Mga Pag-ampo sa Akong Birthday alang sa Akong Papa
Paghulagway pinaagi ni Melissa Manwill
Ang akong papa wala gayud magdako sa bisan unsa nga relihiyon, ug ang pamilya sa akong mama dili aktibo dihang batan-on pa ang akong mama. Apan usa ka adlaw ang akong mama mibati nga duna gayuy kulang, mao nga mihukom siya nga mobalik sa simbahan nga iyang nadak-an, Ang Simbahan ni Jesukristo sa mga Santos sa Ulahing mga Adlaw. Ang akong mga igsoong babaye ug ako mikuyog kaniya. Apan ang akong papa wala makagusto sa among pagtambong sa simbahan, ug maoy hinungdan sa pagsulay sa relasyon sa akong mga ginikanan nga wala mahitabo sukad.
Nabunyagan ko dihang otso anyos pa ko, ug akong nakat-unan kon sa unsang paagi nga ang mga pamilya magkauban sa kahangturan. Matag tuig sa akong birthday, mihuyop ko og kandila nanghinaot sa tago nga ang akong papa mabunyagan. Nag-ampo ko nga ang kasingkasing sa akong papa mahumok. Human sa daghang katuigan, ang mga misyonaryo sa katapusan nakapanihapon dungan namo. Apan ang ebanghelyo wala mahisguti.
Dayon usa ka summer ang akong papa mikuyog nako sa usa ka camping trip sa Young Men. Bisan tuod dili siya miyembro, ang akong papa ang gisangunan sa usa ka fireside! Nahadlok ko, apan ang tanan mitabang pinaagi sa pag-apil sa fireside. Dayon ang akong higala mihatag og pagpamatuod bahin sa pag-ampo. Gipakigbahin niya ang usa ka panahon dihang ang akong papa mitabang sa manghod sa akong higala ug nahimong tubag sa iyang pag-ampo. Sa unang higayon sukad, akong nakita ang akong papa nga mihilak. Gibati niya ang Espiritu.
Human niana nga camping trip, ang akong papa gusto nga makakat-on pa og dugang bahin sa ebanghelyo inubanan sa bag-ong kadasig, ug usa ka buntag iyang gipahibalo nga gusto siyang mabunyagan. Dili mi makatuo!
Ang bunyag sa akong papa mao ang usa sa pinakanindot nga adlaw sa akong kinabuhi. Ang chapel napuno sa tanan nga miadto sa pagsuporta sa akong papa, ug akong gipraktis ang pag-ampo sa bunyag pipila ka gatus nga balik-balik tungod kay nalipay kaayo ko. Nakabunyag ko sa akong papa, ug dili nako mahulagway ang hilabihan nga pagbati dihang akong gigakos ang akong papa didto sa bunyaganan.
Pagkasunod tuig ang akong pamilya na-seal sa templo. Human sa pag-seal, mibarug kami nga nagliyok—isip usa ka mahangturong pamilya—nagginaksanay uban sa luha sa kalipay nga midagayday sa among mga aping.
Gikan niini nga kasinatian akong nakat-unan nga ang tanan posible. Ayaw paghunong. Maningkamot gayud ako kutob sa akong mahimo nga mahimong takus nga ma-seal sa templo uban sa umaabut nakong pamilya.