio mai Keriso i le po nei, o ai o le a afio mai ai o Ia?” Afai ou te manatua le faaali sao mai o ata, sa i ai ia vaaiga nei:

• Se tamaitai ma‘i, matua i le moega o loo i ai se teine tausimai.

• O se tina fiafia talavou ma se pepe faatoa fanau mai.

• O se aiga o i ai fanau o loo fia aai, ma o loo fetagisi.

• O se aiga mauoa.

• O se aiga matagofie ae faamaualalo ma fanau e toatele o loo pepese fiafia faatasi.

Ua tatou iloa pe a toe afio mai le Faaola, tatou te le iloa le aso po o le itula. Ua tatou iloa foi i le avea ai ma Kerisiano, tatou te tausi i e matitiva ma e le tagolima ma le fafine ua maliu lana tane ma le tamaitiiti matuaoti. E ui i lea, semanu e sao le faitauina o le tagavai, “Afai e afio mai Keriso i le po nei, o ai ua saunia e faafetaiai ia te Ia?”

O lo‘u manatu lona lua na ta’u mai e vaaiga ia i matou mea uma e uiga i le tulaga faaletino o tagata ae e leai se mea e uiga i lo latou tulaga faaleagaga ma le tautinoga ia Keriso.

O le vaega amata mo le iloiloina o o tatou olaga ma le tautinoga i le Faaola ma Lana talalelei o le papatisoga. Sei vagana ai tagata fou liliu mai ma tamaiti laiti tele, o la tatou papatisoga na faia i le tele o tausaga ua tuanai.

Ma na saunoa ma le mana le perofeta sili o Alema ia i tatou ina ua ia faapea mai: “Ou uso e, afai ua oo ia te outou se liuga o le loto, ma afai ua outou lagona le fia pepese i le pese o le alofa togiola, ou te fia fesili atu, e mafai ea ona outou lagonaina nei? (Alema 5:26).

Ona faaauau lea e Alema lana savali maoae, lea e taua i o tatou aso. Ua ia fesiligia ma le manatu i le Au Paia, pe latou te feoti ea, pe afai ua latou saunia e fetaiai ma le Atua. Ona faamamafa mai lea e Alema uiga taua se fa tatou te manaomia ina ia mafai ona le pona ai i luma o le Atua:

Muamua, “ua lava lo [tatou] lotomaualalalo?” I se tulaga, o se toe foi lea i le tulaga manaomia mo le papatisoga—faalotomaualaloina i tatou lava ma maua le loto momomo ma le agaga salamo.

Lona lua, “ua tafi ese ea le faamaualuga mai ia te [i tatou]?” Ua lapatai mai Alema e faasaga i le soliina o le Paia e Toatasi i lalo o o tatou vae ma le faafefeteina i le faamaualuga—ma tuu o tatou loto i luga o mea le aoga o le lalolagi ma manatu ua sili i tatou i lo isi.

Lona tolu, pe ua tatou “tafiesea mai le mataua?” Mo i latou o e ua tele faamanuiaga ae le lagonaina le agaga faafetai ona ua latou uai atu i mea o loo maua e isi, e mafai ona matautia le losilosivale. O le “Ituaiga olaga o le losilosivale”² ua faateteleina a o suitulaga le lauiloa ma le mauoa i le faatuatua ma le aiga i le avea ai ma faamoemoega autu mo le toatele o le lalolagi.

Lona fa, mata o tatou tauemu pe sauaina o tatou uso ma tuafafine? I le lalolagi i le aso atonu tatou te taua lenei mea o le sauaga (tagai i le Alema 5:27–30, 53–54).

Mata e sili atu ona talafeagai i faafitauli o o tatou aso lenei savali e uiga i le lotomaualalo, faamaualuga, losilosivale, ma sauaga? O le finauga tele i le tele o le salafa o le lalolagi e faatatau i mataupu tau le tamaoaiga o aso taitasi. Ae ua itiiti le talanoaga e uiga i le toe foi atu i mataupu faavae faa-Keriso e taulai atu i le sauniuni e fetaiai ma le Atua ma i luga o le tulaga o o tatou agaga. E tatau ona taulai atu o tatou olaga ma faateleina lo tatou faamamafa i mea faaleagaga.

Ata

A family interacts in a wheat field on a cloudy day.

