Mga Tingog sa mga Santos sa Ulahing mga Adlaw
Visiting Teaching, Family History, ug mga Inahan
Mipasakop ako sa Simbahan sa dihang 20 anyos pa ko. Wala madugay naminyo ko sa usa ka tawo sa ward, ug mibalhin kami tungod sa panarbaho. Sa pag-idad nako og 22, natawo ang among unang anak nga lalaki. Nianang higayona, ang akong mga visiting teacher misugod sa regular nga pagbisita kanako, bisan tuod nagpuyo kami sa utlanan sa ward.
Tungod kay ako usa ka bag-ong inahan nianang higayona, ang akong konsensya misulti kanako nga kinahanglan kong mokontak sa akong kaugalingong inahan. Apan gihunong na nako ang pagkontak sa akong inahan walo na ka tuig ang milabay sa dihang nagdiborsyo ang akong mga ginikanan. Matag higayon nga mobisita ang akong mga visiting teacher, maghisgut kami mahitungod niini, ug akong nabati nga ang Espiritu nag-aghat kanako sa paghimo niining lisud nga mga lakang.
Among gihisgutan kon unsaon nako nga matukod pag-usab ang among relasyon kay ang akong inahan wala man mahisakop sa Simbahan. Daghan kaayo ang nausab sa akong kinabuhi sa walo ka tuig nga milabay sukad nga kami wala na magtingganay. Tungod sa lig-ong pag-aghat sa Espiritu, midesisyon ko sa pagkontak una sa mama sa akong inahan. Ang akong lola usa ka buta, mao nga ang akong sulat gipadala ngadto sa akong iyaan nga nag-atiman ni lola.
Nakadawat ko og nindot nga balos sa sulat, ug kami mibisita sa akong apohan nga babaye ug sa akong iyaan. Ang akong apohan nga babaye nahimuot nga nasurprisa ug nangutana kon mihapit ba lang ko aron makigkita sa iyang anak—akong inahan—sa among pagpauli. Siya nalipay kaayo.
Ang akong lola usa ka Lutheran, ug siya nahigugma sa Manluluwas. Samtang miistar kami uban nila, ang akong bana mobasa kaniya matag buntag gikan sa Basahon ni Mormon. Nalingaw gayud siya niini. Human sa pipila ka buntag, ang akong bana ug ang akong lola mibati nga napuno sa Espiritu nga akong apohan nga babaye miadto sa iyang lamesa ug mikuha og usa ka libro sa genealogy nga gipanag-iya sa akong namatay nga lolo ug gipakita kini ngadto kaniya. Dihay walo ka lista sa mga henerasyon nga hapsay, gani nalakip ang ilang mga trabaho. Nalipay kaayo ang akong apohang babaye samtang miistar kami uban kaniya, ug misaad ko niya nga mobisita sa akong mama sa akong pagpauli, nga maoy akong gihimo.
Lima ka semana human sa among pagbisita sa akong apohang babaye, na-stroke siya ug namatay. Paglabay sa duha ka tuig mipahigayon ko sa buhat sa templo alang sa akong katigulangan gikan sa impormasyon sa akong lola.
Karon maayo na akong relasyon uban sa akong inahan. Nagpuyo kami sa samang lungsod, ug may mga higayon nga nakatabang siya sa akong mga anak.
Kon wala pa ang regular nga mga pagbisita gikan sa akong mga visiting teacher, kinsa nag-awhag ug mitabang kanako sa tibuok panahon, wala gayud unta ko mangahas sa paghimo og mga lakang sa pag-ayo sa akong relasyon uban sa akong inahan. Dili lang ako apan daghang henerasyon usab ang napanalanginan.