O Le Faamanuiaina o i Latou o e Ua le Toaaga Mai
Saunia e Elder Terence M. Vinson
O Le Fitugafulu
A o tatou ola ai i le mafutaga ma le Agaga ma saili le fesoasoani a le Alii, o le a Ia faamanuiaina a tatou taumafaiga e toe aumai Ana mamoe na leiloloa i le lafu.
Faamalologa, saunia e J. Kirk Richards
Tatou te iloa ai le tele o upumoni matagofie o le olaga e ala i o tatou mafaufauga faaleagaga ae le o tatou mafaufauga faaletino. O le mea moni, e tele mea taua—e aofia ai mea e faavavau—e mafai ona lagonaina ae le vaaia.
Na aoao atu e le Aposetolo o Paulo lenei mataupu faavae i le Au Paia i Korinito: “O loo matou le manatunatu i mea ua vaaia, a o mea e le vaaia: aua o mea e vaaia e gata mai ia; a o mea e le vaaia e faavavau ia”(2 Korinito 4:18).
O le alofa e aoaoina ma lagonaina muamua lava e ala i sane faaleagaga. E faapena foi, o le agaalofa, faauoga, onosai, ma le faatuatua o fua ia o le Agaga (tagai i le Kalatia 5:22). E faaaoga e le Tama Faalelagi nei lagona o le Agaga e faamanuia ai Ana fanau, e aofia ai i latou o e ua se ese.
Sa ou ola i le tele o lou olaga i le Eria o le Pasefika. E toatele tagata o le Pasefika e i ai se malamalama loloto i le taua o mea e le vaaia na faamatalaina e Paulo, ma o le toatele e manino lava le faamuamuaina o mea faaleagaga i manaoga faaletino.
O lenei eria o le Ekalesia e eseese lava, i atunuu atiina ae ma le atamamai, e pei o Ausetalia ma Niu Sila, faapea foi ma atunuu e faifaatoaga ma fagogota, e pei o Toga ma Samoa, lea e maualuga ai le faitau aofai o tagata e suitulaga i le Ekalesia. Ona i ai lea o atunuu tauatiina ae, e pei o Papua Niu Kini ma le Atu Solomona, lea e fetaiai ai tagata ma luitau iloga.
O lenei eseesega ua maua ai ni avanoa e aoao ai.
Le Faanatinati e Asiasi atu i Tagata le Toaaga
E tulaga ese se tasi o ia aafiaga e aoao ai. I le avea ai o se Fitugafulu Eria, na tofia au e pulefaamalumalu i se konafesi faalesiteki i Niu Sila. Na o ni nai masina i luma atu, na tuuina mai ai e Peresitene Thomas S. Monson se lauga mamana lava i Fitugafulu uma o le lalolagi. O lana lauga na taulai atu i le laveaiina o i latou o e ua see ese atu mai sauniga o le talalelei.
O se taunuuga o le saunoaga a Peresitene Monson ma le luitau talafeagai na ia tuuina mai ia i matou, sa ou lagonaina ai se faanatinati e asiasi atu ma valaaulia i latou e le o auai atoatoa i le talalelei ina ia toe foi mai i feagaiga ma sauniga o le faaolataga. Sa ou valaaulia peresitene o siteki ia aveina atu au faatasi ma i latou i le taimi o konafesi a siteki i faaiuga o vaiaso e asiasi atu i tagata ua le toaaga mai. O na asiasiga sa ofoofogia i taimi uma lava.
I se tasi Aso Toonai i le taimi o le konafesi i le faaiuga o le vaiaso, na matou asia ai ma le peresitene o le siteki ni nai aiga. O le tane ma le ava o se tasi o nei aiga sa faaipoipo pe tusa ma le 10 tausaga ma na faamauina i le malumalu ae o lenei ua le toe toaaga mai. Sa latou faafeiloaia i matou ma le alofa, ma sa matou maua se mafutaga faaleagaga. A o faaiuina le asiasiga, sa ou lagonaina le musuia e fai atu i le tane pe fia manao i se faamanuiaga ona fesili atu ai lea ia te ia e tuuina atu i lona toalua se faamanuiaga.
