Na Faapefea ona Latou Iloa Lo‘u Manaoga?

Ata

Illustration depicting a young adult woman standing at a mailbox looking at a card.

Ata na tusia e Stan Fellows

Ua toeitiiti atoa le 20 tausaga talu ai sa ou maua ai lo‘u valaauga faamisiona e auauna atu i Iapani. Faatasi ai ma se naunautaiga tele ma sina popolevale, sa ou sauni e tuua mo la‘u misiona ia Ianuari. I le taimi lea o o‘u matua ua leai ni galuega.

Sa i ai le tupe mo la‘u misiona i le taimi lava ou te taunuu ai, ae sa tauivi lo matou aiga i mea tau tupe. Sa ou le mautinoa po o fea o le a ou maua ai se tupe mo le tapenaga e pei o lavalava o le misiona, atopau, ma isi mea e manaomia. Sa ou faigaluega faavaitaimi ae o le a le lava ai. Sa faapitoa lava lou popole pe o le a faapefea ona ou maua se tupe e talosaga vave ai mo se tusifolau ina ia ou mauaina i le taimi e tuua ai mo Iapani.

I se tasi o aoauli, i le naunautai, sa ou alu ai i lou potu ma aioi atu i le Tama Faalelagi. Sa ou faasoaina atu lou naunau e auauna atu i Iapani ma lou agaga faafetai o lau miti o le auauna atu i se misiona o le a vave ona faataunuuina. Sa ou taofiofi ou loimata, ma tau atu ia te Ia lou matuai manaomia o se $75 mo se tusifolau lea ou te lei mauaina lava. Ina ua ou tu i luga mai lau tatalo, sa ou iloa o le a lelei mea uma. Sa ou le iloa pe faapefea, ae o se filemu sa faamautinoa mai ia te au o le a saunia e le Alii.

Mulimuli ane i lena aso na ou tatalaina la matou pusameli ma maua ai se kata o le Kerisimasi i totonu. O le tagata na tuuina mai sa faia se taumafaiga malosi e aua le faailoaina mai. Sa leai se faailoga tusi i luga o le kata; na tiliva mai e se tagata.

I totonu o le kata na taina ai, “Malo Lava! O oe le tagata ua mauaina se galuega o le agalelei faa-Kerisiano. Manuia le Kerisimasi, Hannah. Ia manuia lau misiona.”

I totonu o le kata sa i ai se $100. Sa ou tu i lou faitotoa i luma ma tagi. Po o ai lava na faia lenei mea, pe na faapefea ona latou iloa lou manaoga?

I tausaga mulimuli ane, ou te lei iloa lava po o ai na aumaia le tupe i lou fale i lena aso. Ou te mafaufau pea e uiga i lena tagata, po o tagata, i le tele o taimi talu mai lena taimi. Sa latou faaalia le mea ou te talitonu i ai i le uiga o le saunoaga a Elder Joseph B. Wirthlin (1917–2008) o le Korama a Aposetolo e Toasefululua: “O le agalelei o uo uiga faaKeriso e ootia loloto ai ma suia ai o tatou olaga. … I lenei Ekalesia, o tatalo mo fesoasoani e masani ona tali mai e le Alii e ala i se galuega faigofie e fai i aso taitasi o le tausiga o uso ma tuafafine. I le agalelei o uo moni, na ou vaaia ai le alofa mutimutivale o le Alii lava Ia.”¹

O lena galuega o le agalelei na suia ai au, na fesoasoani ia te au e tuua ai i le taimi tatau mo la‘u misiona, ma musuia au e vaavaai mo auala e avea ai ma tali i tatalo a isi.