“Faamata e tatau ona tatou tausia o tatou aiga i eria ia e toalaiti ai tagata o le Ekalesia ma ua siomia i tatou i le tele o le leaga, finauga, ma le tetee i le amiotonu?”

O maua ma lo‘u toalua, o Maria, na i ai nei popolega a o maua amata ona tausia la maua fanau i le Eria o San Francisco Bay i Kalefonia, ISA, i le faaiuga o le 1960. Sa matua toalaiti le faitau aofai o le Au Paia o Aso e Gata Ai. Ae a o amiolelei le toatele o tagata, sa amata ona avea le Eria o Bay ma se maneta mo le faaaogaina o fualaau faasaina ma uiga leaga uma ma amioga agasala.

O le suiga i le sosaiete na matuai iloagofie lava lea na talosaga ai se peresitene popole o le siteki i taitai o le Ekalesia pe tatau ona ia uunaia tagata o le Ekalesia ina ia nonofo pea i le Eria o Bay. O Elder Harold B Lee (1899–1973), lea sa sinia i le Korama a Aposetolo e Toasefululua i lena taimi, sa tofia e tautalagia le mataupu. Sa ia faamatala mai sa lei musuia e le Alii le fausiaina o se malumalu i lo matou eria, ina ia tuua ai e tagata le eria. O lana fautuaga ia i matou sa faigofie ae loloto:

1. Fausia Siona i o matou loto ma aiga.

2. Ia avea o se faataitaiga ia i latou o loo tatou nonofo faatasi.

3. Taulai atu i sauniga o le malumalu ma mataupu faavae o loo aoao mai iina.

Sa matou faapelepele i le fautuaga a Elder Lee ma taumafai loa e mulimuli i ai i lo matou aiga.

I le fausiaina o Siona i o tatou loto ma aiga, e tatau ona tatou faamamafa atu le tausia o tulaga faalelotu i le aiga e ala i tatalo faaleaiga i aso taitasi ma le suesueina o tusitusiga paia ma e ala i le faia o afiafi faaleaiga i vaiaso taitasi. I lenei tusiga e mafai ona tatou aoao atu ma aoaoina a tatou fanau. Tatou te faia lenei mea i le alofa ma le agalelei, aloese mai le tele o le faitioina o a tatou fanau ma o tatou taitoalua.

E tusa lava po o fea o tatou nonofo ai ma e tusa lava pe afai o tatou faia mea uma i le sao, o nisi o fanau e faia ni filifiliga le lelei e taitai atu i ala faasaina. O lea la, e taua le fesoasoani i o tatou tagata talavou e iloa muamua mea o le a latou tautatala ai po o mea latou te faia pea fautuaina e isi ni uiga le talafeagai ma le le mama.

Sa auai la maua fanau i aoga ia e na o le toalua pe toatolu ni fanau o le AAG [e auai ai]. I le amataga o tausaga faaleaoaoga taitasi, ma a o lei amataina gaoioiga a le aoga, matou te talanoaina i le afiafi faaleaiga tali talafeagai pe afai latou te maua i latou lava i tulaga fetuutuunai. Sa ma fesili atu ia te i latou po o le a le latou tala e fai atu i uo e ono tau atu ia i latou e, “Aua le faavalevalea, e faia e tagata uma,” “E le iloa e ou matua”, po o le “E le afaina le na o le tasi lava.”

Sa matou talanoa e uiga i la matou tali atu i le Alii.

Sa ma faailoa atu tatou te mulimuli i faataitaiga a Keriso pe a tatou ofu i ofu talafeagai, faaaoga gagana mama ma le talafeagai, ma aloese mai ponokalafi, lea e manaomia nei ona aoaoina e tamaiti o le vaitausaga o le Peraimeri ina ia mafai ona latou maua se olaga mama.

Na matou talanoa e uiga ia Iosefa o Aikupito, o le na sola ese ina ua fetaiai ma taulaiga le talafeagai mai le toalua o Potifara (tagai i le Kenese 39:7–12).

O ma fanau taitoatasi e le itiiti ifo ma le tasi se mea na tupu lea na taua ai lenei sauniuniga, ae o le tele lava o taimi sa puipuia i latou e a latou uo ona sa latou iloa o latou tulaga faatonuina ma talitonuga.

