Pagkakita sa Propeta sa Dios
Ni Elder Kim B. Clark
Sa Seventy
Sa dihang 11 anyos pa ko, mitabang ko sa akong ward pagtukod og bag-o nga building sa Simbahan. Ang mga miyembro mitabang sa pagtukod niini niadtong mga panahona—pagpanglansang, pagpamintal, ug pagbuhat sa tanan nga matang sa mga butang.
Sa dihang nakadungog ko nga si Presidente David O. McKay (1873–1970) mopahinungod sa building, gusto kaayo ko nga makaadto. Ang akong mga ginikanan miingon nga ako makaadto. Miadto kog sayo ug milingkod sa atubangan nga lingkuranan.
Nakahinumdom ko nga nakakita ni Presidente McKay sa duol. Nakakita ko sa iyang pagbarug, sa unsang paagi siya nakigsulti sa mga tawo, kon giunsa niya pagtratar ang mga tawo. Duna siyay hayag nga blue nga mga mata ug puti nga buhok. Siya tan-awon sama sa usa ka propeta. Sa dihang nakadungog ko niya nga misulti ug pagpahinungod nga pag-ampo, ako nasayud sa akong kasingkasing nga kini mao ang propeta sa Dios.
Ako adunay usa ka gamhanan nga espirituhanong impresyon gikan sa Langitnong Amahan: “Kini ang Akong propeta.” Ang Langitnong Amahan nagsulti kanako pinaagi sa Espiritu Santo nga si Presidente Mckay Iyang propeta.
Sa dihang nasayud ko nga si Presidente McKay propeta sa Dios, ako nasayud nga ang Simbahan tinuod ug si Joseph Smith usa ka propeta. Nasayud ako nga ang Basahon ni Mormon ug ang Pagpahiuli sa ebanghelyo tinuod. Nasayud usab ako nga ang tanan nga mga propeta, gikan kang Joseph Smith hangtud ni David O. McKay, mga propeta usab sa Dios.
Karon kada higayon nga dunay tawgon nga bag-ong propeta, aduna ako nianang samang panghimatuod nga moabut: “Kini ang Akong propeta.” Kining tanan nagsugod sa dihang bata pa ko.