O Le Ola Ai o se Molimau i Siamani

Ata

Photo of a young adult woman, Esther Graf, in a field of flowers in Germany.

Ata mai faaaloaloga a Esther Graf

E na o le 30 minute e tietie ai i le nofoaafi mai le aai o Hannover ma olioli ma le filemu i totonu o le fia eka o fugalaau o laufanua o le tautotogo o loo i ai le tamai aai Siamani o Stadthagen. O le nofoaga lea na soifua ae ai Esther Graf e 19-tausaga-le-matua. O se nofoaga e te oo ai i soo se mea lava e ala i le savali po o le uila, se nofoaga e tumu ai auala i falefalaoa ma faleoloa aisakulimi, ma le nofoaga e faatumulia ai le sikuea o le aai i maketi i aso o le vaiaso.

O Stadthagen foi o le aiga i se nuu ua ola lauusiusi o Le Au Paia o Aso e Gata Ai.

E ui lava o le aai e laitiiti, o Stadthagen e i ai se uarota tele—o se mea e fou mo Siamani, lea e itiiti ifo ma le lima tagata lotu mo le tai 10,000 tagata Siamani. Ae mo Esther, o le nofoaga sili e aoao ai pe faapefea ona ola i mataupu faavae o le talalelei a Iesu Keriso ma pe faapefea ona faaaoga na mataupu faavae e auauna atu ai ma faamanuia ai isi.

Ina ua 14 tausaga o Esther, sa ia maua lona faamanuiaga faapeteriaka, lea na aumaia ai se malamalama taua. “Na faamanino mai ia te au le taua moni lava o au i le Tama Faalelagi,” o lana tala lea. “Sa ou aoaoina le taua tele o i tatou uma ia te Ia.”

Na te aveina lena malamalama ma faaaoga i lona sootaga ma isi.

I lona valaauga i le aufono a le siteki a talavou nofofua matutua, mo se faataitaiga, o ia e nafa ma le faamautinoaina ua lagona e tagata uma le faaaofia. “Ua ou aoaoina le taua o le aua le faitio i isi, ae nai lo lena ia faamasani ia i latou.”

Na te faatumauina foi lena mea i le mafaufau pe a i ai o ia i le aoga. “E fesiligia soo au e uiga i lau lotu, ae ou te le vaai i ai o se mea leaga i soo se itu,” o lana tala lea. “E ui i lea o taimi uma lava ou te fiafia ai ona e faigofie lava lou faamanatu ia te au lava ia le tele o lona fesoasoani ia te au ma le tele o mea na te aumaia i lou olaga. E ala mai i le talalelei ua ou iloa ai le tele o mea.

“O taimi uma e i ai lava tagata o e faia ni ulaga i lo tatou faatuatuaga ma e le malamalama i ai,” o lana tala lea, “ae e le leaga moni lava pe a tatou tutu e puipui mea ua tatou talitonu i ai.”

O le alofa o Esther ma lona faalagolago i le Atua e sili ona fesoasoani ia te ia i le ola ai ma faasoa atu le talalelei.

“Ae e te lei popole,” sa ia fai mai ai, “faalagolago muamua i le Atua. Pe a ou faia lena mea ma ou faatuatua, o isi mea uma e faigofie lava. Pe a tatou faalagolago i le Atua, e mafai ona tatou agai i luma i o tatou olaga ma le faatuatua ma talitonu i le lumanai. Pe a tatou faia lena mea, e mafai ona tatou ola o ni molimau a le Atua.”