O se uunaiga e le masani ai lenei. Sa aoaoina au faapea i le avea ai o se malo faaaloalogia i le fale o se tasi, e tatau ona ou aveina se matafaioi e maualalo ifo ma o le ulu o le aiga o le tagata lea e faia le faaiuga i le mea e fai. O lenei uso, e ui i lea, sa loto faafetai mo le ofoina atu o se faamanuiaga, ma sa manino lava lona faagaeetia ina ua mavae lo ma faamanuiaina o ia ma le peresitene o le siteki.
A o tulai ae o ia, e ui i lea, sa ia fesili mai pe mafai e se tasi o i matou ona faamanuiaina lona faletua. Sa ia tau mai ia i matou e faapea, e ui lava na faaipoipo mo le 10 tausaga, na te lei tuuina atu lava ia te ia se faamanuiaga ma sa leai se lagona lelei i le faia o lena mea.
“O le a matou fesoasoani ia te oe,” sa ou fai atu ai, e faamalosiau ia te ia.
Ata na tusia e Brian Call
Ina ua uma ona matou faamalamalama ia te ia pe faapefea ona tuuina atu se faamanuiaga ma fesoasoani ia te ia e toe tau upu e fai atu i le amataga ma le faaiuga, sa ia tuuina atu i lona toalua se faamanuiaga matagofie. Ina ua ia faamaeaina, sa maligi uma o matou loimata ma sa ia taliaina ma lona toalua la matou valaaulia e toe foi mai i le talalelei.
O se taunuuga o lenei aafiaga mafanafana, sa musuia le peresitene o le siteki i le taimi o lana saunoaga i tagata o le siteki i le aso na sosoo ai e luitauina le au perisitua e toe foi atu i le fale pe a mavae le konafesi a le siteki, ma tuuina atu ni faamanuiaga i tagata o le aiga.
Na Uunaia e Faamanuia
A o faaiuina lena sauniga o le Aso Sa o le konafesi a le siteki, sa ou lagonaina se isi uunaiga—o le taimi lea ia agai atu i se tuafafine talavou o le sa saofai i le pe a ma le laina lona 10 mai le pito i luma o le falesa ma fai i ai pe na te manaomia se faamanuiaga. Ou te le masani ia te ia, ae sa malosi lava le uunaiga.
I le faateia tele, sa fai mai le tuafafine ma le faalotolotolua, “Leai, faafetai.”
Sa fai si ou lotofaafetai teisi mo lana tali, ae sa ou lagonaina faapea sa ou faia e pei ona sa faatonuina ai e le Agaga. Sa ou toe foi atu i le pito i luma o le falesa e faafeiloai tagata o le Ekalesia ae faafuasei lava ona sau i luma lenei tamaitai talavou lava lea e tasi ma fesili mai pe sa ou naunau pea e tuu atu ia te ia se faamanuiaga. Sa ou fai atu ia te ia “Ioe” ma fautuaina o ia e susu atu i le ofisa o le peresitene o le siteki, lea o le a vave lava ona matou faatasi ai ma ia.
A o ma agai atu ma le peresitene o le siteki i lona ofisa, sa ou fesili atu e uiga ia te ia. Sa ia faamatala mai faapea o lea faatoa toe foi mai o ia i le lotu ina ua mavae le 10 tausaga e lei toe auai mai. O loo nofo na o ia, ae i le taimi o lena 10 tausaga sa ia ola ai i se olaga e feteenai ma tulaga faatonuina o le talalelei.
Ae lei faia le faamanuiaga, na faamatala mai e lenei tuafafine talavou ia i matou ona lagona o le le agavaa. I lona taimi na aluese ai mai le Ekalesia, sa ia fai mai, sa ia na ona faia lava o mea sa ia manao i ai e aunoa ma se mafaufau i mea faaleagaga. Na ia maua talu mai lena taimi le toe fiafia i le talalelei, ae na ia lagonaina ua ia see mamao atu lava i tua i lona atinaega faaleagaga o lea na leai ai sona faamoemoe mo le toe mauaina o lona malosi faaleagaga.
Na matou aoaoina o ia faapea o le au faigaluega na tuai ona ulu atu i le tovine—ma i latou e toe foi atu i le tovine ina ua mavae ona tuua mo se taimi—o le a mauaina le taui lava e tasi e pei o i latou o e ua leva ona galulue iina (tagai i le Mataio 20:1–16). Ona matou tuuina atu lea ia te ia se faamanuiaga faaleperisitua.
