Nganong wala man kaayo kita’y nahibaloan bahin sa atong Langitnong Inahan?

Kita nasayud nga kita adunay Langitnong Amahan ug Langitnong Inahan. Kini nga kahibalo naggikan kang Joseph Smith ug gibalik-balik sa pagsulti sa dinasig nga mga pagtulun-an sa mga lider sa Simbahan sulod sa mga katuigan. Hinoon, lapas sa pagkaanaay Langitnong Inahan ug sa tahas sa atong langitnong mga ginikanan sa pagtinabangay alang sa kaluwasan ug kahimayaan sa ilang mga anak, wala nay dugang pa nga mga detalye nga gipadayag mahitungod sa Langitnong Inahan. Sa pagkakaron, igo na ang atong nasabtan nga kita mga anak sa langitnong mga ginikanan, kinsa gusto nga kita mahisama kanila. Kini nga pagsabut makatabang nga atong makita kon si kinsa kita ug unsay posible nga atong maabut. Nagpakita kini kanato nga ang pagkalalaki ug pagkababaye usa ka bahin sa atong mahangturong pagkatawo ug nga ang mga lalaki ug mga babaye dili mahimaya kon wala ang usag usa. Ug kana talagsaon ug bililhong mga kamatuoran diha sa ilang kaugalingon.