Napanalanginan pinaagi sa Akong Matinud-anon nga Igsoong Babaye

Ang tulo sa akong mga igsoon mipasakop sa Simbahan didto sa El Salvador dungan nako. Si Thelma 14 anyos ug ang kinamagulangan nakong igsoon dihang nabunyagan mi. 8 anyos pa ko niadtong panahona ug kinamanghuran sa pamilya, mao nga siya ang among lider.

Gipaila kami sa Simbahan pinaagi sa among silingan nga manganta og mga kanta nga sa wala madugay nahibaloan namo nga mga himno diay kadto. Ang among silingan misulti kanamo mahitungod sa talagsaong dapit nga gitawag og Primary, diin ang mga bata makakat-on sa pag-awit. Gikontak ang mga misyonaryo, ug misugod sila sa pagbisita sa among balay sa pagtudlo kanamo.

Hinoon, ang akong papa supak kaayo sa Simbahan ug dili gusto nga matudloan ang iyang mga anak sa mga misyonaryo. Kay gamay pa ko, wala gyud ka kasabut unsay nasinati sa mga elder sa pagdala sa ebanghelyo sa among kinabuhi. Papahawaon sila ni Papa kon makit-an sila nga naa sa among balay, ug tuyuon ni papa pagpalong ang mga suga kon manghapit ang mga elder inig ka gabii. Kon unsa ka matinguhaon si papa sa pagpugong sa mga misyonaryo nga makatudlo, doble ang paningkamot ni Thelma nga makakat-on bahin sa ebanghelyo ug pagbasa sa Basahon ni Mormon. Si Thelma ug ang mga elder wala gayud mohunong, ug nagpasalamat ko tungod niini.

Ang pagsimba lisud gayud tungod kay si Papa mangita gyud og bisan unsang paagi aron dili mi makaadto, sama sa iya ming patrabahoon sa dili pa mi mobiya para mosimba.

Usa ka Dominggo sa buntag lisud gayud kaayo. Dili siya gustong mosimba mi, apan dili mi gustong dili makasimba. Gipatiran niya ang basurahan ug nagkatag ang tanang sulod niini sa tibuok salog nga bag-o ra namong gilimpyuhan. Sa hilum misugod si Thelma sa pagpamunit sa basura nga walay pagreklamo. Pagkahuman niya og limpyo pag- usab ang salog, mihangyo na sab siya nga mosimba mi. Nahuman na namo ang tanang ipabuhat ug uban pa, apan wala gihapon siya motugot. Sa katapusan mitumbok siya og usa ka pangutana, “Nganong mamugos man gyud mo sa pagsimba niining simbahana?” Si Thelma dayon lig-ong mipamatuod sa katinuod sa ebanghelyo ug sa mensahe sa Pagpahiuli sa ebanghelyo. Dihang natapos siya, miwara-wara sa kamot ang akong papa ug gitugutan kami.

Wala na gyud mousab pa si papa sa pagpugong kanamo human niadtong hitaboa ug sa katapusan, bisan og wala siya kaangay niini, mitugot ra nga mopasakop mi sa Simbahan.

Wala koy problema sa pag-adto sa Simbahan matag Dominggo, apan dili kaayo ko mahinamon sa pagtambong og Primary tungod kay Sabado sa buntag pa kaniadto ang Primary. Sa nag-10 anyos na ko, si Thelma miuli sa balay usa ka Sabado ug gisultihan niya ang uban nakong mga igsoon mahitungod sa dula nga soccer tali sa mga deacon ug mga Blazer (Mga scouts nga nanag-edad og 11). Miingon siya nga wa koy swerte kay wala ko kaapil sa dula tungod kay wa ko motambong og Primary. Mao nga miadto ko pagkasunod Sabado (dala ang gamit nako sa soccer) ug kanunay na gyud kong moadto.

