Auala e Valu e Fesoasoani i Tamaiti e Teena ai Ponokalafi

Amata i puipuiga i fafo atu. “Tatou te puipuia a tatou fanau seia oo i le taimi e mafai ai ona latou puipuia i latou lava,” o le tala lea a Jason S. Carroll, o le polofesa o le olaga faaleaiga i le Iunivesite o Polika Iaga. O le pogati o le faiai, lea o loo i ai fiafiaga autu o le faiai, e muamua lava ona tupu, ua ia faamatalaina mai. E faatoa mulimuli ane ona atoatoa le tupu o le vaega i luma e faia faaiuga ma malosiaga e faia ai faaiuga. “O lea la, ua i ai i tamaiti le vae penisini e aunoa ma le vae taofi atoa,” o lana tala lea. O le mea lea, ua matua taua ai le faamamaina i fafo ma le mataituina mo tagata talavou.

O laasaga ma tulafono faigofie e mafai ona puipuia tamaiti (ma tagata matutua) mai le vaaia ae lei mafaufauina [o ponokalafi] ma fesoasoani ia i latou e mafaufau ma le faaeteete e uiga i le mea ua latou filifili e matamata ai:

• Faaaoga faamama i le komepiuta, i le initoneti, ma polokalama e maua mai le auaunaga a le Initoneti.

• Ia fai ni tapulaa faamatua ma le anotusi e ala i le satellite ma tautua o ala faasalalau i le Initoneti.

• Faatulaga le tulaga faatapulaa o anotusi i luga o masini feaveai.

• Tuu komepiuta ma tapeleti i eria faitele.

• Fai atu i tamaiti ma le tupulaga talavou e aumai ia te oe a latou telefoni ma masini feaveai i le po.

• Ia faatulaga se aiaiga faavae o le tusi tatala; e mafai e matua ona maimoa i tusiga ma faitotoa o ala faasalalau faaagafesootai i soo se taimi.

Aoao atu i fanau po o le a le mea e fai pe afai latou te fetaiai ma ponokalafi: (1) moeiini o latou mata ma tape le masini, (2) tau atu i se tagata matua, ma le (3) toe faatonutonu o latou mafaufauga. Faamautinoa atu i latou faapea latou te lei faia se mea sese ma e le o se faafitauli.

“O faamama o ni meafaigaluega aoga, ae o le faamama silisili i le lalolagi, ma e na o le pau lea o le mea o le a iu ina aoga, o le faamama lea e i totonu o le tagata lava ia lea e oo mai i se molimau loloto ma tumau i le alofa o lo tatou Tama Faalelagi ma le taulaga togiola a lo tatou Faaola mo i tatou taitoatasi,” na saunoa ai Linda S. Reeves, o le Fesoasoani Lua i le Au Peresitene Sili Aoao o le Aualofa.²

Ina ia fesoasoani i fanau e atiina ae lena faamama i totonu, ua faasino mai e Sister Reeves le fautuaga a Nifae, “Ua matou tautalatala e uiga ia Keriso, ua matou olioli ia Keriso, ua matou talai atu Keriso, ua matou vavalo atu ia Keriso … ina ia mafai ona iloa e a matou fanau po o le a le puna e mafai ona latou tepa taulai i ai mo se faamagaloga o a latou agasala.” (2 Nifae 25:26).

E ioe i ai tagata popoto. Ua faamaonia mai e suesuega o talitonuga ma amioga faalelotu i le fale, faatasi ai ma se “amioga faamatua alofa,” e i ai se aafiaga mo le puipuiga e faasaga i ponokalafi.³

“O le ala sili o le puipuiga ma le ala sili mo le toe faaleleia mo ponokalafi o le aoaoina moni o le talalelei i le aiga,” o le tala lea a Timothy Rarick, o le polofesa mo le tulaga faamatua i le Iunivesite o Polika Iaga–Idaho ma o le sui o le fono faufautua o le United Families International. “O le mea e sili e mafai ona tatou faia o le fesoasoani lea i a tatou fanau e faatulaga la latou lava fesootaiga ma le lagi.”

