Tusitusiga Paia mo Spencer

Ata

Product Shot from December 2015 Liahona

Ina ua faatoa uma ona ma faaipoipo ma lo‘u toalua, na uunaia e Peresitene Spencer W. Kimball (1895–1985) tagata o le Ekalesia e faitau tusitusiga paia i aso uma i o latou aiga. Sa ma mananao e mulimuli i le perofeta, o lea na ma filifili ai o le a ma faia faatasi o se ulugalii ona faia lea faatasi ma le ma fanau i le lumanai.

I tausaga mulimuli ane, ua faatupulaia lo matou aiga i le toalima o le fanau, e aofia ai le ma uii, o Spencer.

I se tasi taimi, ina ua ono tausaga le matua o Spencer, na ma o ese ma lo‘u toalua mo ni nai aso ma tuua ai tamaiti ma se tausi tama. Ina ua ma toe foi mai i le fale, sa ou nofo i lalo ma Spencer ma fesili atu ia te ia pe na faapefea mai mea uma a o ma ese atu.

Na ia fai mai ia te au na faigata ia te ia ona moe. Ina ua ou fesili pe aisea na te le‘i moe lelei ai, na ia mafaufau i ai ma sa fai mai na te lei iloaina.

Mulimuli ane i lena afiafi na amata e lo matou aiga la matou masani i po uma o le faitauina faatasi o le Tusi a Mamona.

Na faafuasei lava ona ee Spencer, “O lena!” Sa ou fesili atu po o le a le mea na ia fai mai ai. “O le mafuaaga lena na le mafai ai ona ou moe lelei i le po.”

“Aisea na le mafai ai ona e moe?” Sa ou fesili atu ai.

“Matou te lei faitauina tusitusiga paia i le po a o lua o, ma ou te fiafia lava i le lagona ou te maua mai i tusitusiga paia.”

Sa aoao Spencer o le faitauina o tusitusiga paia i aso uma e aumai ai ia i tatou le faamafanafanaga, filemu, ma le taitaiga a le Agaga Paia.

E mafai ona tatou aoao e fiafia i tusitusiga paia pe a tatou faitau i aso taitasi. Pe a tatou faia, o le a taialaina i tatou e le Agaga Paia ma faamalosia e ala i lo tatou Tama Faalelagi.