Ina ua valaau mai lo ma afafine, o Kathryn, i lona tina i le mavae ai o le alu ese atu i le kolisi, e tau atu e Maria ia te ia mea na te fiafia i ai e uiga i le Faaola. E faaaoga soo e Maria Ana faataitaiga ma uiga tauleleia e fesoasoani ai i le faafitauli na valaau mai ai Kathryn e talanoaina.

Ou te talitonu e mafai ona tatou tausia ni fanau amiotonu e toetoe lava o soo se vaega o le lalolagi pe afai latou te maua se faavae mausali ia Iesu Keriso ma Lana talalelei. Na faamatala e Nifae le aoaoina o lona aiga ma le nuu faapea, “Ma ua matou tautalatala e uiga ia Keriso, ua matou olioli ia Keriso, ua matou talai atu Keriso, ua matou vavalo e uiga ia Keriso, ma ua matou tusitusi foi e tusa ma a matou valoaga, ina ia mafai ona iloa e a matou fanau po o le a le puna e mafai ona latou tepa taulai i ai mo se faamagaloga o a latou agasala” (2 Nifae 25:26).

Afai tatou te faia lenei mea, pe a faia e a tatou fanau ni filifiliga le lelei, o le a latou iloa o mea uma e le o leiloloa ma e mafai ona latou maua lo latou auala i le aiga. Ou te manao e faamautinoa atu ia te oe e faapea o oe ma lou aiga o le a faamanuiaina a o e taumafai e faamalosia tagata taitasi o lou aiga e ala i le faatuatua i le Alii o Iesu Keriso.

Afai tatou te mulimuli i fautuaga a Elder Lee e avea ma se malamalama ia i latou o tatou nonofo faatasi, e le mafai ona tatou nanaina o tatou tulaga faatonuina. O a tatou amio e tatau ona atagia ai o tatou tulaga faatauaina ma talitonuga. Pe a talafeagai ai, e tatau ona tatou auai i gaoioiga faitele.

O le ola agavaa mo se pepa faataga o le malumalu, mauaina o sauniga o le malumalu, ma le faamaoni i a tatou feagaiga tatou te maua ai le taulai atu ma le vaaiga mamao e tumau ai i le ala o le feagaiga. Pe a ola agavaa o tatou talavou e faataunuu papatisoga mo e ua maliliu, o le a faatulaga lelei o latou olaga.

E tatau ona taulai atu lo tatou malosi i le faamalolosia o tatou aiga e ala i le talanoa, olioli, talai atu, ma vavalo atu ia Keriso ina ia mafai ona tatou olioli i le taui o aiga amiotonu ma avea ma aiga e faavavau.

Mo i latou e le’i faia ni toalua ae o loo ola i ni olaga amiotonu, o la tatou aoaoga faavae e mautinoa: “O tagata faamaoni o le ekalesia o o latou tulaga e le faatagaina ai i latou e maua faamanuiaga o le faaipoipoga e faavavau ma le tulaga faamātua i lenei olaga, o le a mauaina faamanuiaga folafolaina uma i le faavavau, pe afai latou te tausia feagaiga sa latou osia ma le Atua.”³

Ata

A family interacts in a wheat field on a cloudy day.

“O a ni tulaga lelei e tatau ona ou tuuina atu i la‘u fanau ina ia fiafia ma faamanuiaina i le olaga?”

Ua fatuina e Lusifelo se taufaasese po o le faatosina o le fiafia e le ogatasi ma le amiotonu ma o le a taitai sese ai i tatou pe afai tatou te le mataala. O le tele o o tatou faafitauli i le aso e tutupu ona ua saili e le lalolagi faaletino se faauigaga le sao o le fiafia. Ua tatou iloa mai le Tusi a Mamona na i ai lenei faafitauli i tupulaga uma. Ua tatou iloa foi faamanuiaga e oo mai i le ola ai i poloaiga.

Ua taua e le Tupu o Peniamina, “Ou te manao ia outou manatunatu i le tulaga manuia ma le fiafia o i latou o e e tausi i poloaiga a le Atua. Aua faauta, e faamanuiaina i latou i mea uma, i mea uma faaletino ma faaleagaga; ma afai latou te tutumau i le faamaoni e oo i le iuga, e talia i latou i le lagi, ina ia mafai ona latou mau faatasi ma le Atua i se tulaga o le fiafia e lē gata. E, ia manatua, ia manatua lava ua moni nei mea; ona ua fetalai mai ai le Alii le Atua” (Mosaea 2:41).

