Savali a le Au Peresitene Sili
Ia Faaavanoa se Taimi mo le Faaola
Saunia e Peresitene Thomas S. Monson
Ata pue na tusia e David Stoker
O se isi vaitau o le Kerisimasi ua oo mai i o tatou luga, ma faatasi ai ma le gafoa mai o se tausaga fou. E foliga mai e pei lava o ananafi sa tatou faamanatuina ai le soifua mai o le Faaola ma faia ni tautinoga.
I totonu o a tatou tautinoga mo lenei tausaga, pe na tatou fatutu ni sini ina ia faia se taimi i o tatou olaga ma faaavanoa o tatou loto mo le Faaola? E tusa lava pe o faapefea ona faamanuiaina i tatou e oo mai i le taimi nei i se tautinoga faapena, ou te mautinoa ua tatou mananao uma lava e faia ia sili atu. O lenei vaitau o le Kerisimasi o le taimi sili lava e suesue ma faafouina ai a tatou taumafaiga.
I o tatou olaga pisi, faatasi ai ma isi lava mea e tele o loo tauva mai mo lo tatou gauai atu, e taua lo tatou faia o se taumafaiga mataalia, ma taumafaiga tuuto i le aumaia o Keriso i o tatou olaga ma i o tatou aiga. Ma e taua tele mo i tatou, e pei o le au Makoi mai Sasae, le tumau ma le maumaututu i Lona fetu ma “o mai e ifo atu ia te ia.”1
I le faagasologa o le talafaasolopito, o le savali mai ia Iesu ua tutusa lava. Ia Peteru ma Aneterea i auvai o Kalilaia, sa Ia fetalai atu, “Mulimuli mai ia te au.”2 Ia Filipo na oo mai le valaau, “Mulimuli mai ia te au.”3 I le sa Levi sa nofo talia lafoga na oo mai le faatonuga, “Mulimuli mai ia te au.”4 Ma ia te oe ma a‘u, afai tatou te faalogo, o le a oo mai lena lava valaaulia faamalosiau: “Mulimuli mai ia te au.”5
A o tatou mulimuli i Ona tulagaaao i le aso ma a o tatou mulimuli i Ana faataitaiga, o le a tatou maua avanoa e faamanuia ai olaga o isi. Ua valaaulia e Iesu i tatou e tuuina atu i tatou lava: “Faauta, e manaomia e le Alii le loto ma le mafaufau malie.”6
Pe o i ai se tasi e tatau ona e tuuina atu i ai le auaunaga i lenei Kerisimasi? Pe o i ai se tasi o loo faatalitali mai mo lau asiasiga?
I tausaga ua mavae sa ou faia ai se asiasiga o le Kerisimasi i le fale o se tina matua ua oti lana tane. A o ou i ai iina, na tatagi le logo o le faitotoa. I le faitotoa sa tu mai ai se fomai e pisi tele ma le lauiloa. Sa lei valaauliaina o ia; nai lo lena, sa ia lagonaina se uunaiga e asiasi atu i se gasegase o le sa tuuatoatasi.
I lenei vaitau, o loto o i latou o e ua nofofale o loo faatalitali ma moomoo mo se asiasiga i le Kerisimasi. I se tasi Kerisimasi a o asiasi atu i se nofoaga autu mo tagata matutua, sa ou nofonofo ma talanoa ma ni tamaitai matutua e toalima, o le e sili ona matua o i latou sa 101. Sa tauaso o ia, ae sa ia iloaina lo‘u leo.
“Epikopo, ua fai si ou tuai mai i lenei tausaga!” o lana tala lea. “Sa ou manatu o le a e le sau.”
Sa ma maua se taimi fiafia faatasi. O se tasi o gasegase, e ui i lea, na vaavaai atu ma le moomoo i fafo o le faamalama ma toe fai mai pea lava pea, “Ou te iloa o le a sau la‘u tama i le aso lenei e vaai au.” Sa ou mafaufau pe o le a ia sau, aua sa i ai isi vaitau o le Kerisimasi na te lei asiasi mai lava.
O loo i ai pea le taimi o le tausaga lenei e tuuina atu ai le lima fesoasoani, le loto alofa, ma le agaga naunau—i se isi faaupuga, ia mulimuli i le faataitaiga ua faatulaga e lo tatou Faaola ma auauna atu e pei ona finagalo o Ia ia tatou auauna atu ai. Ao tatou auauna atu ia te Ia, o le a tatou le misia lo tatou avanoa, e pei ona faia e le pule o le faletalimalo o anamua,7 e faaavanoa se taimi mo Ia i o tatou olaga ma se avanoa mo Ia i o tatou loto.
Pe mafai ona tatou malamalama i le folafolaga matagofie o loo i ai i le savali a le agelu na tuuina atu i leoleo mamoe sa nonofo i le fanua: “Ou te aumai ia te outou le talalelei e olioli tele. … Aua o le aso nei ua fanau ai … lo outou Faaola, o le Alii ia o Keriso”?8
A o tatou faafesuiai ia meaalofa i le Kerisimasi, tau ina ia tatou manatua, talisapaia, ma maua lena meaalofa silisili o meaalofa uma—le meaalofa o lo tatou Faaola ma le Togiola, ina ia tatou maua le ola e faavavau.
“Aua o se a se aoga i se tagata pe a tuu atu se meaalofa i ona luga, ae na te lē taliaina le meaalofa? Faauta, e lē olioli o ia i le mea ua tuu atu ia te ia, pe olioli foi ia te ia o lē na tuuina mai le meaalofa.”9
Tau ina ia tatou mulimuli ia te Ia, auauna atu ia te Ia, faamamalu ia te Ia, ma talia i o tatou olaga Ana meaalofa ia i tatou, ina ia mafai ona tatou, i upu a le Tama o Liae, “siosiomia e faavavau i aao o lona alofa.”10