Mga Tubag gikan sa mga Lider sa Simbahan
Unsaon Pag-atubang ang mga Pagsulay sa Hugot nga Pagtuo
Ni Elder Neil L. Andersen
Sa Korum sa Napulog Duha ka mga Apostoles
Gikan sa usa ka pakigpulong sa Oktubre 2012 nga kinatibuk-ang komperensya.
Kining lisud nga mga pagsulay gituyo aron mas malig-on kamo, apan kini malagmit makaluya o gani makawagtang sa inyong pagsalig sa Anak sa Dios ug makahuyang sa inyong tinguha sa pagtuman sa inyong mga saad Kaniya. Kini nga mga pagsulay kasagaran nagtakuban, mahimong lisud mailhan. Magsugod sila diha sa atong mga kahuyang, mga kakulangan, sa atong pagkatalandugon, o sa mga butang nga importante kanato. Ang usa ka tinuod apan madala ra nga pagsulay sa usa ka tawo mahimong lisod nga pagsulay alang sa uban.
Unsaon ninyo sa pagpabilin nga “makanunayon ug dili matarug” [Alma 1:25] kon sulayan ang hugot nga pagtuo? Isubsob ninyo ang inyong kaugalingon sa mga butang nga nakatabang sa paglig-on sa pagtuo: kamo magpakita sa inyong hugot nga pagtuo kang Kristo, kamo mag-ampo, kamo, mamalandong sa mga kasulatan, kamo maghinulsol, kamo motambong sa simbahan ug moambit sa sakrament, kamo magsunod sa mga sugo, ug kamo magserbisyo sa uban.
Kon mag-atubang og pagsulay sa hugot nga pagtuo—bisan unsay inyong buhaton, ayaw pagpalayo sa Simbahan! Ang pagpalayo gikan sa gingharian sa Dios kon may pagsulay sa hugot nga pagtuo sama ra sa pagbiya sa luwas nga lawak taguanan dihang nagkaduol na ang buhawi.
Miingon si Apostol Pablo, “Busa kamo karon dili na mga langyaw ug mga dumuloong, kondili mga katagilungsod sa mga balaan ug mga sakop sa panimalay sa Dios” (Mga Taga-Efeso 2:19). Dinhi sa balaang dapit sa Simbahan, atong mapanalipdan ang atong hugot nga pagtuo. Makigtigum sa uban nga nagatuo, kita mag-ampo ug mangitag tubag sa atong mga pag-ampo; kita magsimba pinaagi sa musika, mopakigbahin og pagpamatuod sa Manluluwas, mag-inalagaray matag usa, ug mobati sa Espiritu sa Ginoo. Kita Moambit sa sakrament, modawat sa mga panalangin sa priesthood, ug motambong sa templo. Mipahayag ang Ginoo, “Diha sa mga ordinansa … , ang gahum sa pagkadiosnon gipakita” (D&P 84:20). Kon nag-atubang mo og pagsulay sa hugot nga pagtuo, pabilin diha sa kasigurohan sa panimalay sa Dios. Kanunay nga may luna alang kaninyo dinhi. Walay pagsulay nga sobra kadako nga dili nato mabuntog nga magtinabangay (tan-awa sa Mosiah 18:8–10).