Dihang 16 anyos na si Thelma, gitawag siya nga mahimong presidente sa Primary. Ang among bishop naningkamot nga makakita og tawo nga makasugakod sa daghang hagit nga giatubang sa organisasyon sa Primary. Ang ward dako kaayo og area, ug lisud ug dako og gasto para sa daghang pamilya nga may gagmayng mga anak ang pagbiyahe sa bus ngadto sa simbahan para sa Primary inig ka Sabadto ug inig ka Dominggo. Daghan sa mga bata wala motambong og Primary, ug walay nakit-ang solusyon. Ang bishop nadasig sa pagtawag ni Thelma apan maglisud kay bata pa kaayo siya. Ang pag-aghat nagpadayon, ug human makadawat og pagtugot gikan sa presidente sa stake, gihatag sa bishop ang calling ngadto sa akong igsoong babaye.

Nagmatuod kini sa usa ka dinasig nga desisyon, ug nakapanalangin kini sa daghang mga bata—lakip nako. Gituman ni Thelma ang iyang calling pinaagi sa pagsunod sa inspirasyon, paggamit sa maayo niya nga panghukom, ug maayong mga ideya aron sa pagpalambo og mga training program para makakat-on ang mga bata sa ebanghelyo. Gihangyo niya ang iyang mga counselor ug mga teacher nga magmiting sa Primary sa daghang dapit nga duol ra sa ilang mga balay, ug mihatag siya og padayon nga training para adtong mga teacher. Kini nga solusyon naghimo nga makadaginot og panahon ug kwarta ang mga miyembro ug nakapahimo sa mga bata nga kaniadto wala makatambong og Primary sa pagdawat sa mga panalangin niining talagsaong organisasyon.

Imahe

Thelma and Rafael

Ang akong mga igsoon ug ako padayon nga misunod sa ehemplo ni Thelma samtang nagdagan ang panahon. Mihimo mi sa among mga family home evening ug mitambong sa among mga miting sa Simbahan. Sa wala madugay human sa akong pagka-orden nga usa ka deacon, miduol si Thelma nako atol sa family home evening ug miila kanako isip naghupot sa priesthood sa pamilya. Kini nga hitabo nagtudlo kanako og bililhong leksyon mahitungod sa pagtahud sa priesthood.

Gisiguro usab ni Thelma nga dili ko magkulang sa tukmang pag-amuma ug dugang nga kadasig sa pagtambong sa akong mga miting sa priesthood o pagtuman sa akong mga responsibilidad. Sama pananglit, gamiton ni Thelma ang tanang makalangas ug inabtik nga paagi aron makabangon ko matag Dominggo sa buntag para makatambong ko sa miting sa priesthood. Siya usab mitudlo nako nga magmaya sa akong pag-advance sa Aaronic Priesthood.

Sa Mutual ug sa seminary walay bale para nako nga nailhan ra ko nga “igsoon ni Thelma.” Ang uban nakong mga higala adunay suporta sa ilang mga ginikanan diha sa Simbahan, apan ako adunay akong bishop, mga lider sa Young Men ug si Thelma.

Padayon si Thelma nga maoy akong ehemplo samtang naghupot siya og lain-laing mga calling hangtud sa iyang paglarga sa misyon. Nakaserbisyo siya ug madungganon nga misyon sa Guatemala Quetzaltenango Mission, ug ang mga bunga sa iyang mga paghago naglakip sa bunyag sa among inahan duha ka adlaw dihang nauli si Thelma gikan sa misyon. Nahingpit ang among kalipay dihang ako, nga usa ka priest ang mihimo niini nga ordinansa. Sa pagsunod sa ehemplo ni Thelma, sa matinguhaong paagi gisugdan nako ang pag-andam alang sa pagmisyon.

Human sa iyang misyon, si Thelma mibalhin ngadto sa Estados Unidos aron moeskwela sa Brigham Young University, bisan lisud ang among kahimtang sa pinansyal. Nagpabilin siya nga lig-ong impluwensya ngari nako bisan layo siya.

