“Sa ou Faia se Tautinoga i le Atua”

Saunia e Néstor Curbelo

Faufautua o Talafaasolopito o le Ekalesia, Eria i Saute o Amerika i Saute

Sa faatuina le Ekalesia i Guayacana, Ekuatoa, e faafetai tele ai ia Virgilio Simarrón, o lē na faia se faaiuga faigata ina ia tumau faamaoni i lana molimau.

Ata

Group of people in the Guayacana, Ecuador Branch

Ata pue mai faaaloaloga a le tusitala

O Virgilio Simarrón Salazar o se taitai i lona nuu moni o Kati o Ekuatoa i matu. E oo mai i lenei aso, o loo faatumauina e Kati lo latou ala tulaga ese o le olaga ma la latou lava polokalama o le faamasinoga i se aufono o le nuu, kovana, ma faamasino. O nei matafaioi faaletaitai e masani lava o ni tofiga o le mamalu e umia e aiga mo tupulaga ma o loo fausia i luga o se faavae loloto o le faaaloalo o le alalafaga ma le faatauaina. O le faaaloalo mo le tofiga o se tiute e tatau ona tausia lelei ma faasolo atu i le isi tupulaga.

Ae na suia fuafuaga a Virgilio Simmarón mo lona olaga i le 1996, ina ua toe foi mai lona atalii, o Wilson, mai le aoga i Quinindé faatasi ma ni kopi o le Tusi a Mamona ma se molimau mausali e uiga i lana tapuaiga fou. I le faatumulia ai i le faatuatua ma le naunautaiga o se tasi ua mauaina le upumoni, na faasoa atu e Wilson le savali o le talalelei i lona aiga, ma sa lei umi ae papatisoina i latou i le vai o le Vaitafe o Canandé.

A o faasoa atu e le au Simarróns le talalelei i uo ma tuaoi Kati, e ui i lea, se faatupulaia se feteenaiga matuia. Sa lagona e nisi tagata Kati o talitonuga o Virgilio Simarrón na avea ai o ia ma se tagata tetee ma na oo lava ina fuafuaina sauaga e faasaga ia te ia. Sa lagona e nisi, i le avea ai ma se kovana, e le tatau ona auai o ia i se faatuatuaga fou e ono fevaevaeai ai tagata. Faatasi ai ma lenei popolega, sa latou ave o ia e faamasino e le aufono a le nuu. O le a avea ma se tasi o aafiaga sili ona faigata i le olaga o Virgilio.

Na faamatalaina e Wilson le mea na tupu: “O le aufono, i le faapotopotoga atoa, na ta‘u atu i lo’u tama, ‘o le a e tumau i le avea ai ma lo matou kovana pe afai e te faafitia le Ekalesia a Iesu Keriso; e tatau ona e fulitua i ai.’ Na fai atu lo‘u tama, ‘Sa ou faia se tautinoga i le Atua, ma a fai e se tagata se tautinoga i le Atua, e le mafai ona fulitua i ai. E le mafai ona ou tuua le Ekalesia. Afai tou te manatu o au o se kovana ua vaevaeina tagata Kati, oi loʼu nuu e, ina filifili ia outou i le aso nei se isi tagata i lo‘u tulaga.’ Ona ou vaai lea i le vaaiga o lo‘u tama o loo tagi. Na i ai le filemu atoa i le aufono mo le silia ma le lima minute—e leai se tasi na faia se tala. Ona fai mai o se tagata, ‘Ia Kovana, alu ese.’ Na tu lemu lo‘u tama, o lea na matou agai atu ai i lalo ma lo’u tina, ma lo‘u tuafafine, ma tuua ai le aufono.”

Ina ua uma ona aveese Uso Simarrón mai lona ofisa, na mulimuli mai aso faigata mo le aiga. I le lagonaina o le inoino mai le toatele o e sa faaaloalogia muamua i latou, na liliu atu le aiga i le faatuatua sa latou taliaina ma talai atu le talalelei ma le finafinau tele. Na faamalamalama mai e lo latou peresitene o le siteki, o Omar Intriago Cesar: “Sa amata ona latou talai atu le talalelei mai lea fale i lea fale i aiga taitasi o lenei nuu. Sa amataina le Paranesi o Guayacana e Virgilio Simarrón ma lona alo, o Wilson. Sa faatuina le Ekalesia ona o lona faatuatua, o lona malosi, ma lana molimau.”

Ata

Baptism at the Canandé River

I na o ni nai tausaga, na fua tele mai taumafaiga a le aiga o Simarrón. O le aso 30 o Me, 1999, na avea ma se aso o le faamanatuina i Guayacana ina ua faia se sauniga papatisoga tele. Sa faamatala e Peresitene Intriago, “Na ma taunuu atu ma Roberto Garcia, le peresitene o le misiona, ma auai uma ai i lena aso mamalu, lea na i ai i luga o matafaga o le Vaitafe o Canandé, ni faifeautalai se toalua na papatisoina le 60 tagata. Ona, faamauina lea e Peresitene Garcia i le isi itu ao au i le tasi itu o i latou uma na papatisoina o ni tagata o le Ekalesia. O se avanoa o le a le mafai lava ona aveesea mai i lo‘u olaga.”

E ui lava ina tuua e Virgilio lona tofi faalekovana ina ia tumau faamaoni i lana molimau, sa mafai ona ia faasolo atu se isi talatuu i le isi augatupulaga: o le auauna atu i tagata e ala i le faatuina o le talalelei i totonu o i latou. Sa soifua o ia e vaai ia Wilson o auauna atu i se misiona talai ona toe foi lea i Guayacana e faaipoipo ai i lona faletua o, Ruta, ma maua ni fanau. I ni nai tausaga mulimuli ane, sa maliu Virgilio o loo faamaoni i le Ekalesia. Na soifua lona faletua o, Maria Juana Apa, e molimauina le valaauga o lo la alo, i le 2014, e avea ma peresitene o le paranesi i Guayacana.

E iloa lelei e Wilson le tupuaga na manao lona tama e tuuina atu ia te ia. “O o‘u tuaa sa avea pea ma kovana, o taitai o fitafita, o tagata tau malolosi,” o lana tala lea. “Ou te lagona o loo faaalia pea nei aa o augatama ia te au. Ae o lenei ua avea au o se tagata o le Ekalesia, o lena malosi uma ua fesoasoani ia te au e avea ma se fitafita lelei a Iesu Keriso.”