Savali a le Au Peresitene Sili
Olaga o se Soo
Saunia e Peresitene Dieter F. Uchtdorf
Fesoasoani Lua i le Au Peresitene Sili
I le tolusefulu tausaga talu ai i Ghana, sa laa atu ai se tamaitai talavou o le kolisi e igoa ia Doe i totonu o se falelotu a le AAG mo le uluai taimi. Sa valaaulia e se uo Doe e sau faatasi ma ia, ma sa fia iloa e Doe pe faapei le Ekalesia.
Sa matuai agalelei tagata ma faauo o lea na le mafai ai ona ia tatalia lona mafaufau, “O le a lenei ituaiga lotu?”
Sa matuai lagonaina e Doe le faagaeetia o lea na ia filifili ai e aoao atili e uiga i le Ekalesia ma ona tagata, o e na faatumulia i le tele naua o le olioli. Ae o le taimi lava na ia amata ai ona faia o lea mea, na amata ai e aiga ma uo o e na manatu mo lona lelei ona tetee ia te ia i soo se itu. Sa latou tau atu ni mea leaga e uiga i le Ekalesia ma faia mea uma latou te mafaia e taofi ai o ia.
Ae na mauaina e Doe se molimau.
Sa i ai lona faatuatua, ma sa ia fiafia i le talalelei, lea sa faatumulia lona olaga i le olioli. Ma o lea, na ia ulu atu ai i le vai o le papatisoga.
Mulimuli ane, sa ia faaaafia o ia lava i le suesue ma le tatalo. Sa ia anapogi ma saili le uunaiga a le Agaga Paia i lona olaga. O se taunuuga, na faateleina le malosi ma sili atu le loloto o le tuputupu ae o le molimau ma le faatuatua o Doe. Na iu lava ina filifili o ia e auauna atu i se misiona talai mo le Alii.
Ina ua foi mai lana misiona, sa tafafao faamasani ma faaipoipo i se faifeautalai ua maea lana misiona—le toatasi lava lea na papatisoina o ia i ni tausaga na muamua atu—ma sa mulimuli ane faamauina i laua i le malumalu o Johannesburg i Aferika i Saute.
Ua mavae le tele o tausaga talu ona maua e Doe Kaku se aafiaga muamua o le olioli o le talalelei a Iesu Keriso. I lena taimi, e lei matagofie i taimi uma lava le olaga mo ia. Sa ia onosaia lana vaega o le lototiga ma le faanoanoa, e aofia ai le maliliu o se fanau e toalua—o le loloto o le faanoanoa o na aafiaga o loo mamafatu pea i lona loto.
Ae o ia ma lona toalua, o Anthony, na taumafai lava ia faalatalata atu i le tasi ma le isi ma lo la Tama Faalelagi pele, lea la te alolofa i ai ma o la loto atoa.
I le taimi nei, ina ua mavae le 30 tausaga talu ona ia ulu atu i le vai o le papatisoga, faatoa faamaeaina e Sister Kaku se isi misiona faifeautalai—o le taimi lenei faatasi ai ma lona toalua, o le sa auauna atu o se peresitene o le misiona i Nigeria.Fai mai i latou
e masani ia Sister Kaku fai o loo i ai se mea faapitoa e uiga ia te ia. E susulu mai lona fiafia. E faigata ona faaalu se taimi faatasi ma ia e aunoa ma le lagonaina o le fiafia sili atu o oe lava ia.
E mautinoa lana molimau: “Ou te iloa e silasila mai le Faaola ia te au o Sona afafine ma se uo (tagai i le Mosaea 5:7; Eteru 3:14),” o lana tala lea. “Ma o loo ou aoao ma taumafai malosi e avea foi ma Ana uo—e le gata i mea ou te fai atu ai ae faapea foi i mea ou te faia.”
O i Tatou o Ni Soo
O le tala a Sister Kaku e tai tutusa lava ma tala a le toatele o isi. Sa i ai ia te ia se manao e iloa le mea moni, sa ia totogia le tau e maua ai le malamalama faaleagaga, sa ia faaalia lona alofa mo le Atua ma ona uso a tagata, ma i luga o le ala na feagai ai o ia ma faigata ma le faanoanoa.
Ae e tusa lava po o a faigata, e tusa lava po o le a le faanoanoa, sa ia faaauau pea ona agai i luma i le faatuatua. E tutusa lava lona taua, sa ia faatumauina lona olioli. Sa ia maua se auala e le gata e onosaia ai faigata o le olaga ae faapea foi ona tuputupu ae faaleagaga e ui lava i na faigata!
E tai tutusa lava lana tala ma lau tala ma lau foi tala.
E seasea lava ona saogalemu la tatou malaga pe aunoa ma se tofotofoga.
Ua tofu i tatou taitoatasi ma o tatou lototiga, o tatou le fiafia, ma o tatou faanoanoa.
E mafai ona oo ina tatou lagonaina le lotovaivai ma le lofituina i nisi taimi.
Ae o i latou o e ola i se olaga o se soo—o e tumau i le faamaoni ma tumau pea i le agai atu i luma i le faatuatua; o e faatuatua i le Atua ma tausi i Ana poloaiga;1 o e ola i le talalelei mai lea aso i lea aso ma lea itula i lea itula; e tuuina atu auaunaga faaKeriso ia i latou o siomia ai i latou, e tasi se galuega lelei i le taimi—o i latou na e ana nai galuega faatauvaa na e masani ona faia se eseesega tele.
O i latou e fai si agalelei teisi, si loto faamagalo atu teisi, ma se pai atu e sili atu le alofa mutimutivale o i latou na e alolofa mutimutivale o le a maua le alofa mutimutivale.2 O i latou o e faia lenei lalolagi o se nofoaga e sili atu ona lelei, o se galuega agalelei ma le alofa i lea taimi ma lea taimi, o e taumafai e ola ai i se olaga faamanuiaina, faamalieina, ma le filemu o se soo o Iesu Keriso o i latou na o le a iu lava ina maua le olioli.
O le a latou iloa o “le alofa lea o le Atua, ua faamaligiina ifo lautele o ia lava i loto o le fanauga a tagata … o le mea lea ua silisili atu ona manaomia i mea uma … ma le silisili ona olioli i le Agaga.”3