I le tele o tausaga ua ou mulimuli i se galuega faatino o le sailiiliga lea na amata i le 1930. I le amataga, o le suesuega e aofia ai alii e 268 i se tasi o iunivesite sili ona lelei o e na suesueina e le aunoa i o latou olaga atoa. Mulimuli ane, na avea tamaitai ma vaega o le suesuega. O le suesuega na aofia ai pe tusa ma le 70 tausaga. O le sini o le uluai suesuega o le sailia lea o le tele o mea e mafai ona maua e uiga i le faamanuiaina ma le fiafia.

Na faaali mai i le suesuega o togi ulufale mo le kolisi ma le togi averesi e le i muai iloa uma ai le faamanuiaina po o le fiafia mulimuli ane i le olaga. Ae o se tasi o eria lea sa i ai se faamaopoopoga maualuga o le fiafia faaleaiga o le olaga faatamaitiiti. O tagata matutua fiafia ma faamanuiaina e masani ona lipoti mai sa faaleo atu e o latou tina le alofa ma le fiafia ma sa lei faaaogaina ni aoaiga ogaoga. O o latou matua uma e lua sa faaali atu i le faaletino le fealofani ma le tasi ma na avanoa ma fiafia ia latou fanau, lea na latou maua ai ni sootaga o fesootaiga mafanafana ma le faalelagona. Na fatuina e matua se siosiomaga o le aiga mautu ma sa talitonu na faaaloalogia le filifiliga saoloto a a latou fanau.

O se tusi faaiu i le suesuega na lolomi i le lipoti o le 2012: “O le fuataga tele o le manuia i le olaga atoa e muai iloa le itiiti o le ola faalagolago e ala i le manuia vave i maea tautupe ma agafesootai nai lo se olaga faatamaitiiti alofagia ma alofaina.” O se olaga faatamaitiiti mafanafana e uunaia le tele o mea e ausia nai lo le atamai, vasega masani, po o se tagata malosi. Na maua foi e suesuega “o le mea e sao ona faia i le olaga faatamaitiiti e sili atu ona vave ona iloa ai le lumanai nai lo le mea e sese ona fai.”⁴

O le suesuega atoa ua faailoa mai ai e tusa lava pe o i ai ni luitau iloga ma sese tele nisi o mea, e toatele fanau e malolosi, ma e mafai e le faatuatuaina ona fausia sootaga alofa ma matua, aemaise le tina, ona i ai taunuuga o le fiafia tumau, i le olaga atoa. O le mea na malie ia te au, ae e lei maofa ai, o le suesuega na fetaui lelei ma tusitusiga paia ma mea e aoao e le Ekalesia e uiga i le aiga. O loo faamamafaina mai e le Ekalesia afiafi faaleaiga, tatalo faaleaiga, faaali atu o le alofa, o faatasiga faaleaiga, ma tu ma aga faaleaiga, o ituaiga ia o gaoioiga na tauina mai i le suesuega e maua ai tagata matutua fiafia ma faamanuiaina.

Sa amata e Nifae le Tusi a Mamona i le faaalia o le agaga faafetai mo “matua lelei” (1 Nifae 1:1), ae o le lesona moni lava tatou te iloiloina taitoatasi le ituaiga o matua o le a avea ai i tatou ina ia mafai e a tatou fanau ona lipoti fiafia ua latou fananau mai foi i ni matua lelei.

O le mea e aupito sili ona taua e mafai ona e faia ina ia mautinoa e iloa e lau fanau ma i latou e te faafaileleina e te alofa ia i latou. O le alofa o le elemene autu i le fiafia.

Ata

A family interacts in a wheat field on a cloudy day.

“E le’o ausia e lo matou aiga le manuia faaletino maoae. Pe o lena mea ona e le o lava lo matou amiotonu?”

O tusitusiga paia e manino o le ola ai i poloaiga e faataga ai i tatou e faamanuiaina i le laueleele. Ae sei ou faamautinoa atu ia te oe o le faamanuiaina i le laueleele e le o faauigaina e ala i le tele o lau teugatupe i le faletupe. E i ai se uiga tele atu nai lo lena.