Ata

parents with son

E mafai ona aoao e matua auala faapitoa mo le faamamaina o ala o faasalalauga e ala i tulaga faatonuina o le talalelei. Mo Dr. Manning, o le mataupu faavae o le faatuatua lona sefulutolu o le faamama sili lea mo filifiliga uma o ala o faasalalauga.

“‘Matou te talitonu i le faamaoni, amiotonu, nofomama, agalelei, amiomama, ma le faia o mea lelei i tagata uma; … Afai o i ai nisi mea e mama, matagofie, pe logoleleia pe tauleleia, matou te saili atu i nei mea’ [Mataupu Faavae o le Faatuatua 1:13]. O loo i ai le tele o anomea i aso e gata ai e le ogatusa ma lena faatulagaga. Ma afai o le a tatou maua se mea e le ogatusa ma na mataupu faavae, e tatau ona faaauau pea ona tatou vaavaai solo,” o le tala lea a Dr. Manning.

Ae o le taumafaiga lena e tulaga ese ai le Au Paia o Aso e Gata Ai, na saunoa ai Peresitene Thomas S. Monson: “A o agai mamao ese pea lava pea le lalolagi mai mataupu faavae ma taiala na tuuina mai ia i tatou e se Tama Faalelagi alofa, o le a tatou tumatilatila ese mai le motu o tagata. … O le a ese i tatou pe a tatou filifili e lē faatumuina o tatou mafaufau i filifiliga o aga fesootai na e faataumaoi ma lē faaaloalo ma o le a tuliesea le Agaga mai o tatou aiga ma o tatou olaga.”⁴

O le mataupu faavae o le “faafeagai o mea uma” (2 Nifae 2:11) e faatatau i ponokalafi. E le lava le faailogaina o ponokalafi faapea e leaga; e manaomia foi e matua ona aoao a latou fanau po o a mea e lelei.

“O se tasi o talita ma puipuiga e aupito sili ona mamana mo o tatou tagata talavou o le amata aoaoina vave, lea o i latou i tulaga feusuai i le aiga,” o le saunoaga lea a Dr. Manning. “O loo mafatia a tatou talavou ona o loo latou tutupu ae i se siosiomaga ua faatumulia i savali palapala ae itiiti lava ni savali lelei mai i totonu o le talalelei.”

Ua fautuaina mai e le polofesa o le olaga faaleaiga o le Iunivesite o Polika Iaga o Mark H. Butler se faamalamalamaga tuusao faapea: “O le taamilosaga o le tali-atu-i-feusuaiga o loo i ai lava i totonu o i tatou o ni tagata soifua. O le naunau ma le manao o ia i tatou o se meaalofa na tuuina mai e le Atua lea e faamanuiaina ai i tatou, e tosina atu ai lava i tatou ma le alofa i le isi itupa, agai i le faaipoipoga, ma agai atu i le olaga faaleaiga.”

E mafai ona vave amata talanoaga e uiga i feusuaiga mama i le vaitausaga talafeagai. Ua faailoa mai e Polofesa Carroll faapea o talanoaga e uiga i le fepaiai talafeagai ma le fepaiai e le talafeagai ma le tulaga patino faaletagata lava ia, faatasi ai ma le faaupuga sao mo vaega o le tino, e mafai ona aoaoina e amata i se taimi ao laitiiti lava. E oo atu i le valu tausaga, ua mafai e se tamaitiiti ona maua se malamalamaaga autu i feusuaiga i ona tulaga faaletino, faaleagaga, faalelagona, ma faalefesootaiga, o lana tala lea.

E talisapaia foi e le autalavou le gagana sa’o ma tuusao. Sa fai mai se tasi alii talavou, “Afai e faataamilomilo au faamatalaga, e mafai ona faaseseina ai le malamalama o tagata. Pe faasefulu lua ni taimi na aoaoina ai a’u e uiga i le tulafono ae faatoa ou iloaina sa latou talanoa e uiga i feusuaiga.”

