Mga Tingog sa mga Santos sa Ulahing mga Adlaw
Ang Pahiyom sa Estranghero
Sa kasagaran molikay ko kaniya—usa ka tawo nga pobre nagdula og baraha sa lamesa sa dapit dulaanan sa usa ka fast-food restaurant. Mipahiyom ang iyang subo nga nawong samtang magtan-aw siya sa mga bata nga magdula. “Tingali nagpainit lang siya tungod sa katugnaw,” naghunahuna ko nga inig agi nako sa iyang lamesa aron ilabay ang wala mahurot nga pagkaon sa akong anak nga babaye. Sa akong pagtan-aw sa iyang lamesa, walay bisan unsa nga putos sa pagkaon o basong papel, ang hinay, hinagawhaw nga tingog mihunghong nako, “Palite siya og pagkaon.”
Mibalik ko sa akong lamesa nga diha pay kwarta sa akong bulsa. “Maulawan siya,” miingon ko. Dayon usa ka pagbati sa kalinaw miabut, ug ang tam-is nga hunghong sa Espiritu mipakalma nako: “Palite siya og pagkaon.”
Wala nako sultihi ang akong mga anak kon unsay akong buhaton; mipunit ko og basura ug milakaw sa paglabay niini aron makaduol ko sa lamesa sa tawo nga dili makahibalo ang akong higala kinsa akong kauban sa pagpangaon.
Mipaduol ko ug nangutana, “Makapalit ba ko nimo og paniudto?”
Morag natingala siya ug hinay nga mitubag, “Kon gusto nimo.”
Gikuha nako ang gamay nga kantidad sa kwarta nga akong gibilin—igo nga makapalit og pagkaon ug mainom—ug gihatag ngadto sa tawo. Mibalik ko sa akong lingkuranan, wala makit-i sa busy nga mga inahan sa akong palibut, ug mitan-aw sa tawo nga mibarug og nagpalit sa iyang pagkaon.
Samtang akong gipasakay ang akong mga anak sa sakyanan aron mamauli, mitan-aw ko sa bintana ug nakita ang tawo nga nagdala sa tray sa pagkaon balik sa iyang lamesa. Sa iyang subo nga nawong ganiha mipuli ang usa ka pahiyom.
Ang katugnaw sa hangin nga mihapak sa akong nawong wala kaayo batia. Nahimuot ko sa kalipay, ang malipayong Espiritu mipuno sa akong tibuok lawas. Nakahinumdom ko sa pagtulun-an sa Manluluwas:
“Kay gigutom ako, ug inyo ako nga gipakaon: giuhaw ako, ug inyo ako nga gipainom …
“Ug kaniya motubag ang mga matarung nga manag-ingon, Ginoo, kanus-a ba kami makakita kanimo nga gigutom ug amo ikawng gipakaon, o giuhaw ug amo ikawng gipainom? …
“Ug kanila motubag ang Hari nga magaingon, Sa pagkatinuod, magaingon ako kaninyo, nga maingon nga gibuhat ninyo kini ngadto sa usa sa mga labing gagmay niining akong mga igsoon, gibuhat usab ninyo kini kanako” (Mateo 25:35, 37, 40).
Mapasalamaton ko sa pahiyom sa usa ka estranghero nga nakatabang nako sa pagbuhat unsay matarung.