Auaunaga i le Ekalesia
O Le Popole o le Alii mo i Tatou
E alaala le tusitala i Iuta, ISA.
I le mafaufau i tua i le taimi na avea ai lo’u aiga ma taulaiga a aufono a le uarota, sa ou iloa ai sa le avea i matou na o se popolega a le uarota—sa popole le Alii mo i matou.
Ina ua fesili mai lau epikopo pe ou te taliaina se valaauga e avea ma peresitene o Tamaitai Talavou, sa ou manao e fai atu leai. Sa ou lagonaina lou le agavaa e pulefaamalumalu i tamaitai talavou. Ae ina ua mavae le tolu masina ina ua uma ona ou taliaina, sa nutimomoia lou fatu i le iloaina o le a suia tuaoi o le matou uarota ma o le a faamaloloina au.
Sa ou tatalo ia iloa pe aisea na faatagaina ai e le Alii au e oo i le alofa i tamaitai talavou ae na ona toe faatofa vave atu lava. Na oo mai lau tali e lei mafaufauina i le taimi o se fonotaga a le aufono a le uarota.
Na fesiligia sui o le aufono e faasoa atu ni tala i le konafesi a le siteki e uiga i le fesoasoani atu i tagata o le matou uarota, ae sa ou popole nei manatu ai nisi tagata ua pei i latou o ni galuega faatino a le uarota. Ina ua uma ona ou faaleoina atu lou popolega, peitai, na tau mai e le Agaga ia te au e faapea e popole le Tama Faalelagi e uiga i Ana fanau uma lava.
I ni nai tausaga ua mavae atu sa avea ai i maua ma lou toalua ma taulaiga o le aufono a le uarota, ma sa ma iloaina. Sa ou toe foi mai ma toaga mai ina ua fanau le ma tama muamua, ae e lei sau lou toalua. Mo ni tausaga, na taumafai au peresitene o siteki, au epikopo, ma faiaoga o aiga e fesoasoani ia i matou.
Ona matou siitia atu lea i se uarota fou. Sa avea se epikopo onosai ma agaalofa faapea ma se faiaoga o aiga ma ni uo a lau tane. O le taimi lena na talia ai e lou toalua le Agaga. Sa uunaia o ia e faitau i le Tusi a Mamona, ma sa amata ona ia alu i le lotu. Sa faifailemu lava ona ia mauaina se molimau. O le a ou le faagaloina lava le aso matagofie na faamauina ai lo matou aiga i le malumalu.
Faatoa ou maua se malamalama faaleagaga ina ua valaauina au o se peresitene o Tamaitai Talavou ma maua ai le avanoa e auauna atu i se aufono a le uarota, i le uiga o le avea ma taulaiga o se aufono a le uarota. Sa ou aoaoina o aufono a uarota e taulai atu i ni tagata patino e le faapea ona sa latou popole e faatatau i ni fuainumera, ae ona o i latou, ma le Alii, e popole e uiga i tagata taitoatasi. Pe a tatou auauna atu i o tatou valaauga, e faatumuina e le Alii i tatou i Lona alofa mo i latou tatou te auauna atu i ai.
I le mafaufau atu i tua i le taimi ao avea lou aiga ma taulaiga a aufono a le uarota, sa ou iloaina ai sa le gata sa popole le uarota mo i matou—ae sa popole le Alii mo i matou. Sa latou popole mo i matou ona sa popole o Ia mo i tatou.
O le mea moni, e popole le Alii mo i tatou uma lava. Ona o le alofa, ua Ia mamanuina ai se fuafuaga e faamalolosia ai i tatou ma, pe a tatau ai, uunaia ai i tatou—o se fuafuaga e masani ona faataunuuina e ni tagata e pei o le epikopo ma le faiaoga o aiga ia na fesoasoani i lou toalua.