Ua faapea mai polofesa Carroll e tatau foi i matua ona gauai atu i le anotusi o nei talanoaga. “Fai mea uma e mafai ina ia le avea ai nei talanoaga o ni talanoaga aloaia,” o lana tala lea. “Ma te ave le ma tamaitiiti mo se taumafataga o le afiafi, fai a matou ofu lotu, pe fai le matou talanoaga i le pakaga taavale o le malumalu,” o lana tala lea. Ae afai e faapea fanau o le savali e uiga i feusuaiga faatoa mafai ona faia i lalo o na tulaga, atonu o le a le mafai ona latou iloa le auala e toe fatuina ai ia tulaga pe a i ai ni a latou fesili.

Nai lo lena, e tatau i matua ona fatuina se talanoaga faifai pea ma avanoa mo tamaiti e fai ai ni fesili i soo se taimi lava e i ai ni a latou fesili. “Afai e tupu se talanoaga i luga o le fola o lou potumoe po o totonu o lau loli pikiapu po o fafo ao tauina fua o vine, latou te iloa pe faapefea ona toe foi atu i ai,” o le tala lea a Carroll.

“O lou aafiaga ua aoaoina ai au faapea o tupulaga talavou o e ua sili ona aafia i feusuaiga e masani lava o i latou na e aupito itiiti le aoaoina,” o le faailoa mai lea a le polofesa o le BYU o Bradley R. Wilcox. “O tagata talavou o e e maua tali mai matua ao laiti o latou olaga e masani lava o i latou ia e aloese mai le faataitaia o gaoioiga faalefeusuaiga.”

Sa taua manino e Peresitene Gordon B. Hinckley (1910–2008) le upumoni e uiga i ponokalafi. “E matautia,” na ia saunoa mai ai. “E inosia ma eleelea. E faatosina ma e avea ma mausa. O le a tosoina [oe] i lalo i le faatafunaga e mautinoa lava e pei lava o soo se mea i lenei lalolagi. O ni mea mataga e mafai ai ona milionea i latou e faia, ae matitiva ai i latou e matamata i ai.”⁵

“O le faaaogaina o ponokalafi e tamaiti talavou ma talavou matutua e tele lava ina taitai atu ai i se vaaiga mataga i tulaga tau feusuaiga ma lana matafaioi i le uunaia o ni sootaga mama faaletagata lava ia,” ua faailoa mai e le American College of Pediatricians. “O nei manatu mataga e aofia ai le malamalama sese i le tulaga faifaipea o feusuaiga i le lotoifale, o le talitonuga o feusuaiga i le tele o paaga o se mea masani, ma le talitonuga faapea o le aloese mai feusuaiga o se mea leaga.”⁶

I talanoaga e uiga i ponokalafi, e tatau i matua ona faailoa atu o ponokalafi o ni ata fatu i tulaga uma. O amioga e faaalia i ponokalafi e masani lava e le o se tulaga masani po o se ataata o mea e tatau ona faatinoina pe faamoemoeina i se sootaga mama. “O ponokalafi e faatoa matagofie lava pe a tatou taliaina ponokalafi o ni ata fatu,” o le tala lea a Polofesa Carroll.

Ata

father with son

Ua lapatai mai tagata tomai faapitoa ma taitai o le Ekalesia e faatatau i le vave ona faia o se faaiuga e faapea o soo se aafiaga lava i ponokalafi o se faailoga mautinoa lea o se vaisu.

“E le o tagata uma o faaaogaina ma le loto i ai ia ponokalafi o loo aveaina ma se vaisu,” o le faailoa mai lea a Elder Dallin H. Oaks o le Korama a Aposetolo e Toasefululua. “O le mea moni, o le tele o alii ma tamaitai talavou o loo tauivi ma ponokalafi e le o aveaina ma se vaisu. O se eseesega taua tele lena ia faia—e le mo na o matua, taitoalua, ma taitai o e ua mananao e fesoasoani, ae faapea foi mo i latou o e tauivi ma lenei faafitauli.”⁷

“E aafia alii talavou ma tamaitai talavou i ponokalafi ona o le fiailoa, o le faigofie ona maua, ma o le mea moni lava o le lava o le matua o le mafaufau,” o le tala lea a Polofesa Carroll. “E tofu uma lava i tatou ma ni aafiaga o le mana o le taamilosaga o le tali-atu-i-feusuaiga ia ua faaosofia i tausaga talavou, a o lei taitai lava ona tatou lagonaina ni tulaga faatagata matua faalelagona po o le faaleagaga e malamalama atoatoa i ai.”

