Mauaina o Mea Uma o I Ai i Le Tama: O Se Faataoto i Ona Po Nei

Ata

Illustration of a young man wearing a suit and tie.

Sa saunia se alii talavou e auauna atu i se misiona. Na malilie ona matua e totogi lana misiona pau lava le mea ia tausia e ia tulafono o le misiona ma galue malosi. Sa ioe o ia.

Ina ua uma ona ulufale atu i le misiona, sa ia iloa ai o le galuega faafaifeautalai e faigata tele nai lo le mea na ia manatu i ai. O le aoaoina o se gagana fou, fetuunai i se aganuu e ese mai ai, ma le feagai ai ma le teenaina na faavaivai ai o ia. Na taumafai lana peresitene o le misiona ma lana soa e faamalosiau ia te ia, ae sa ia lagonaina pea le fiu.

Sa ia ta‘u atu i lana peresitene o le misiona sa ia manao e alu i le fale. Sa valaau atu lana peresitene o le misiona i le tama o le alii talavou ma tuuina atu ia te ia le faatagaga e valaau atu ai i lona atalii.

Sa ta‘u atu e le faifeautalai i lona tama e uiga i lona lotovaivai. Sa fai mai lona tama, “Mo le tele o tausaga na ma tulimatai atu ma lou tina i le aso o le a e auauna atu ai i se misiona talai. Ua tatou iloa le taua o le aoao atu o le talalelei a Iesu Keriso ia i latou e le o mauaina.”

Sa tali mai le atalii, “Tama, ou te lei iloa e taua tele ia te oe lou faia o se misiona.”

“E taua tele ia te au,” na tautino atu ai le tama. “Sa ou galue i lou olaga atoa ma faasaosao se tupe ma lou faamoemoe e tasi ia te: oe. Sa ou faamoemoe lava e saunia o se tofi tele mo oe.”

“A e, Tama,” le tali atu o le atalii, “ua faigata tele le galuega ma ou te le fiafia i ai …”

Na faasalaveia e le tama, “E faapefea ona ou tuu atu la‘u pisinisi ia te oe pe a e le faamaoni e auauna atu i le Atua mo ni tausaga pupuu se lua?”

Sa leai se tali a le tama ae na o le mafaufau i le fesili a lona tama.

Ona fai atu lea o le tama, “Lo‘u atalii e, a e faamaoni i lenei valaauga ma faamaonia lou lava agavaa i mea uma, ou te avatu ia te oe au mea uma.”

I le ootia ai i lenei folafolaga, sa fai atu le atalii ma le lototele i lona tama, “O le a ou nofo.”

Sa nofo le atalii i le misiona, ma sa auauna atu ma le faamaoni. Sa ia mulimuli i tulafono o le misiona ma galue malosi. Ioe, i se taimi ina ua maea lana misiona, sa ia maua mai lona tama le tofi na folafolaina, e oo lava i mea uma a lona tama.