Pe o Oe o se Tagata e Taliaina po o se Tagata Foai?
Pe ua e tu ea i se taimi e mafaufau pe aisea e te auauna atu ai i isi ma tausi i poloaiga? O le masina lenei o se taimi lelei lea e faia ai lena mea a o e suesue e uiga i le fausiaina o le malo o le Atua i au lesona i le lotu. E mafai ona e fesili ia te oe lava, pe o uunaia atili au e ala i mea ou te mafai ona taliaina po o mea e mafai ona ou foai atu?
O fesili o loo i luga o le a fesoasoani e te iloa ai pe o e matele lava ina faasaga i totonu (mafaufau ia te oe lava ia) po o fafo (mafaufau i isi).
O le a le aloaiaina o le a ou maua i le auauna atu i lenei valaauga?
O le a faapefea ona faamanuiaina au e ala i le totogiina o sefuluai ma taulaga anapogi?
O le a faapefea ona ou manuia mai le faamaoni?
O le a se mea o le a ou maua e ala i le auai i le lotu?
O le a faapefea ona fesoasoani ia te au se misiona?
O a faamanuiaga o le a ou maua mai se faaipoipoga i le malumalu?
E faapefea ona faatagaina au e lo‘u valaauga e fesoasoani e faamalosia isi?
O le a faapefea ona fesoasoani la‘u sefuluai ma taulaga anapogi e fausia ai le malo o le Atua?
O le a faapefea ona faamanuiaina isi i lo‘u faamaoni?
E faapefea ona faaalia e lo‘u auai i le lotu lo’u tuuto atu i le Alii?
O a ni auala o le a mafai ai ona ou auauna atu i isi i se misiona?
O le a faapefea e se faaipoipoga i le malumalu ona ou maua se avanoa e auauna atu i lo‘u toalua ma la’u fanau?
E le afaina le mafaufau i faamanuiaga o le a e maua, ae afai e te iloa ai ua e matele lava ina vaavaai i totonu nai lo le tele i le itu i fafo, ia taumafai e tepa ae i luga. Na aoao mai Peresitene Thomas S. Monson: “Ia manatua o lenei galuega e le o sa outou galuega po o sa’u foi. E mafai ona tatou taufai tepa ae i luga ma aapa atu mo le fesoasoani mai le lagi.” (“Fai Lou Tiute—E Sili Lena,” Liahona, Nov. 2005, 58).