Ua iloaina e Richard Neitzel Holzapfel, o le polofesa o le BYU o talafaasolopito o le Ekalesia ma le faufautua i le kalapu a tamaiti aoga a le Unraveling Pornography, e faapea, “o le faafitauli e moni ma e i ai taunuuga matautia, ae o le soona faia o faamatalaga e uiga i le faafitauli e matele lava ina uunaia atili ai i totonu o agaga o i latou o loo tauivi.”

Ua taua e Elder Oaks faapea o faafitauli o ponokalafi e mafai ona faatulaga mai i le “seasea ona faaaogaina po o le faaaogaina soo ma le le manatu i ai, i le faateleina o le faaaogaina, i le soona faaaogaina (faavaisu). … Afai o loo sese le faatulagaina o le amioga o se vaisu, atonu ua manatu le tagata o loo faaaogaina ua leai sona faitalia ma le gafatia e faatoilalo ai le faafitauli. … I se isi itu, o le mauaina o se malamalama e sili atu le manino i le loloto o se faafitauli—e faapea atonu e le o loloto tele e pei ona manatu i ai pe ua ogaoga e pei ona fefe i ai—e mafai ona tuuina atu le faamoemoe ma se malosi faateleina e faaaoga ai le faitalia e … salamo.”⁸

Pe a talanoaina faafitauli, ua fautuaina e Polofesa Butler matua ina ia faia se iloiloga sao: Po o le a le umi talu ona tupu? Pe faafia ona latou matamata i ai? O faapefea ona latou mauaina? Ona mafai lea e matua ona galulue faatasi ma le autalavou e iloilo ai se tulaga talafeagai o le faatinoga.

“Malamalama i le tagata ma po o ai i latou,” o le tala lea a Polofesa Holzapfel. “O le a le loloto o lo latou faafitauli? O le a le mea moni lava o loo tupu? O le a la latou mafuaaga mo le matamataina o ponokalafi, ma e mafai faapefea ona tatou faatautaia faafitauli e loloto atu?”

O le taulimaina o faafitauli e loloto atu atonu foi e i ai le ki e taofia ai faafitauli o ponokalafi, o le tala lea a Nathan Acree, o se fomai faapitoa i Iuta. I tua atu o le fia iloa masani, e matele lava ina faaaogaina ponokalafi e avea ma auala e taulima ai lagona, aemaise lava lagona o le lofituina.”

Na faaopoopo mai Polofesa Butler, “I nisi taimi, e oo ai i se alii po o se tamaitai talavou se aafiaga e faigata po o se faanoanoaga faalemafaufau, faalefesootaiga, po o le faaleagaga.” Sa ia fai mai o aafiaga le lelei e mafai ona taitai atu ai le faiai o tamaiti talavou e toe foi atu i “aafiaga e maua ai lagona-lelei” e pei o le matamata i ponokalafi ma faatinoina amioga faapena e pei o le taaalo i o latou itutino sa. O lagona e faaosofia mai i na amioga e suia ai loa pe pupuni ai lagona faanoanoa. Ma o iina ua taoto ai le tulaga lamatia: “O le a agai ese atu le tagata mai le aafiaga e maua ai-lagona-lelei i le amataina o se faalagolago faalemafaufau i na amioga. O lenei la ua ia faaaogaina lena amioga o se auala e faatautaia ai le olaga.”

Ata

parents with young daughter

Ua saunoa mai Brother Acree e tatau i matua ona aoao fanau e faapea o lagona lelei ma le le lelei o ni lagona masani uma lava, ma e le afaina le oo i ni lagona le lelei e pei o le faanoanoa, ita, le fiafia, po o le tiga. E masani ona lagona e matua le manaomia ona pulea lagona o a latou fanau, ae o le faatagaina o i latou e oo i ai ma taulimaina lagona le lelei e fausia ai se vaega o ni tomai taua.