Human sa akong pag-uli gikan sa pagserbisyo sa Guatemala Guatemala City Mission, mibiyahe usab ko sa Provo, Utah, aron moeskwela sa BYU. Mapasalamaton ko sa kamabination og suporta sa daghang tawo aron makaabut ko didto. Bisan pa, kulang gihapon ang kwarta.

Wala madugay sa pag-abut nako sa Provo, giribyu namo ni Thelma ang among pinansyal nga sitwasyon. Nakita namo nga bisan sa part time nako nga trabaho, wala kami igong ikabayad sa among abanganan para sa tibuok tuig nga tingklase. Wala gayud hinoon magduhaduha si Thelma nga makalampus ra mi sa mga pagsulay. Misalig siya nga ang Ginoo mohatag og paagi. Wala kaabut og usa ka semana human niana, si Thelma nakadawat og sulat gikan sa BYU Spanish department. Sa iyang pag-abli niini, miatubang siya nako ug nakasinggit, “Kini! Kini ang paagi aron makabayad kita sa atong abangan!” Ang sulat nagpahibalo kaniya nga gidawat siya isip assistant teacher, nga makapadugang sa iyang kinitaan.

Paglabay sa katuigan, si Thelma nagpadayon nga usa ka tinubdan sa inspirasyon. Giatubang niya ang mga kalisdanan sa mas maayong paagi kay ni bisan kinsa nga akong nailhan. Nag-atiman siya sa iyang talagsaon nga lalaking anak nga dunay Down syndrome [kakulangan], sa tigulang na namong inahan, ug sa iyang bana nga may grabing problema sa panglawas. Usab, kon kadtong mga butanga dili pa igo, siya adunay mga problema sa panglawas sa iyang kaugalingon.

Pipila ka tuig ang milabay, si Thelma gioperahan sa utok aron mahupay gikan sa usa ka cyst sa utok. Tungod sa mga panginahanglan sa iyang mga minahal, ang purohan sa bisan unsang komplikasyon makasagmuyo gayud. Nag-ampo siya og tabang ug inspirasyon ug mibisita sa templo. Bisan niining tanan, wala mohuyang ang iyang pagtuo, apan nagpanuko siya nga magpaopera sa usa ka doktor sa delikadong operasyon. Nakig-istorya si Thelma sa usa ka minahal nga higala niining panahona ug gitug-an ang tanang kabalaka mahitungod sa iyang operasyon. Nangutana ang iyang higala sa ngalan sa doktor ug dihang nahibaloan niya ang ngalan, miingon ang higala ni Thelma nga ang doktor miyembro sa iyang ward. Giingnan niya si Thelma nga ang doktor matinud-anong miyembro sa Simbahan ug takus nga tighupot sa priesthood. Kanunay siyang magpatukar og mga himno sa Simbahan samtang mag-opera. Bisan sa yano nga impormasyon, usa kini ka malumo nga tubag sa mga pag-ampo ni Thelma. Ang kinabuhi ni Thelma ug espirituhanong mga kasinatian mao ang tinubdan sa padayong kalig-on ug pagpamatuod sa kaugalingon nakong kinabuhi.

Naghunahuna ko sa batan-ong mga lalaki nga tingali nagsinati og susama nga pagpadako sa akoa. Naghunahuna ko niadtong kinsa walay lalaking modelo diha sa panimalay, kinsa makakaplag lang og kadangpan diha sa Simbahan, ug nagtubo sa gubot nga mga nasud. Ngadto kanila ako moingon: ayaw gayud paghunong; pabilin nga duol sa Ginoo ug sa Iyang mga sulugoon. Mapasalamaton ko nga ang Ginoo mihatag sa suporta nga akong gikinahanglan aron matuman ang akong mga tumong ug mamahimong tawo nga mao ako karon.