O Le Vavega a Sister Sheldon
O Sister Sheldon o le peresitene silisili lea o le Peraimeri na i ai! E malosi o ia ma malie. Pe a tu o ia i luga e fai le taimi o fetufaaiga, matou te pepese uma, “O le taimi o le fetufaaiga a Sheldon” ma lima ua faamafola ma ataata. Sa ia fiafia i ai!
I le amataga o le 2015 na iloa ai e Sister Sheldon ua toe maua o ia i le kanesa, mo le taimi lona lima! Sa ia faamatala mai ia i matou uma le mea ua ta’ua o le kanesa ma le mea na te faia. Sa ia tau mai ia i matou atonu o le a ia le lotu i nisi taimi ma atonu o le a toulu lona lauulu. Sa ia talosagaina i matou e anapopogi ma tatalo ina ia fesoasoani ia alu ese ai le kanesa.
O le taimi lena, sa faia ai e la matou Peraimeri le luitau o lima fesoasoani, lea na matou tipi ai ni lima pepa ma tusia ai se galuega auauna atu na matou faia. O Sister Ashby, i le au peresitene o le Peraimeri, sa maua se manatu e fai se ie soosoo o lima fesoasoani mo Sister Sheldon. Na matou mananao uma lava ia te ia ia iloa matou te alolofa ia te ia, o lea na lolomi ai e le Peraimeri atoa lima ma ni fatu, ma o teineiti i le aso o gaoioiga na faaaogaina e faia ai le ie soosoo. Na matou suiina, auli, ma sasaa uma lo matou alofa i ai i totonu. E oo lava i nisi o i matou na nonoaina ni manoa i o matou tamatamailima e manatua ai Sister Sheldon.
Na matou tuuina atu le ie soosoo ia Sister Sheldon. Sa ia aveina i ona taimi o togafitiga o vailaau ma lagonaina lo matou alofa.
O le vaega sili ona manaia o le taimi na tuuina mai ai e Sister Sheldon lana molimau i le Peraimeri atoa. Sa ia tau mai ia i matou le tele o lo matou faapitoa ia te ia ma e alofa o ia ia i matou. Sa ia iloaina sa avea i matou o se vaega tele o le mafuaaga sa manuia ai o ia i lona togafitiga o vailaau. E ui lava sa ou fefe ina ia le mafai ona manuia o ia, sa ou iloa lava o le a manuia o ia. I le taimi nei ua le toe i ai se kanesa ia Sister Sheldon!