Afai o loo i ai se faafitauli i ponokalafi, e tatau i matua ona faaeteete ia aua nei faaopoopo atu i avega faalelagona o le tamaitiiti e ala i le faalumaina. Na mataituina e le polofesa o le olaga faaleaiga a le BYU o James M. Harper e faapea e ui o le tausalaina o se tali masani i mea sese lea e mafai ona faaosofia ai le suia, o le maasiasi o se lagona matautia, lea e mafai ona taitai atu ai i se lagona o le leai o se faamoemoe.

I se isi faaupuga, o le fatuina po o le faateteleina o se lagona o le maasiasi i se tamaitiiti e faaleagaina ai le gafatia o le tamaitiiti ina ia atiina ae ni tali lelei faalelagona ma ia iloa le uunaiga a le Agaga, lea e mautinoa lava o le fesoasoani e aupito sili ona mamana i le puipuiga ma le toe manuia mai i le faaaogaina o ponokalafi.

E manatua lava ma le manino e se tasi o alii talavou na tauivi ma ponokalafi le auala na tali atu ai ona matua ina ua aliae lona luitau: “Na tali mai lou tina ma le malosi, i le faataio ma ee, ma sa ou maua ai se lagona e sili atu le leaga nai lo le faamoemoe i le manumalo mai ai,” o lana tala lea. “O le vaega na sili ona aoga o le tau soo mai e lo’u tama e alofa ia te au.”

“Faamolemole aua le tausalaina i latou,” o le aioi mai lea a Elder Oaks. “E le leaga i latou pe ua aunoa ma le faamoemoe. O i latou o atalii ma afafine o lo tatou Tama Faalelagi.”⁹

I lauga, lesona, ma tusi e faitauina, ua maua ai e le autalavou le savali manino faapea o ponokalafi o se mala matautia, ae e tatau ona tatou tuu atu se faamamafa faaopoopo i le aoaoga faavae o le Togiola a Iesu Keriso.

Mo le autalavou, e talitonu Polofesa Butler o le faiai talavou atonu o se tasi lea o mafuaaga autu ia aoaoina ai i latou e uiga i le Togiola. “E le i atoatoa le foafoaina o le faiai o tamaiti talavou, ma e taitai atu ai i ni mataupu faapitoa e pei o le puleaina o le tali faafuasei mai ma le le lava o le mafaufau agai i luma atu,” na ia faamalamalamaina mai. “E mafai ona taofiofia se talavou faamaoni ma ola taumafai e tumu i le faaleagaga i se lagona lofituina o le nofosala pe a ia fetaiai ma vaivaiga lea e faapitoa lava lona lamatia ai i le i ai o lena faiai o loo talavou-pea. E taua tele, faatasi ai ma le aoaoina atu o poloaiga, lou aoao atu i talavou o le Togiola—faapea o loo i ai iina mo le faamoemoega o le atiina ae o le onosai ma le tumau ai i le olaga.”

“Tatou te manaomia uma lava le Togiola a Iesu Keriso. … E ala i le salamo talafeagai ma le atoatoa, e mafai ai [e tagata uma] ona mama, mama aiai, ma agavaa mo feagaiga ma faamanuiaga uma o le malumalu ua folafola mai e le Atua,” na saunoa mai ai Elder Oaks.¹⁰ E aofia ai i latou na faaaogaina ponokalafi.

Ma o se savali o le faamoemoe lena: o loo tele mea e mafai ona faia e matua ia saunia ai a latou fanau e tetee atu i ponokalafi, ma afai ua latou sese, o le Togiola le iu a le Faaola ua mafai ai ona faia se suiga ma ia salamo ai.

“O lona uiga, po o le a lava le mea e tupu, o le a le muta lava le alofa o le Tama Faalelagi ia te outou, ma o i matou, o o outou matua, o le a le muta foi lo matou alolofa ia te outou,” o le tala lea a Polofesa Rarick. Mo se tamaitiiti, e mafai ona le toe i ai se faamoemoe nai lo o lena.