Tuafafine i le Tovine, saunia e J. Kirk Richards
I le avea ai ma le na tuuina atu lena faamanuiaga, sa lofituina au i le sasaa mai o le alofa sa ou lagonaina na i ai i le Alii mo ia. O se lagona sa sili atu ona mamana ou te lei lagonaina i se isi lava taimi muamua—lea na ou iloa ai sa ou i ai faatasi ma se agaga e faapitoa lava le tamalii. Ina ua uma le faamanuiaga, na tulai le tuafafine mai le nofoa. Sa tafe mai ni laina se lua lanu uliuli o le vali mai lalo o ona mata. Na maligi foi ou loimata.
Sa faatagaina au e le Alii e vaai atu i lenei tamaitai talavou tulaga ese sa i ai i tulaga amata o se faagasologa lea e tatau ona oo ia i tatou uma ina ia ausia ai lo tatou gafatia atoatoa iinei i le lalolagi. Pe a tatou se ese faaleagaga mai lo tatou ala ma pe a tatou faia le agasala, e tatau ona tatou faamaualalo uma i tatou lava ma salamo.
E pei ona aoao atu e le Aposetolo o Paulo i Kalatia, o le olaga lenei o le taimi mo le agaga e faatoilalo ai le tino. “Aua o le tino ua tuinanau lea e tetee atu i le Agaga, ua tuinanau foi le Agaga e tetee atu i le tino: ua feteenai foi ia mea: o le mea lea tou te le fai ai mea tou te loto i ai” (Kalatia 5:17).
Pe tatou te mauaina lo tatou malosiaga e faalagolago lea pe a pulea e o tatou agaga o tatou tino, pe a tatou manumalo i le “tagata natura” (Mosaea 3:19). I le lalolagi o aso nei, e toatele e foliga mai e le fia tauina lenei taua. Ua pulea o latou olaga e tuinanau o le tino, ma ua faatoilalo e le tino o latou agaga.
O lenei tamaitai talavou sa i luga o se ala lea e mafai ai ona faatoilalo e lona agaga le tino. Na ia amataina se tauvaga sa ia naunau e manumalo ai.
“Savavali i la le Agaga”
Ina ua ou tuua le siteki i lena aso, sa ou fesili atu i le peresitene o le siteki e tuuina mai ia te au faamatalaga e faafesootai ai i latou sa ou feiloai i ai i lena faaiuga o le vaiaso ina ia mafai ona ou fautuaina i latou e faaauau pea i le ala o le talalelei ma ia manatua tautinoga sa latou faia.
O le tamaitai talavou na faaauau pea ona alualu i luma ma na televave lona faia o lena mea. E ala i lona faatuatua, sa ia amata ona “savali i la le Agaga” ma “ola i le Agaga” (Kalatia 5:16, 25). Sa ia fesootai mai pea ma tauina mai ia te au e uiga i luitau taua sa ia manumalo ai ma na oo i ai talu mai lena taimi. Ua avea o ia ma se uo mamae i lo matou aiga, ma ua matou vaaia le malosi o lona agaga a o ia faalatalata atu i le Faaola.
O lenei ua olioli o ia i faamanuiaga o le malumalu, ua auauna atu o se tagata faigaluega o le malumalu, ma e susulu mai ai meaalofa faaleagaga o le alofa mama ma le agalelei. Ua ia faaipoipo atu i se alii talavou agavaa i le malumalu talu mai lena taimi.
Ua manino lava le faatoilaloina e le faaleagaga o le faaletino i lenei tamaitai talavou. Ua matou vaaia lona loto ua mama, ma ua ia “le toe iai se manao e fai mea leaga, ae ia faia mea lelei e le aunoa” (Mosaea 5:2).
Atonu o le silafia e le Alii o le tamalii o lona agaga le mafuaaga o le uunaiga sa ou mauaina i lena aso. O lena uunaiga ua faamanuiaina au e vaai ai i le mana ma le alofa tunoa o le Tama Faalelagi ua faaalia mai i lona olaga.
Ua ia i tatou uma se tiutetauave ina ia fesoasoani i o tatou uso ma tuafafine ua le toaaga mai, ma e mafai ona uunaia i tatou uma lava i auala e faamanuiaina ai i latou. A o tatou ola ai i le mafutaga ma le Agaga ma saili le fesoasoani a le Alii, o le a Ia faamanuiaina a tatou taumafaiga i le “e toe aumai i latou” (“Pele i le leoleo mamoe,” viiga, no. 135; tagai foi i le Alema 26:4).