I le talanoa atu i lona atalii o Helamana, na aoao mai le perofeta o Alema, “O le tulaga e oo i ai lau tausiga o poloaiga a le Atua o le a e manuia i le laueleele; ma e tatau foi ona e iloa, e faapea o le tulaga e oo i ai lau le tausia o poloaiga a le Atua, o le a vavae ese oe mai ona luma” (Alema 36:30).

O lea la, o le mauaina o le Agaga i o tatou olaga o le elemene autu i le faamanuiaina i le laueleele. Afai tatou te tausia poloaiga, tatou te maua foi folafolaga patino faapitoa (tagai i le Efeso 6:1–3). Mataupu Faavae ma Feagaiga vaega e 89, mo se faataitaiga, o folafolaga, e ala i le ola ai i le Upu o le Poto, o le a tatou olioli i faamanuiaga o le soifua maloloina ma oa sili o le malamalama.

Faaesea o se tasi o elemene o le Upu o le Poto, aloese mai le ava malosi, o se aoaoga. Sa maua e le suesueina faaumiumi na ou ta‘ua muamua o le sauaina i le ava malosi e aafia ai le toatasi o aiga Amerika mai i le tolu, e aofia ai le kuata o tagata e tuuina atu i falemai aoao, ma o se mafuaaga autu o oti, o le tatalaina o faaipoipoga, soifua le lelei, ma le faaitiitia o mea e ausia.

O se suesuega mo se taimi umi o tagata toaaga o le Ekalesia i Kalefonia na maua ai o tamaitai e ola i le averesi 5.6 tausaga ma o alii o le 9.8 tausaga e sili atu ai nai lo le faatusalia i tamaitai ma alii o le I.S. Na faailoa mai e fomai na faatautaia le suesuega e le itiiti ifo ma se tasi le mafuaaga, o le usitaia o le Upu o le Poto. O le ola ai i le Upu o le Poto e mafai ai ona tatou manuia i le laueleele.⁵

I se ma talanoaga ma Peresitene Gordon B. Hinckley (1910–2008) i se vaalele i le faapaiaga o se malumalu, sa ia fiafia ma lipoti mai faapea ua i ai i le Ekalesia tupe o le a faateleina ai le aofai o malumalu aua sa faamanuiaina le Au Paia o Aso e Gata Ai i le laueleele. I le avea ai ma tagata totogi sefuluai faamaoni, ua latou tuuina atu punaoa e fausia ai malumalu.

O le faamanuiaina ma le tamaoaiga e le tutusa lava. O se faauigaga sili atu o le faamanuiaina i le laueleele o le mauaina lea o mea ia lava mo o tatou manaoga a o maua le anoanoai o faamanuiaga o le Agaga i o tatou olaga. Pe a tatou tausia o tatou aiga ma le alofa ma auauna atu i le Faaola, o le a tatou olioli i le taui o le mauaina o le Agaga ma le manuia i le laueleele.

Na folafola mai le atoatoa o le taui o le amiotonu ua faatulaga manino mai i le Mataupu Faavae ma Feagaiga 59:23: “Ae ia iloa o [le] e faia galuega o le amiotonu o le a maua [lona] taui, o le filemu lea i le lalolagi lenei, ma le ola faavavau i le lalolagi a sau.”

E silia ma le 35 tausaga talu ai, na aoao mai ai Peresitene Kimball o le faatupulaia autu o le a tupu i le Ekalesia ona o le toatele “o tamaitai lelei … o le a tosina mai i le Ekalesia i ni vaega toatele.” Na ia folafola mai, “O le a tupu lenei mea i se maualuga e faapea ona atagia mai ai i tamaitai o le Ekalesia le amiotonu ma le tulaga lelei i o latou olaga … oni tamaitai iloga ma le tulaga ese—ini tulaga fiafia—mai tamaitai o le lalolagi.”⁶

O lenei mea na tupu moni lava, ma o le a faaauau pea ona faia faapea i le lumanai.

O le Alii le Atua e moni lava o se la ma se talita, ma o le a tuuina mai le alofa tunoa ma le mamalu. E leai se mea lelei o le a taofia mai ia i latou e savavali saʼo (tagai i le Salamo: 84:11). O la‘u tatalo ina ia mafai ona outou selesele taui o le amiotonu a o outou mulimuli ma le faamaoni i lo tatou Alii ma le Faaola o Iesu Keriso.